Kwaliteit en kwantiteit

Sommige mense sê dat dit nie saak maak hoe min tyd jy saam met jou kinders bestee nie, solank dit kwaliteittyd is. Die logika agter hierdie konsep maak egter nie heeltemal sin nie. Hoekom moet ons tussen kwaliteit en kwantiteit kies? Ons aanvaar nie hierdie geforseerde keuse in ander areas van ons lewens nie, hoekom is dit dus net van toepassing op ons kinders? Ons kan dit as volg illustreer.

Veronderstel jy sien al heeldag uit om by een van die beste restaurante in die stad te eet. Die kelner bring vir jou die spyskaart en jy bestel die duurste biefstuk daarop. Wanneer die maaltyd egter arriveer, sien jy ‘n klein stukkie vleis so groot soos ‘n vierkante sentimeter in die middel van jou bord lê. Wanneer jy oor die grootte van jou biefstuk kla, sê die kelner: ‘Ek weet dat die porsie klein is, maar dis die beste biefstuk wat geld kan koop. Jy sal nêrens anders ‘n beter happie vleis kry nie. In terme van die porsiegrootte, hoop ek jy verstaan dus dat dit nie die kwantiteit is wat tel nie, maar die kwaliteit.’

Jy sal daaroor kapsie maak; en met goeie rede. Hoekom? Omdat beide kwantiteit en kwaliteit in baie areas van ons lewens belangrik is, insluitend hoe ons tyd saam met ons kinders bestee. Hulle het ons tyd nodig, sowel as die beste wat ons daarvan het om aan hulle te gee. Die ‘kwaliteit versus kwantiteit’ argument mag dalk ‘n sleg vermomde rasionalisering wees om ons kinders nie een van die twee te gee nie. Die Bybel sê: ‘Kinders is ‘n gawe van die Here…’ Wanneer jy dus vir hulle tyd en aandag gee, verdien hulle die beste in beide kwantiteit en kwaliteit.

Sielskos: Jos 22-24; Joh 18:12-24; Ps 150; Spr 29:22-27