2026-07-07
Psalm 56:10 NLV
Iemand het een keer gevra hoe hy George Washington onder diegene wat by die Kongres teenwoordig was, sou kon herken. Hy is meegedeel: ‘Jy kan hom maklik onderskei wanneer die Kongres bid. Washington is die enigste een wat kniel.’ Washington was bekend as ‘n man wat gebid het. Toe die lot van Amerika by Valley Forge in die weegskaal gehang het, het hy gereeld rus en verligting in gebed gevind.
Eendag het ‘n boer wat verby Washington se militêre kamp op pad was, ‘n ernstige stem gehoor. Toe hy nader kom, het hy Washington op sy knieë gesien, sy wange nat van die trane. Die boer het teruggekeer huis toe en vir sy vrou gesê: ‘George Washington sal die geveg wen en die Amerikaners se onafhanklikheid verseker.’ Sy vrou het gevra: ‘Isak, wat laat jou so dink?’ Hy het geantwoord: ‘Ek het hom vandag in die bos hoor bid en die Here sal sekerlik sy gebed verhoor. Hy sal, Hannah, wees verseker, Hy sal!’
Wanneer ons minder het, is ons meer bewus van ons behoefte en bid ons meer. Soos ons egter meer verkry en bereik, word ons meer selfonderhoudend en bid ons minder. Dis ‘n fout. Hoe meer God aan jou toevertrou, hoe meer het jy sy krag, sy wysheid, sy leiding en sy genade nodig. Dawid het op ‘n troon gesit en oor Israel geregeer. Was hy trots of arrogant? Nee. ‘Die dag dat ek U roep om hulp, val my vyande terug. Omdat God aan my kant is, weet ek dit beslis… in God stel ek my vertroue. Daarom sal ek nie bang wees nie!..’ (verse 10, 12 NLV).
Die woord vir jou vandag is dus: meer verantwoordelikheid verg meer gebed.
Sielskos: 2 Sam 7:18-11:27; Matt 25:1-13; Ps 122; Spr 17:18-21
2026-07-06
Jakobus 4:2 NLV
Van die begin tot aan die einde van die Bybel vind ons klinkklare bewyse dat God gebede verhoor. Dinge wat ons dink onmoontlik is, doen God wanneer mense daarvoor bid! Wanneer ons bid, vereenselwig ons onsself met God se doeleindes en maak van die krag van die Almagtige gebruik. Omdat ons bid, werk God deur ons op maniere wat Hy andersins nie sou doen nie. God het sekere dinge van gebed afhanklik gemaak, dinge wat nooit sal plaasvind tensy ons bid nie. Kan God doen wat Hy wil, sonder dat ons daaroor bid? Natuurlik. God het egter bepaal dat Hy die gebede van sy mense sal gebruik om sy doeleindes te bereik.
Wanneer ons nie bid nie, beperk ons dit wat God in ons lewens sal doen. Dit mag dalk vreemd klink, maar as dit nie waar was nie, hoekom sou Jakobus dan geskryf het: ‘En eintlik is die rede hoekom julle nie het wat julle wil hê nie, die feit dat julle God nie daarvoor vra nie’? Waarom sou Paulus sy vriende vra: “…bid vir ons sodat die woord van die Here vinnig mag versprei en net soos by julle met eerbied ontvang word. Bid ook dat ons bewaar sal word van slegte en bose mense….’ (2 Tessalonisense 3:1-2 NLV), as hy nie geglo het dat gebede die krag het om sy omstandighede te verander nie?
Omdat beide Jakobus en Paulus al die seën wat vir hulle beskikbaar was wou hê, het hulle nie net self gebid nie, maar ook ander gelowiges gewerf om vir hulle te bid. Hulle wou nooit dit wat God in en deur hulle wil doen beperk deur nie te bid nie. Indien jy al die seën wat God beskikbaar stel wil hê, moet jy ook bid.
Sielskos: 2 Sam 3:22-7:17; Matt 24:36-51; Ps 110; Spr 17:15-17
2026-07-05
Psalm 127:2 NLV
In die Westerse kultuur dink ons dat ‘n dag begin wanneer die son opkom. Die Bybel sê egter: ‘…Dit het aand geword en dit het môre geword. Dit was die eerste dag’ (Genesis 1:5 AFR53). Elke dag begin met die aand. Die skrywer, Eugene Peterson, het opgemerk dat die Bybel op hierdie manier ons help om te onthou: ‘Alles hang nie van my af nie. Ek gaan slaap; God gaan werk. Dis sy dag. Die wêreld hou aan draai, die getye eb en vloei en lewens begin en eindig, selfs al is ek nie daar om enige iets daarvan te bewaak nie. God is teenwoordig wanneer ek slaap.’ Dus het die Psalmdigter geskryf: ‘Tevergeefs werk jy so hard, van vroegoggend tot laatnag, soos jy swoeg om te bestaan, maar vir hulle wat Hy liefhet, gee Hy dit in hulle slaap’ (Psalm 127:2 NLV).
Daar word beraam dat daar in Amerika 24 000 mense jaarliks in motorongelukke, wat deur slaapgebrek en moegheid veroorsaak word, sterf. Gebrek aan slaap veroorsaak dat mense met hul eggenote en vriende stry, minder goeie werk lewer, minder liefdevol en meer geïrriteerd met kinders en geliefdes is en oor die algemeen ellendig voel.
Hoe kan jy dus ‘n ‘goeie dag’ hê? Voordat jy gaan slaap, neem ‘n paar minute om jou dag met God te hersien. Probeer om enige huishoudelike konflikte voor slaaptyd op te los. Paulus het geskryf: ‘…Moenie tot die aand toe kwaad bly, en die duiwel so ‘n houvas gee nie’ (Efesiërs 4:26-27 NLV). Bely enige sonde wat by jou opkom en vra vergifnis daarvoor. Neem die tyd om aan die oomblikke wat jy seën ervaar het, te dink en daarvoor dankie te sê. Gee God met ander woorde die laaste sê in jou dag.
Sielskos: Matt 5:8; Ps 51:10; Tit 1:15
2026-07-04
Jakobus 5:8 NLV
Geduld, vanuit ‘n Bybelse perspektief, behels die volgende vier dinge:
1) Vertroue in God se onfeilbare liefde en getrouheid teenoor ons: ‘…Sy liefde het geen einde nie. Op u ontferming kan ‘n mens altyd vertrou. Dit is elke oggend nuut’ (Klaagliedere 3:22-23 NLV).
2) Vertroue dat Hy sy beloftes aan ons sal nakom: ‘Loof die Here… Nie een woord van al die goeie beloftes… het onvervuld gebly nie’ (1 Konings 8:56 NLV).
3) Vertroue dat Hy alles wat betrekking op ons het, onder beheer het: ‘Die Here sal vir my alles goed laat afloop…’ (Psalm 138:8 AFR83).
4) Vertroue dat Hy selfs in die moeilikste omstandighede, alles ten goede vir ons sal laat uitwerk: ‘En ons weet dat God alles ten goede laat saamwerk vir hulle wat Hom liefhet…’ (Romeine 8:28 NLV).
Vertroue in God stel ons in staat om volgens die Woord te leef. Ongeduld is die bron van soveel van ons mislukkings. Daarom het die apostel Jakobus geskryf: ‘Net so moet julle geduldig wees. En skep moed, want die koms van die Here is naby.’
Kyk na Moses: sy ongeduld het veroorsaak dat hy die rots geslaan het in plaas daarvan om daarmee te praat soos God beveel het; daarom het hy die Beloofde Land nie binnegegaan nie (sien Numeri 20:1-13). Kyk na Abraham: sy ongeduld terwyl hy gewag het vir God se belofte van ‘n seun om vervul te word, het tot die geboorte van Ismael en ernstige probleme in sy gesin, gelei (sien Genesis 16:1-16).
Daarom het Paulus geskryf: ‘Ons moet leer uit wat al lank gelede reeds in die Skrif opgeteken is. Die standvastigheid en die bemoediging wat die Skrif aan ons gee, help ons om aan ons toekomsverwagting te bly vashou’ (Romeine 15:4 NLV). Die woord vir jou vandag is dus – beoefen geduld!
Sielskos: 2 Sam 1:1-3:21; Matt 24:26-35; Ps 102:18-28;Spr 17:11-14
2026-07-03
Amos 3:3 NLV
Hier is drie dinge waaroor jy duidelikheid moet hê voordat jy jou tot ‘n lewenslange verhouding in die huwelik verbind:
1) Het jou maat ‘n sterk verhouding met Christus? ‘Sal twee mense saam op reis gaan sonder om eers af te spreek om dit te doen?’ (Amos 3:3 NLV). Om ‘n suksesvolle huwelik te hê, moet julle in pas en in dieselfde rigting loop.
2) Groei jou maat geestelik? ‘Sorg liewer dat julle steeds groei in die onverdiende goedheid en kennis van ons Here en Verlosser, Jesus Christus…’ (2 Petrus 3:18 NLV). As julle nie saam groei nie, sal julle uiteindelik uitmekaar groei. ‘n Gedeelde geloof en waardes sal julle vir die langtermyn bymekaar hou.
3) Watter soort gesinsagtergrond het jou maat? God kan ons help om ons probleme en gewoontes wat deur disfunksie in ons gesinne veroorsaak is, te oorkom. Julle moet egter weet waarmee julle te doen het, voordat julle ‘n belofte aflê om mekaar in goeie en slegte tye lief te hê. Paulus het geskryf: ‘Dra mekaar se laste, en gee op dié manier uitvoering aan die wet van Christus’ (Galasiërs 6:2 AFR83).
Jy moet egter vooraf weet wat daardie laste is, voordat jy jou daartoe verbind om hulle ‘n leeftyd lank te deel. ‘Daarom – iemand wat één is met Christus, is ‘n nuwe skepping. Die ou dinge is verby, kyk, die nuwe is hier!’ (2 Korintiërs 5:17 NLV). Dit beteken egter nie dat jy die verlede kan toesmeer of daaroor kan lieg nie. Wedersydse deursigtigheid is van uiterste belang. Wanneer julle die volle waarheid oor mekaar ken, verloor die verlede sy krag om julle hede en toekoms te saboteer. Geen eggenoot is perfek nie, maar moenie met minder as God se beste tevrede wees nie.
Sielskos: 1 Sam 27-31; Matt 24:15-25; Ps 102:12-17; Spr 17:7-10
2026-07-02
Psalm 73:26 NLV
Sommige van die wêreld se grootste presteerders het met fisiese gestremdhede deur die lewe gegaan en ongelooflike teenspoed oorgekom. Sir Walter Scott was kreupel. John Bunyan, skrywer van The Pilgrim’s Progress, is gevange geneem. George Washington, Amerika se eerste president, het amper in die sneeu by Valley Forge verkluim en van die honger omgekom. Abraham Lincoln het slawerny in Amerika beëindig, maar hy het in uiterste armoede grootgeword en het voortydig in ‘n sluipmoord gesterf. Die Britse Eerste Minister Benjamin Disraeli is aan bittere godsdienstige vooroordeel onderwerp. Franklin D. Roosevelt het polio opgedoen. Ludwig van Beethoven het doof geword.
Glen Cunningham, ‘n Olimpiese naelloper wat baie wêreldrekords hou, se bene is erg tydens ‘n brand beseer. Booker T. Washington, Harriet Tubman, Marion Anderson en George Washington Carver is in ‘n samelewing vol rassediskriminasie gebore. Enrico Caruso was lid van ‘n groot, arm Italiaanse gesin waar slegs ‘n paar kinders hulle babajare oorleef het. Itzhak Perlman, konsertviolis, is op vierjarige ouderdom van sy middel af verlam.
Dawid se pa en familie het hom nie waardig geag om Saul as Israel se koning op te volg nie. Die samelewing sou hom sekerlik as gevolg van sy owerspel met Batseba verwerp het. Tog het God na hom as ‘…’n man na my hart…’ (Handelinge 13:22 NLV), verwys. Dawid het die volgende van God gesê: ‘My liggaam en my hart kan kwyn, maar God is my blywende krag en my erfdeel vir altyd… Ek het geskuil by die Here my God…’ (verse 26, 28 NLV). Die woord vir jou vandag is dus: met God se hulp sal jy sukses behaal.
Sielskos: 1 Sam 24-26; Matt 24:1-14; Ps 102:1-11; Spr 17:4-6
