Moenie met dwase omgaan nie

Drie Hebreeuse woorde word gebruik om die woord ‘dwaas’ in Spreuke te definieer. 1) ‘Kesil.’ Dit verwys na ‘n hardkoppige persoon wat dink dat hy of sy het nie raad nodig nie. 2) ‘Ewil.’ Hierdie woord verwys na ‘n dikvellige persoon wat weier om na advies te luister. 3) ‘Nabal.’ Dit verwys na iemand wat sy of haar gebrek aan wysheid deur ‘n dwase leefstyl demonstreer. Die dwaas is dus ‘n hardkoppige, dikvellige mens wat die skool van wysheid druip. Hulle mag dalk intellektueel briljant en finansieel suksesvol wees en sosiaal bewonder word, maar hulle is moreel en geestelik bankrot. Salomo waarsku: ‘…Die dwase vernietig hulleself weens ‘n gebrek aan gesonde verstand’ (Spreuke 10:21 NLV). Net soos ‘n liggaam weens ‘n gebrek aan suurstof sal sterf, so sal ‘n man of vrou uiteindelik en vir ewig weens ‘n gebrek aan wysheid sterf. Salomo som dit vir ons so op: ‘Vermy ‘n dwase mens. By hom sal jy niks kan leer nie’ (Spreuke 14:7 NLV). Die boodskap is duidelik: Net ‘n dwaas hang saam met dwase uit! Wanneer jy dus ‘n vriendskap vorm, is hier ‘n paar vrae wat beantwoord moet word: Bring die ander persoon die beste of die slegste in jou na vore? Het hulle ‘n positiewe of ‘n negatiewe houding? Wat is die tipe vriende waarmee hulle omgaan? Is hulle by dinge betrokke wat jou waardes oortree? Oefen hulle selfbeheersing uit en beheer hulle hul humeur? Bring hulle jou nader aan God, of dryf hulle jou verder van Hom af weg?

Sielskos: Matt 16:13-23; Matt 26:69-75; Joh 21:15-19