Die pad van druk

As jy vandag in jou lewe by ‘n kruispad staan, het jy twee opsies: 1) Draai links of regs. 2) Gaan vorentoe of terug. Daar is geen twyfel aan die pad wat God wil hê jy moet neem nie – vorentoe! As jy enigsins daaraan twyfel, lees en mediteer oor die volgende Skrifgedeeltes: ‘En al het jy met min begin, sal jy met baie eindig’ (Job 8:7 NLV). ‘…Hulle kragte sal vermeerder…’ (Psalm 84:8 NLV). ‘Die pad van die regverdiges is soos die lig met dagbreek. Dit word al helderder totdat die volle dag aanbreek’ (Spreuke 4:18 NLV). ‘Gee jou volle aandag aan hierdie sake. Werp jouself in jou werksaamhede sodat almal jou vordering kan sien’ (1 Timoteus 4:15 NLV). God sal vir jou die genade en krag gee om vorentoe te beweeg, maar verstaan mooi: Dis nie altyd ‘n maklike pad nie. Jesus het gesê: ‘Gaan die koninkryk deur die nou poort binne. Want wyd is die poort, en breed is die pad wat na ondergang lei, en daar is massas mense wat daar ingaan. Hoe bitterlik nou is die poort, en hoe smal is die pad na die lewe nie! Min is die mense wat dit kry!’ (Matteus 7:13-14 NLV). Jesus het hier sy beroemde bergrede gelewer, waar Hy verduidelik het hoe mens as inwoner van sy koninkryk veronderstel is om te lewe. Dis die verskil tussen die ‘baie’ en die ‘min.’ Die eerste groep kies die maklike pad, maar die tweede groep kies die pad van druk, omdat hulle besef dat hoe moeilik dit ook al mag wees, dit die karakter van Christus in ons vorm.

Sielskos: Gen 28:1-30:24; Matt 20:29-34; Ps 136:1-12; Spr 6:30-31