2019-03-03
Romeine 12:2 NLV
Blywende verandering gebeur nie deur menslike inspanning, frustrasie, selfhaat, skuldgevoelens of om jouself aanhoudend oor jou mislukkings te verwyt nie. Dit gebeur deur jou gedagtes elke dag deur die Woord van God te vernuwe. As jy gereeld jou Bybel lees, sal jy geestelik groei. As jy met God saamstem en glo wat Hy in sy Woord sê, sal jy geleidelik begin verander. Dit gebeur eenvoudig net. Jy sal anders begin dink, anders begin praat en anders begin optree. Jy moet egter geduldig wees, omdat dit ‘n proses is wat in fases ontwikkel. Jy moet ook leer om die lewe te geniet terwyl jy deur die transformasieproses gaan. Baie van ons lyk of ons op ‘n nou koord, eerder as ‘n pad van vrede, loop. Nee, geniet waar jy is, op jou pad na waarheen jy op pad is! Moenie al jou tyd tans mors deur jou toekoms te probeer stormloop nie. Jesus het gesê dat môre sy eie uitdagings bring (sien Matteus 6:34). Miskien dink jy, ‘As ek net nie hierdie probleem gehad het nie, sou ek gelukkig gewees het.’ Waarmee stoei jy? ‘n Eetlus wat buite beheer is? Wrokkigheid? Vrees? Miskien sê jy: ‘As ek net hierdie gewoonte onder beheer kan kry, sal ek reg wees.’ Net soos Israel die Beloofde Land een stad op ‘n slag verower het, oorwin jy jou swakhede een dag op ‘n slag. Paulus het gesê: ‘…sodat ek met blydskap my loopbaan kan volbring…’ (Handelinge 20:24 AFR53). Paulus wou alles wees wat God hom geroep het om te wees – maar hy wou die proses geniet. In plaas daarvan om moedeloos te wees oor hoe ver jy nog het om te gaan, leer om solank jou vordering langs die pad te vier.
Sielskos: Eks 20:7; Lev 24:10-16; Fil 2:5-11
2019-03-02
3 Johannes 1:12 NLV
Wanneer mense goed van jou praat, beteken dit dat jy aanvaarding het. Wanneer die waarheid egter goed van jou praat, beteken dit dat jy klas het! Demetrius het dit gehad. Het jy dit? Paulus het vir Timoteus gesê: ‘…Wees ‘n voorbeeld vir alle gelowiges deur wat jy leer, in die manier waarop jy lewe, in jou liefde, jou geloof en jou integriteit… Werp jouself in jou werksaamhede sodat almal jou vordering kan sien’ (1 Timoteus 4:12-15 NLV). Ons het besluit om hierdie tydlose woorde oor ‘klas’ deur die rubriekskrywer Ann Landers, weer te gee: ‘Klas is net selfvertroue wat in nederigheid geklee is. Dit hou sy woord, sy humeur en sy vriende. Dit het ‘n standvastige oog, standvastige senuwees, ‘n standvastige tong en standvastige gewoontes. Dis stil wanneer dit niks het om te sê nie, deurdag wanneer dit oordeel en altyd eerste om vrede te maak wanneer dit verkeerd is. Klas hardloop nie weg nie. Dit is selfversekerd, toegewyd en hanteer alles wat oor sy pad kom. Klas het ‘n sin vir humor. Dit weet dat ‘n goeie lagbui dikwels die beste smeermiddel is om die masjien van menseverhoudings te olie. Klas maak nooit verskonings nie. Dit vat sy slae, leer uit sy foute en word wyser. Klas weet dat hoflikheid en goeie maniere niks meer as ‘n reeks klein opofferings is nie. Dit dui op ‘n aristokrasie wat nie van voorvaders of geld afhang nie. Iemand met blou bloed kan geheel en al sonder klas wees, terwyl die seun van ‘n steenkoolmyner dit in oorgawe kan hê. Almal is gemaklik met ‘n persoon wat klas het – omdat hulle gemaklik met hulself is.’ Wys vandag ‘n bietjie ‘klas!’
Sielskos: Eks 22-24; Luk 13:1-17; Ps 77; Spr 6:29
2019-03-01
2 Korintiërs 8:21 NLV
Daar is ‘n strokiesprent wat ‘n boer uitbeeld wat besig is om sy varke se trog tot oorlopens toe vol kos te maak. Aan die bokant is daar ‘n groot kennisgewingbord wat lees, ‘Premium Spek Maatskappy.’ In die strokiesprent vra een van die varke vir die ander: ‘Het julle al ooit gewonder hoekom die boer so goed vir ons is?’ Vraag: Moet mense oor jou motiewe wonder? Hulle behoort dit nie te doen nie! Die apostel Paulus definieer integriteit as volg: ‘As broers en susters in God se huisgesin moet julle mekaar in liefde koester en voor in die ry staan om mekaar met respek te hanteer’ (Romeine 12:10 NLV). Integriteit beweeg altyd ten goede van ander. Dit glo dat as iets nie vir beide kante goed is nie, is dit nie vir enige kant goed nie. Salomo waarsku: ‘Wie arm mense verontreg om homself te verryk, of vir die rykes geskenke gee, sal self in armoede verval’ (Spreuke 22:16 NLV). As jy die diepte van jou integriteit wil toets, vra jouself die volgende af: Hoe deursigtig is jy vir ander mense? Hoe goed behandel jy mense by wie jy niks kan baat nie? Stel jy ander mense bo jou eie persoonlike agenda? Het jy mense lief en gebruik dinge, of het jy dinge lief en gebruik mense? Maak jy moeilike besluite, selfs ten koste van jouself? Wanneer jy iets oor iemand te sê het, praat jy met hulle, of oor hulle? Hierdie is belangrike vrae, so neem die tyd om hulle versigtig in gebed te oorweeg. Onthou, jy mag dalk vir ‘n oomblik sukses behaal as gevolg van wat jy weet of doen, maar jy sal slegs permanent sukses bereik as gevolg van wie jy is.
Sielskos: Eks 19-21; Luk 12:49-59; Ps 70; Spr 6:26-28
2019-02-28
Psalm 42:6-7 NLV
Sommige van die gelowigste mense in die Bybel en in die geskiedenis van die kerk het teen depressie gestry. Job het dit deur die verlies van sy kinders, sy rykdom en sy gesondheid ervaar. Selfs al het ‘…die Here [het] met Moses gepraat soos vriende wat gesels en mekaar in die oë kyk…’ (Eksodus 33:11 NLV), het die druk om Israel te lei, Moses tot by die punt van wanhoop oorweldig. Elia het die profete van Baäl by Karmelberg oorwin en daarna so depressief geword dat hy wou sterf. Charles Haddon Spurgeon, een van die grootste predikers wat al ooit geleef het, het depressie die ‘swart hond’ genoem wat hom sy hele lewe lank gevolg het. Depressie sal ons almal in een of ander vorm in ons lewe aanraak. Langtermyn depressie neem langer om te oorkom. Die langste pad in die wêreld word egter korter wanneer jy die eerste tree neem, en daardie eerste tree is om na God toe te draai. Of jou depressie nou deur die druk van verantwoordelikheid soos Moses veroorsaak word, of deur die verlies van dinge wat jy liefhet soos Job, of omdat jy soos Elia gedreineerd voel nadat jy ‘n groot sukses bereik het, jy moet na die Groot Geneser toe draai en Hom toelaat om jou weer heel te maak. Dis wat die Psalmdigter gedoen het. Dawid ontken nie sy emosies nie; hy druk hulle aan God in gebed uit. ‘Hoekom is ek nou so mismoedig? Hoekom so hewig ontsteld?..’ (Psalm 42:6 NLV). Hy hou egter nie daar op nie. Hy sê: ‘…Nee, ek plaas my hoop op God! Ek sal Hom weer prys. Hy is my redder en my God!’ (vers 12 NLV). Depressie lig en hoop keer terug wanneer jy God prys en sy goedheid vertrou.
Soul food: Eks 16-18; Luk 12:35-48; Ps 66:13-20; Spr 6:23-25
2019-02-27
Efesiërs 1:4-5 NLV
Ons almal het ‘n behoefte daaraan om te behoort, om deel van ‘n familie te wees. Een pastoor skryf: ‘Ek ken paartjies met harte vol liefde wat begeer om dit op ‘n kindjie uit te stort, maar hulle raak nie swanger nie. Wanneer hulle dan ‘n kind aanneem, sê hulle nie vir die kind dat hy/sy aan hulle verwagtinge moet voldoen as hy in die familie wil bly nie. Net drie foute word geduld – en dan gaan jy terug na die agentskap toe nie. Nee, hulle aanvaar die kind met oop arms en vreugdevolle harte omdat hulle hom liefhet. Hulle neem hom vir ewig in hul huis in, gee hom hulle van en maak hom ‘n wetlike erfgenaam. Lank voor ons geweet het dat ons God nodig het, het Hy ‘…vooraf besluit om ons as sy kinders aan te neem…’ Aardse ouers skei, gaan in hulle onderskeie rigtings en begin nuwe families. God doen dit egter nie; jy hoef nooit bekommerd te wees oor jou plek by Hom of jou verhouding met Hom nie. Ongeag jou ras, kleur, geloof of agtergrond, wanneer jy jou sondes bely en Christus as jou Redder aanvaar, word jou aanneming bindend en permanent. Jy is deel van God se familie.’ Nog ‘n bewys daarvan is dat ‘…die Gees self bevestig die getuienis van ons eie gees dat ons God se kinders is’ (Romeine 8:16 NLV). Besef jy wat dit beteken? Jy hoef nooit weer geïntimideerd of bang te wees of onder ‘n wolk van veroordeling te leef nie, want jy is ‘n kind van God en saam met Christus ‘n erfgenaam (sien Romeine 8:17). Die woord ‘erfgenaam’ beteken dat jy elke seëning en voordeel wat Christus vir jou by die kruis gekoop het, kan opeis. Elke liewe een, sonder uitsondering!
Sielskos: Eks 13-15; Luk 12:22-34; Ps 66:1-12; Spr 6:20-22
2019-02-26
Spreuke 4:23 NLV
Wanneer Satan besluit om jou te vernietig, begin hy deur verkeerde gedagtes in jou kop te plant. Jesus het dit geïllustreer toe Hy gesê het: ‘Julle het gehoor dat daar gesê is: ‘Jy mag nie egbreuk pleeg nie.’ Maar Ek sê vir julle, elke man wat met ‘n wellustige oog na ‘n ander vrou kyk, het al klaar in sy hart egbreuk gepleeg’ (Matteus 5:27-28 NLV). Voor jy in realiteit aan sonde toegee, vermaak jy dit eers as ‘n fantasie in jou gedagtes. Bose gedagtes is nie regtig joune nie, tensy jy hulle toelaat om spreekwoordelik in te trek en die meubels te begin rondskuif. As jy hierdie gedagtes toelaat om ongehinderd rond te maal, kan ‘n gedagte homself aan ‘n voorval in jou verlede of ‘n neiging in die hede vaskleef en homself voed totdat dit soos ‘n gewas is wat binne-in jou groei. Paulus waarsku ons, ‘…neem ook elke gedagte gevange om dit aan Christus gehoorsaam te maak’ (2 Korintiërs 10:5 NLV). Salomo skryf ook, ‘Bo alles, wees versigtig met wat in jou hart aangaan. Wat jy dink, bepaal alles wat jy doen.’ Moenie verkeerde gedagtes ‘n pinkie gee nie, want hulle sal die hele hand gryp. Raak van hulle ontslae voor hulle jou verbintenis met Christus verswak en jou spyt laat kry. Oor die algemeen, fokus ons op dit wat ander mense kan sien en inspekteer wanneer ons ons huise skoonmaak. Dink net hoeveel gemors is daar in ons gedagtes, omdat niemand anders ons gedagtes ondersoek nie. God ondersoek dit egter! Dawid het gesê: ‘Here, U deursoek my en ken my’ (Psalm 139:1 NLV). Jy moet die volgende bid: ‘Mag die woorde van my mond en die gedagtes van my hart vir U aanneemlik wees, Here, my rots en my Verlosser’ (Psalm 19:15 NLV).
Sielskos: Eks 10-12; Luk 12:13-21; Ps 61; Spr 6:16-19
