God verbind die kolletjies

Een dag het ‘n sakeman sy vrou gebel om te sê dat hy ‘n oorsese besoeker vir aandete uitgenooi het. Sy vrou het drie kinders in die skool en een kleuter by die huis gehad, dus het sy ‘n vol werkslading gehad. Tog het sy ingestem en die maaltyd wat sy voorberei het, het heerlik gesmaak en was elegant voorgesit. Die oorsese gas, ‘n belangrike amptenaar van Spanje, het ‘n wonderlike tyd gehad en die paartjie herhaaldelik bedank dat hulle hom uitgenooi het en hom van ‘n tuisgemaakte ete en ‘n aand van familie-warmte en gemeenskap voorsien het.

Jare later het vriende van hierdie familie Spanje as sendelinge besoek. Hul werk is egter deur regeringsregulasies tot stilstand gedwing. Toe hierdie spesifieke Spaanse amptenaar kennis neem dat die sendelinge vriende is van die paartjie wat hom so gasvry onthaal het, het hy sy invloed gebruik om die regulasies namens hulle uit die weg te ruim. Gevolglik is ‘n lewendige en groeiende kerk in daardie provinsie van Spanje gebou en mense is vir Christus gewen. Hoekom? Omdat ‘n besige vrou en ma gewillig was om ‘n ekstra bord vir ‘n gas aan haar tafel te dek en omdat daardie gas ‘koninkrykskonneksies’ gehad het.

Soos ‘n wyse besigheidsman stel God die doelwit en bepaal dan die plan om dit te bereik. Hy sê vir ons in sy woord: ‘…Ek is God… Ek maak die einde bekend vanaf die begin. Uit die verlede, dit wat nog moet gebeur. Wat Ek besluit, voer Ek uit. Wat Ek wil, doen Ek’ (verse 9-10 NLV). Met ander woorde, God verbind die kolletjies.

Sielskos: 1 Tim 1-3; Joh 5:16-30; Ps 5; Spr 24:8-9