Dryf jou vrees uit

2021-05-16
1 Johannes 4:18 AFR83

Jy sal verras wees om te weet hoeveel mense, selfs suksesvolle mense, elke dag met onuitgesproke vrese worstel. Miskien is jy een van hulle. Die Bybel sê: ‘Want God het ons nie ‘n gees van vreesagtigheid gegee nie, maar van krag en liefde en selfbeheersing’ (2 Timoteus 1:7 AFR53). As ons vrese dus nie van God af kom nie, waar kom hulle dan vandaan?

Van verskeie bronne af: 1) Die manier waarop jy geprogrammeer is in jou grootwordjare. 2) ‘n Daaglikse oordosis nuus, 90 persent daarvan wat negatief is. 3) Satan.

Die punt is, jou vrese kom nie van God af nie. Die eerste stap om jou vrese te oorkom, is om die ware bron daarvan vas te stel. God het jou ‘n magtige wapen gegee om hulle te oorwin: ‘…volmaakte liefde verdryf vrees …’ Jy sê: ‘Miskien as ek God volmaak lief gehad het, sou ek nie so bang gewees het nie.’ Nee, nou span jy die wa voor die perd in. Jy kan soveel probeer as wat jy wil, maar jy sal nooit God volmaak kan liefhê nie.

Daar is net een volmaakte liefde en dit is sy liefde vir jou. Dis onvoorwaardelik; gekoop en betaal deur Jesus Christus wat vir jou aan die kruis gesterf het. Wanneer jy ‘n openbaring van die onverdiende liefde, genade en guns wat God teenoor jou voel, ervaar, sal jy kan opstaan en alle vrees, angs, skuld, veroordeling en bekommernisse kan verdryf.

God se liefde vir jou is nie op jou optrede gebaseer nie, maar op Christus s’n. Wanneer jy jou vertroue in Christus se optrede, in plaas van jou eie, plaas, is jy God se kind (sien Efesiërs 1:5). Wanneer jy die versekering daarvan het, weet jy dat jy ook die mag het om al jou vrese te verdryf.

Sielskos: Eks 17:1-7; Joh 4:1-42

Hanteer vrees (7)

2021-03-21
2 Timoteus 1:7 ABA

Gedurende die Amerikaanse Revolusie, het Spanje beheer van die Bahamas oorgeneem. In April van 1783, het Andrew Deveaux, ‘n luitenant-kolonel van Suid Carolina, ‘n handjievol soldate bymekaar gemaak om Nassau met ‘n slim strategie terug te neem. Deveaux het net tweehonderd manne by hom gehad, ‘n baie kleiner mag as die Spanjaarde, maar tog het hy daarin geslaag om die eiland na ‘n kort skermutseling te verower.

Die Spanjaarde het toegekyk hoe bote manskappe na manskappe van Deveaux se skepe tot sy verdedigende posisie op die oewer geneem het. Wat die Spanjaarde egter nie geweet het nie, was dat dit dieselfde mans was wat heen en weer gegaan het deur op te staan wanneer hulle na die eiland toe geroei het en plat te lê in die boot wanneer die boot na die skip toe teruggekeer het. Die leier van die Spaanse troepe het ‘n nederlaag van ‘n baie groter mag gevrees en hulself dus oorgegee.

Wanneer jy aan vrees toegee, is jy reeds oorwonne. Mense wat deur vrees regeer word, bly waar dit veilig is. Dis hartseer, want jy kan nie jou volle potensiaal bereik deur te bly waar dit veilig is nie. Shakespeare het gesê: ‘Our doubts are traitors, and they make us lose what we oft might win, by fearing to attempt.’

Wat sou jy aangepak het as jy seker was dat jy nie kon misluk nie? Voor jy antwoord, lees eers hierdie woorde van Dawid: ‘Die dag dat ek U roep om hulp, val my vyande terug. Omdat God aan my kant is, weet ek dit beslis’ (Psalm 56:10 NLV). Glo dat God vandag aan jou kant is en pak dan die ding aan wat jy bang is om te doen! Jy sal nooit weer dieselfde wees nie – jy sal bevry wees!

Sielskos: 2 Kon 4:42-44; Mark 6:30-44

Hanteer vrees (6)

2021-03-20
Job 3:25 NLV

Fantaseer jy ooit oor oplossings vir probleme wat jy vrees moontlik oor jou pad sal kom? Ironies genoeg kan ongegronde vrese op so ‘n manier in ‘n ware vrees omskep word, omdat jy energie aan verkwistende denke in plaas van produktiewe aksie bestee.

Joe Tye, die skrywer van Never Fear, Never Quit, sê: ‘Wensdenkery is die slot wat vrees op die tronkdeur sit. Vrees laat jou toe om jouself elke nou en dan aan wensdenkery oor te gee. Jy dink dat daar iets, op ‘n manier, kan gebeur om jou probleme te laat weggaan. Teen die tyd wat jy wakker word, is dit egter te laat. Wat jy gevrees het, het gebeur en vrees het jou oorwin. Die enigste manier om uit die tronk van vrees te ontsnap, is aksie. Jy kan nie jou weg daaruit wens of wag nie. Jy kan net jou weg daaruit werk. Elke keer wat jy uit die tronk van vrees ontsnap, word jy sterker.’

Vrees het geen voordele of goeie gevolge nie. Dit druk jou óf in die verkeerde rigting deur senuagtige energie te produseer wat veroorsaak dat jy die slegste in nuwe situasies optree, óf dit tap jou energie soos jy die verlammende effek daarvan probeer beveg. Die sielkundige Randall B. Hamrock het opgemerk: ‘In die 20 jaar van my praktyk het ek met ten minste 10,000 jong mans en vrouens gepraat, getoets en professionele raad gegee. Een karaktereienskap wat amper almal van hulle gehad het, was die neiging om te min van hulself te dink.’

Moenie toelaat dat vrees jou potensiaal by jou steel nie. Moenie toelaat dat dit jou kleiner maak as wat jy regtig is nie. Vertrou God vir groot dinge en probeer dit dan in sy krag aanpak. As jy dit doen, sal jy sukses behaal. Dis gewaarborg.

Sielskos: Job 24-28; Matt 24:26-35; Ps 13; Spr 8:14-16

Hanteer vrees (5)

2021-03-19
Psalm 27:1 NLV

‘n Ou gesegde lui: ‘Vrees maak die wolf groter as wat hy is.’ Dit oordryf die probleem en gevolglik bestee jy waardevolle energie op onnodige emosies. Jy vermy soms byvoorbeeld dinge wat jou glad nie skade kan aandoen nie. Soos die man wat met krapmerke en kneusplekke na ‘n staptog by sy vakansiehuis aangekom het. ‘Wat het gebeur?’ het sy vrou gevra. ‘Ek het in ‘n slang op die voetpaadjie vasgeloop,’ het hy geantwoord. ‘Onthou jy dan nie,’ het sy vrou gesê,’ die toergids het ons gister gesê dat die slange hier rond nie giftig is nie?’ Haar man het geantwoord: ‘Hulle hoef nie giftig te wees as hulle jou by ‘n ses meter krans kan laat afspring nie!’ Duidelik was hierdie man se vrees – nie die slang nie – die probleem.

Charles Spurgeon het een maal gesê: ‘Angs neem nie die droewighede van môre weg nie, maar wel vandag se krag.’ Solank as wat jy vrees toelaat om in die bestuursitplek te sit, sal jy nooit gaan waarheen God jou wil neem nie, of die talente wat Hy in jou geplaas het ontdek en ontwikkel nie. God sal jou egter help om die vrese wat jou beheer, te konfronteer en te oorwin.

Dawid, die skrywer van Psalms en Israel se geliefde koning, het gereeld homself met sy rug teen die muur bevind. Tydens een so ‘n geleentheid het hy geskryf: ‘…Kom tog gou om my te help, Here, my redder’ (Psalm 38:22 NLV). ‘Asseblief, Here, red my tog! Kom gou, Here, en help my!’ (Psalm 40:14 NLV). Dawid het geweet na wie toe om te draai: ‘Die Here is my lig en my redding. Vir wie moet ek dan vrees?..’ Wanneer God jou bron van krag is, kan jy jou ergste vrese in die gesig staar en hulle oorkom.

Sielskos: Job 21-23; Matt 24:15-25; Ps 116:12-19; Spr 8:10-13

Hanteer vrees (4)

2021-03-18
Josua 3:13 ABA

Om die Beloofde Land binne te gaan, moes die Israeliete die Jordaanrivier, wat in vloed was, oorsteek. Was hulle bang? Sou jy nie ook gewees het nie? Nietemin, die enigste manier om hulle bestemming te bereik was om die presiese aksie te neem wat hulle gevrees het!

Wanneer jy vrees ‘n houvas gee, word jy meer vol vrees en skep jy op die ou einde ‘n aftakelende siklus wat as volg werk: Vrees veroorsaak ‘n gebrek aan aksie. ‘n Gebrek aan aksie veroorsaak ‘n gebrek aan ervaring. ‘n Gebrek aan ervaring veroorsaak onkunde. En onkunde veroorsaak vrees. Dit maak jou bang om die presiese aksie te neem wat vir jou tot voordeel sal wees. Om aksie te neem beteken dat jy in die onbekende en onbeproefde moet inbeweeg – wat vreesaanjaend kan wees.

As jy egter tot jou vrese toegee, sal jy nie vorentoe beweeg nie. Jy sal nie die voordeel van dit wat jy vermy, sowel as die ervaring wat jou lewe sal verbeter, ontvang nie. Gevolglik bly jy onkundig oor daardie area van die lewe en onkunde kweek altyd meer vrees, wat dit soveel moeiliker maak om deur te druk en dinge gedoen te kry.

Harry Truman het opgemerk: ‘Die grootste gevaar waar voor ons te staan kom, is om deur vertwyfelinge en vrese verlam te word. Hierdie gevaar word meegebring deur diegene wat geloof agterlaat en hoop minag, deur diegene wat sinisme versprei en ons probeer verblind vir ons groot kans om goed vir die mensdom te doen.’

Iemand het gesê dat vrees die donkerkamer is waar al ons negatiewe ontwikkel word. Dis rente wat jy vooruit op ‘n bedrag betaal wat jy dalk nooit mag skuld nie. Dit ondermyn ook geloof – in jouself, in ander mense en in God.

Sielskos: Job 18-20; Matt 24:1-14; Ps 116:1-11; Spr 8:8-9