2019-03-15
Matteus 16:24 NLV
Oorgawe is nie dieselfde as passiwiteit nie. God se wil vir jou lewe behels dat jy kreatiwiteit moet uitoefen, besluite moet maak en inisiatief moet neem. Om oor te gee beteken nie dat jy ‘n deurmat is nie; dit beteken nie dat jy omstandighede fatalisties aanvaar nie. Dit beteken dikwels dat jy sal moet baklei om die status quo uit te daag. Dit beteken nie dat jy ophou om jou brein te gebruik, ophou vrae vra of ophou krities dink nie. Oorgawe is nie ‘n kruk vir swak mense wat nie die lewe kan hanteer nie. Oorgawe is eerder die blye en vrywillige erkenning dat daar ‘n God is. Sy doeleindes is wyser en beter as jou begeertes. Jesus kom nie om die buitekant van jou lewe te rangskik soos jy dit wil hê nie; Hy kom om die binnekant van jou lewe te rangskik soos God dit wil hê. Jy kom agter dat jy nie meer die middelpunt van die heelal is nie – jy plaas God daar. Jy bied gehoorsaamheid aan. Jy luister na Hom. Jy doen wat Hy sê. Jesus was baie duidelik oor hierdie punt: ‘Ek verseker julle, as ‘n graankorrel nie in die grond val en sterf nie, bly hy net op sy eie bestaan; maar as hy sterf, lewer hy baie vrug op’ (Johannes 12:24 NLV). Hoe lewe jy ‘n produktiewe en vrugbare lewe? Deur daagliks aan jouself te sterf. D.L. Moody het gesê dat die wêreld nog nie gesien het wat God met een persoon kan doen wat ten volle aan Hom oorgegee is nie. Kniel vandag en bid, ‘Here, neem my, skud my, breek my en maak my wat U wil hê ek moet wees.’ Dis ‘n gebed wat Hy sal beantwoord.
Sielskos: Job 15-17; Luk 17:20-37; Ps 19; Spr 8:6-7
2019-03-14
Galasiërs 2:20 NLV
John Calvin het oorgawe as volg gedefinieer: ‘Om geen ander wil en geen ander wysheid te hê nie, en om die Here te volg waar Hy ook al lei.’ Om dit te doen, moet jy jou grootste vrees oorkom: Wie sal jou lewe bestuur? Dis heel handig om Jesus in die passasiersitplek te hê wanneer ons sy hulp nodig het. ‘Here, ek het ‘n gesondheidsprobleem en ek het U hulp nodig. Iets is by die werk aan die gang en ek sal dit graag anders wil hê. Ek voel angstig en ek het U vrede nodig. Ek voel hartseer en het bietjie hoop nodig. Ek is besig om dood te gaan en ek wil seker maak ek gaan hemel toe.’ Wanneer dit egter daarby kom om die stuurwiel vir Jesus te gee en Hom toe te laat om te bestuur, is ons nie so seker daarvan nie, want dan is ons nie meer in beheer nie. As Hy bestuur, is jy byvoorbeeld nie meer in beheer van jou beursie nie. Jy kan dan nie sê: ‘Ek sal iets gee wanneer ek vrygewig voel, maar ek behou die reg om my beursie toe te hou’ nie. Nou is dit Jesus se geld. Wanneer jy Jesus laat bestuur, is jy nie meer in beheer van jou ego nie. Jy het nie meer die reg om elke selfgesentreerde ambisie te vervul nie. Dis nou sy lewe. Jy is nie meer in beheer van jou mond nie. Jy kan nie meer skinder, vlei, mooipraat, jok, vloek, woedend wees, kul, intimideer, manipuleer, oordryf of dubbelsinnig wees nie. Dis nie meer jou mond nie – dis sy mond. Hier is dus die vraag: Het jy Jesus net vir die rit saamgenooi, of bestuur Hy? Die woord vir jou vandag is: Gee oor aan God.
Sielskos: Job 11-14; Luk 17:11-19; Ps 11; Spr 8:4-5
2019-03-13
Markus 10:14 NLV
Kan jy dink hoe hierdie kinders gevoel het toe Jesus sy eie dissipels bestraf het omdat hulle hulle weggewys het? Hoeveel lewens is daardie dag verander omdat Hy hierdie kleintjies liefgehad en tyd vir hulle gemaak het? Hy het vir hulle iets gegee wat elke kind nodig het en verdien – selfwaarde en die waardigheid van hulle eie gedagtes en opinies. Wanneer jy na my luister, beteken dit dat dit wat ek sê, saak maak. Belangriker as dit nog, ek maak vir jou saak. Na jare se aanhoor van woorde soos, ‘Moenie my pla nie… Bly stil!… Ek het nie tyd nie,’ begin iets belangriks in ‘n kind doodgaan – kreatiwiteit en selfvertroue. Kan jy jou indink om die lewe sonder hierdie kwaliteite binne te gaan? Jy sê, ‘Maar ek is so besig.’ Dit mag dalk so wees, maar jy is verseker nie besiger as Jesus nie en Hy het tyd vir kinders gemaak. Ouer, luister jy? Vandag is ons tronke vol kinders wat volwasse misdade gepleeg het. Wanneer ons hulle bestudeer, vind ons oor die algemeen dat omdat hulle nooit geleer het om hulle emosies op ‘n konstruktiewe manier uit te druk nie, het hulle op die ou einde ontplof! As ‘n kind het hy sy hamer gevat en sy speelding in stukke geslaan; nou as ‘n man slaan hy sy vuis deur mure of slaan sy vrou. Sy hempsgrootte het verander, maar die boodskappe in sy kop is steeds dieselfde – niemand luister nie, niemand verstaan nie, niemand gee om nie. Hierdie is ernstige sake. As jy dink ons maak ‘n berg van ‘n molshoop – dink weer. Herrangskik die prioriteite in jou huis. Doen dit reg en jy sal wonderlike herinneringe hê. Doen dit verkeerd en jy sal met die spyt moet saamleef.
Sielskos: Job 8-10; Luk 17:1-10; Ps 115; Spr 8:1-3
2019-03-12
Jona 1:12 NLV
Toe Jona op ‘n skip geklim het wat in die teenoorgestelde rigting van God se wil gevaar het, het die bemanning ontdek dat daar ‘n hoë prys te betaal is wanneer jy die verkeerde persoon in jou lewe toelaat. God het jou nie die magtiging gegee om iemand anders se lewensondersteuningstelsel te wees nie. Veral as hulle besig is om van Hom weg te hardloop en jou gebruik om dit te doen! Met Jesus aan boord kan jy dit deur enige storm maak. Wanneer jy egter vir Jona aan boord toelaat, sal hy jou lewe omkeer en jy sal die risiko loop om alles te verloor. Dink jy regtig dat jy jou ‘Jona’ kan regruk? Nee. ‘Toe stuur die Here ‘n groot vis om Jona in te sluk…’ (Jona 1:17 NLV). Soms is die beste ding wat jy vir iemand kan doen om hom oor boord te gooi. So lank as wat jy aanhou om hom te red, staan jy in God se pad. Kyk na Jona – terwyl die bemanning desperaat besig was om goed oor boord te gooi, was hy besig om te slaap! Hy wou nie reggehelp word nie, hy wou gemaklik wees! Ken jy so iemand? Die rede hoekom hulle nie verander nie, is omdat hulle nie gereed is om te verander nie! Jona was so hardkoppig dat hy drie dae in die vis se maag deurgebring het, voor hy begin bid het. As dit jy was, sou jy die oomblik wat jy die vis gesien het begin bid het, nie waar nie? Dit mag dalk moeilik wees om aan te hoor, maar soms is die beste ding wat jy vir jou ‘Jona’ – en jouself – kan doen, om hulle oor boord te gooi en God hulle te laat red.
Sielskos: Job 5-7; Luk 16:19-31; Ps 26; Spr 7:26-27
2019-03-11
1 Johannes 3:5 NLV
Wanneer jy weier om jou sonde te konfronteer en dit te hanteer, word jy ‘n maklike teiken vir die vyand. ‘…as julle dink julle staan sterk, moet julle oppas dat julle nie ook tot ‘n val kom nie’ (1 Korintiërs 10:12 NLV). Jy het nooit gedink jy kan so kwaad word, of ‘n buite-egtelike verhouding hê, of vir jou baas jok, of iemand finansieel verkul nie. Omdat jy nooit gedink het dat jy dit kon doen nie, het jy niks gedoen om jou daarteen te beskerm nie. So seker as wat die visse swem en die voëls vlieg, sal jou sondige natuur jou mislei, tensy jy dit beslis en Skriftuurlik hanteer. Paulus het geskryf: ‘Inderdaad, omdat hulle geweier het om aan God die erkenning te gee wat Hy verdien, het Hy hulle oorgegee aan hulle skewe ingesteldheid. Gevolglik doen hulle allerlei onbehoorlike dinge’ (Romeine 1:28 NLV). Die ergste ding wat God kan doen is om jou aan jou eie vleeslike impulse oor te gee en te sê, ‘Doen wat jy wil!’ Dis wonderbaarlik hoe ons ons sonde met ander mense s’n vergelyk en tot die gevolgtrekking kom dat ons sonde nie so erg is nie. Die Bybel sê: ‘Ons het immers almal gesondig…’ (Romeine 3:23 NLV). As jy oor ‘n afgrond probeer spring, maak dit nie saak of jy die ander kant met ‘n sentimeter of ‘n kilometer mis nie, jy val ewe ver en land ewe hard. Daar is egter goeie nuus. ‘Julle weet tog dat Hy verskyn het om die sonde weg te neem…’ Vandag sal Jesus jou sonde vergewe en jou die krag gee om met ‘n berouvolle hart na Hom te kom en sy genade te ontvang.
Sielskos: Job 1-4; Luk 16:1-18; Ps 24; Spr 7:24-25
2019-03-10
Romeine 12:2 NLV
Soms bemark ons kultuur verkeerde inligting en halwe waarhede. Gevolglik kan ons dalk tot hierdie drie verkeerde gevolgtrekkings kom: 1) Daar is ‘n spesiale persoon daar buite wat my gelukkig sal maak. Net God kan dit doen! Mense wat seer het, maak net ander mense seer. ‘…Wat ook al in jou hart leef, bepaal wat jy sê’ (Lukas 6:45 NLV). 2) Wanneer ek ‘n sekere posisie beklee of ‘n sekere hoeveelheid geld bymekaar maak, sal ek gelukkig wees. Dis die ou ‘sodra-dit-gebeur’ mite, wat ‘n lewe van ontevredenheid teel (sien Lukas 12:15). 3) Ek kan dit nie help nie; dis maar net hoe ek is. Dis die ‘dis-nie-my-verantwoordelikheid-nie’ leuen, wat jou in jou spore sal stuit. As jy gelukkig wil wees, moet jy die verskonings waarmee jy vorendag kom om jou gedrag te regverdig, ondersoek. Hier is ‘n paar van hulle: ‘Ek’s nie die enigste een nie!’ Wat daarvan? As almal dit doen, beteken dit dat God dit nie ernstig opneem nie? ‘Ek sien nie die skade daarin nie.’ Wie het jou die outoriteit gegee om die reëls te maak en God te speel? ‘Ek sal dit net een keer probeer.’ So as jy dit net een keer probeer, beteken dit dat daar geen nagevolge sal wees nie? Wat is die leuens agter jou verskonings? Ondersoek hulle. Hulle hou jou in geestelike slawerny en moet ontbloot en verwyder word! Jy moet volgens die Bybel jou ‘denkpatrone vernuwe.’ Jesus het eenmaal gesê dat sodra jy die waarheid ken, jou ou geloofsisteme ontbloot sal word en jy vrygemaak sal word (sien Johannes 8:32). Dink net hoe wonderlik dit sal wees om vry te wees om alles te word wat God wil hê jy moet word! Is dit nie die moeite werd om na te streef nie?
Sielskos: Ps 51; Mark 8:34-38
