2019-03-09
Sagaria 7:11 NLV
Aanvaar dit maar – sommige mense is eenvoudig nie gereed om te verander nie! Hulle sal jou tyd en energie opeis, maar op die ou einde nie bereid wees om die prys vir vooruitgang te betaal nie. Wie is hierdie mense? 1) Mense wat wil praat, maar nie wil luister nie. Jakobus sê: ‘Julle moet mense word wat dóén wat die woord sê. Moet dit nie net aanhoor nie, dan bedrieg julle julleself’ (Jakobus 1:22 NLV). In plaas van om eindeloos daarna te strewe om aan ander mense se behoeftes te voldoen, probeer hulle aan die Een koppel wat dit kan doen. Hulle moet van die Here afhanklik wees, nie van jou nie. 2) Mense wat dink dat jy nie gekwalifiseerd genoeg is om hulle te help nie. Jesus is nie deur die wêreld aanvaar nie en tog was Hy die presiese persoon wat hulle nodig gehad het (sien Johannes 1:11-12). Wanneer mense onwillig is om jou hulp en raad te aanvaar, is die kans goed dat hulle nie gereed is om te groei en hulle probleme aan te pak nie. 3) Mense wat dit wat jy het, wil hê, maar nie dit wat jy weet nie. Hierdie mense wil gered word, maar nie opgelei word nie; getroos word, maar nie reggehelp word nie. Wanneer jy aanhou om hulle uit hulle gemors te help, in plaas daarvan om hulle te leer hoe om te leef, help jy hulle nie regtig nie. Dawid het gesê: ‘Die lyding was goed vir my, want toe het ek u voorskrifte geleer’ (Psalm 119:71 NLV). Dikwels moet mense eers die pyn van dit wat verkeerd is ervaar, voordat hulle die wysheid van dit wat reg is, kan waardeer. Wees dus oordeelkundig wanneer jy mense help.
Sielskos: Eks 39-40; Luk 15:11-32; Ps 135; Spr 7:21-23
2019-03-08
Jeremia 32:33 NLV
Daar is mense wat jy nie kan help nie – ten minste nie nou dadelik nie. Let op wat God oor die Israeliete gesê het: ‘…Dit het nie eers gehelp dat Ek hulle aanhou en aanhou leer om tussen reg en verkeerd te onderskei nie. Hulle het hulle nie aan My gesteur deur op onderwysing ag te slaan nie.’ Kom ons kyk na hierdie mense wat gewoonlik nie gehelp kan word nie: 1) Mense wat aanhou verskonings maak. Verskonings is ‘n kruk vir ‘n gebrek aan toewyding en ‘n rookskerm vir selfregverdiging. Jy kan nie iemand help totdat hulle gewillig is om verantwoordelikheid vir hulle lewe te aanvaar en die oplossings van die Skrif toe te pas nie. As hulle nie na God wil luister nie, watse verskil gaan jou opinie dan maak? 2) Mense wat in die verkeerde sirkels beweeg. Die Bybel sê: ‘…slegte geselskap bederf goeie gewoontes’ (1 Korintiërs 15:33 NLV). Daar is mense wat eenvoudig nie in jou lewe hoort nie en jy kan nie vorentoe beweeg totdat jy die skakel breek nie. Die geselskap wat jy hou, beïnvloed jou optrede, karakter en toekoms. 3) Mense wat God vir hulle probleme blameer. Wanneer moeilikheid opdaag, vra hulle: ‘Hoekom laat God toe dat dit met my gebeur?’ Die feit is dat jy nooit God as jou oplossing sal sien, totdat jy ophou om Hom as jou probleem te sien nie. God het dit duidelik vir sy mense uitgestippel: ‘Vandag gee ek aan jou die keuse tussen lewe en dood, tussen seën en vloek… Mag jy tog die lewe kies…’ (Deuteronomium 30:19 NLV). As jy moedeloosheid wil verhinder, moet jy mense liefhê en vir hulle bid, maar jou tyd met diegene wat bereid is om gehelp te word, spandeer.
Sielskos: Eks 36-38; Luk 15:1-10; Ps 27; Spr 7:10-20
2019-03-07
Hebreërs 10:20 NLV
In die Ou Testament was daar meer godsdienstige wette as wat enigiemand moontlik kon onderhou: meer as seshonderd van hulle. Elke keer wat jy daarin misluk het, moes jy ‘n offerdier as versoening bring. Dit het veroorsaak dat mense probeer en misluk het; skuldig gevoel het en harder probeer het; weer misluk het en meer opofferings gemaak het. Dit was ‘n nimmereindigende siklus. Toe het Jesus gekom en ‘n ‘nuwe, lewegewende pad… vir ons oopgemaak…’ om ‘n verhouding met God te hê. Sy pad het vergifnis van sonde sowel as die vervanging van offergawes deur geloof in Hom, ingesluit. Vir baie mense was dit te goed om waar te wees, dus het hulle aanhou werk en probeer om God met hulle goedheid te beïndruk. Doen jy dit? ‘n Christelike skrywer sê: ‘Ek het vir baie jare so gelewe. Dit beteken dat ek alles perfek moes doen; anders was ek by God in die moeilikheid. Omdat dit ‘n onmoontlike standaard was om te onderhou, het dit al my vrede en vreugde gesteel. Ek kon nie aan ander mense gee wat ek nie self geweet het hoe om te ontvang nie! Ek het nie God se genade vir my mislukkings ontvang nie, dus kon ek dit nie aan enigiemand anders bied nie. Ek het probeer om al die reëls na te kom, baie wat nie eers Skriftuurlik was nie – net dinge om oor skuldig te voel. Dank God dat ek egter nie meer so moet leef nie. Nou werk ek nie om gered te word nie, ek werk omdat ek gered is! My verlossing is nie gebaseer op dit wat ek doen nie, maar alleenlik op dit wat Jesus vir my gedoen het.’ Wanneer jy hierdie waarheid verstaan, is jou verhouding met God nie meer ‘n werk nie – dis ‘n vreugde.
Sielskos: Eks 33-35; Luk 14:25-35; Ps 112; Spr 7:6-9
2019-03-06
Filippense 1:23 NLV
Verbeel jouself jy klim op die vliegtuig na jou droomvakansie, wanneer die vlieënier skielik aankondig: ‘Welkom aanboord. Nadat ons opgestyg het, sal ons ‘n wonderlike maaltyd bedien en alles in ons vermoë doen om jou vlug genotvol te maak. Ek moet egter noem dat ons geen bestemming het nie. Dis reg; ons gaan net aanhou vlieg totdat ons petrol opraak en ons in die oseaan neerstort.’ Maak nie saak hoe wonderlik die reis is nie, wat is die punt daarvan as ons geen bestemming het nie? God se Woord sê: ‘As ons egter op niks meer sou kon hoop as dat Christus ‘n verskil sal maak aan ons huidige lewe nie, sou ons definitief die bejammerenswaardigste mense onder die son wees!’ (1 Korintiërs 15:19 NLV). Dank Vader daar is meer! Dit word die hemel genoem, en dit is ‘verreweg die beste.’ As jy wonder wat ons gaan doen as ons daar aankom, sê die Bybel dat ons die Here sal dien (sien Openbaring 22:3). Jy gaan nie ‘n stralekrans, ‘n wollerige kleed en ‘n harp ontvang om vir ewig op ‘n wolk te sit nie. Nee, ons sal die Here in verskillende kapasiteite dien. Dink daaraan: geen middeljarige krisis nie, geen afskaling by die werk nie en geen uitbranding nie. Op aarde misluk ons en raak moeg en gefrustreerd. Nie in die hemel nie! Kan jy jou indink om die Een vir wie jy die liefste is, te dien, deur die ding te doen wat jy die meeste geniet, in ‘n liggaam wat vir ewig energie het? Dis die hemel! Die wonderlikste geluk sal wees om Jesus van aangesig tot aangesig te sien. ‘Maar omdat ek reg gedoen het, sal ek U sien. Wanneer ek wakker word, sal ek tevrede wees in U teenwoordigheid’ (Psalm 17:15 NLV).
Sielskos: Eks 30-32; Luk 14:15-24; Ps 106:24-48; Spr 7:3-5
2019-03-05
1 Korintiërs 3:9 AFR53
Die grootste positiewe faktor wat jy in jou werk kan hê, is die God-faktor. Paulus skryf: ‘Ons is medewerkers van God…’ Ons werk saam met God. ‘n Chirurg in ‘n groot stadshospitaal het die gewoonte gehad om op ‘n paar minute alleen aan te dring voordat hy ‘n operasie uitgevoer het. Hy het ‘n uitstekende reputasie gehad en een van die jong dokters wat saam met hom gewerk het, het gewonder of daar dalk ‘n verband tussen sy gewoonte om alleen tyd te spandeer en sy sukses kon wees. Hy het die chirurg daaroor uitgevra en hy het geantwoord: ‘Ja. Voor elke operasie vra ek die Groot Geneesheer om my hande in hulle werk te rig. Daar was al tye wat ek nie geweet het wat om volgende in ‘n operasie te doen nie en dan het die krag skielik aan gekom – krag wat ek weet van God af gekom het. Ek sou nooit poog om ‘n operasie sonder Sy hulp aan te pak nie.’ Die chirurg se woorde het vinnig deur die hospitaal en toe deur die land versprei. Een dag het ‘n pa sy dogter na die hospitaal gebring en daarop aangedring dat die enigste dokter wat aan haar kon raak, ‘die een wat saam met God werk,’ moes wees. Die Bybel sê: ‘Vertrou op die Here met alles wat jy het. Moenie staatmaak op jou eie insigte nie. Vra na die wil van God in alles wat jy doen. Hy sal die regte pad vir jou wys’ (Spreuke 3:5-6 NLV). Let wel op dat dit nie sê dat jy nie jou eie insigte moet gebruik nie – dit sê net dat jy nie daarop moet staatmaak nie. Maak eerder op God staat. Dit is die formule om sukses in jou werk te bereik.
Sielskos: Eks 28-29; Luk 14:1-14; Ps 106:1-23; Spr 7:1-2
2019-03-04
Jesaja 30:21 NLV
Hoeveel keer het iets binne-in jou jou aangepor om ‘n sekere ding te doen, maar jy het eerder toegelaat dat die stem in jou kop die stem in jou gees uitdoof? Daardie innerlike stem is jou geestelike intuïsie, die deel van jou waarmee God praat. Die Bybel sê: ‘Jy sal ‘n stem hoor sê: ‘Hier is die regte pad. Draai om en loop hierlangs.” Die apostel Johannes stel dit so: ‘Julle almal weet egter waaroor dit gaan, want julle dra die salwing van die Heilige Gees’ (1 Johannes 2:20 NLV). Leer om hierdie ‘salwing’ te vertrou, want dit sal jou aansê: a) wat jy moet doen; b) wanneer jy moet optree; c) watter rigting om in te slaan; c) watter veranderinge jy moet maak. Wat ‘n wonderlike gawe – en tog gebruik ons dit selde! Ons is bang dat ons onmoontlik iets kan weet sonder om dit te deurdink, of omdat dit te voor-die-hand-liggend lyk. Ons dink, ‘Dit kan nie reg wees nie. Ek kan dit onmoontlik doen.’ Ons stry namens ons beperkinge, wat ons dan beperk! Leer om jou geestelike intuïsie te herken en te vertrou. Dis jou konneksie met die grootste bron van wysheid in die heelal – God se wysheid. Moenie verras wees wanneer dit wat jy in jou gees hoor, klink soos dit wat jy reeds baie vantevore gedink het maar geïgnoreer het nie. Die Bybel sê: ‘Dis mos God wat julle gewillig maak om te doen waarvan Hy hou, en Hy gee julle ook die vermoë om dit te kán doen!’ (Filippense 2:13 NLV). Die volgende keer wat jou geestelike intuïsie jou aansê om iets te doen en dit in lyn met die Skrif is, moenie bang wees om daarvolgens op te tree nie!
Sielskos: Eks 25-27; Luk 13:18-35; Ps 136; Spr 6:30-35
