2018-04-03
Efesiërs 2:10 NLV
Die Bybel sê God het ons ‘…só gemaak dat ons die goeie werke wat Hy vir ons bestem het, kan uitlewe.’ Ons lewe in ‘n verwoestende tyd. ‘n Biljoen mense ly honger, miljoene word as slawe verkoop en pandemiese siektes wis hele nasies uit. Elke jaar word amper twee miljoen kinders in die globale sekshandelbesigheid uitgebuit. In die paar minute wat dit jou neem om vandag se dagstukkie te lees, het amper negentig kinders aan voorkombare siektes gesterf. Meer as die helfte van die mense in Afrika het nie toegang tot moderne gesondheidsfasiliteite nie. Gevolglik sterf tien miljoen elke jaar as gevolg van diarree, longkwale, malaria en masels. Baie van hierdie sterftes kon deur een inspuiting voorkom gewees het. Jy vra, ‘Wat kan ek daaraan doen?’ God beantwoord gebede, dus kan jy bid vir diegene wat ly. Jy kan gee, of dit nou min of baie is. Jy kan ook vrywillige werk doen. Jy word deur wonderlike organisasies omring wat na die behoeftes van mense omsien. Jy moet betrokke raak, want jou lewe snel verby en as jy nie versigtig is nie, sal jy een dag opkyk en jou een kans op ‘n sinvolle lewe sal verby wees. Sommige mense bemoei hulle nie met sulke gedagtes nie. Hulle beweeg deur hulle dae sonder om hulle oë op te lig en te kyk. Hulle lewe en sterf en vra nooit hoekom nie. As jy wil hê dat jou lewe moet saakmaak, lewe dit op so ‘n manier dat die wêreld oor jou bly sal wees. Jy is geskep en verlos sodat jy ‘…die goeie werke wat Hy vir [jou] bestem het, kan uitlewe.’ Wanneer jy eendag voor God staan, sal Hy jou vra hoe goed jy jou opdrag uitgevoer het en jou daarvolgens beloon.
Sielskos: Jer 18-21; Matt 28:16-20; Ps 69:19-36; Spr 8:30-31
2018-04-02
Deuteronomium 6:6-7 ABA
Dis nie maklik om ‘n Christen-ouer te wees in ‘n wêreld waar groepsdruk voel of dit jou plat druk nie; waar waardes nie meer saakmaak en waar sedeloosheid hoogty vier nie. Met God se hulp kan jy dit egter doen! Om jou kinders na Christus toe te lei, doen die volgende vyf dinge: 1) Begin wanneer hulle klein is en lees elke aand vir hulle Bybelstories voor. Laat hulle toe om te hoor hoe jy bid dat hulle Jesus persoonlik sal ken en hoe jy Hom aanhoudend bedank dat Hy vir hulle sondes gesterf het. 2) Wanneer jy hulle kerk toe neem, verduidelik aan hulle wat die verskeie rituele en seisoene (die Doop, die Laaste Avondmaal, Paasfees en Kersfees) verteenwoordig en hoekom hulle gevier word. 3) Wees sensitief oor elke geestelike vraag wat hulle vra en neem die tyd om hulle vrae op so ‘n manier te antwoord dat hulle dit sal verstaan. 4) Koop vir hulle Christelike DVD’s en strokiesprente wat die Bybelse waarhede op hulle vlak aan hulle kan verduidelik. 5) Vertrou dat die Heilige Gees jou wysheid op die regte tyd sal gee om die evangelie aan hulle te verduidelik; en bid konstant vir hulle verlossing. Op een geleentheid het D.L. Moody verslag gelewer oor ‘twee-en-‘n-half’ bekerings wat tydens een van sy dienste plaasgevind het. Iemand het opgemerk, ‘Ek veronderstel jy bedoel twee volwassenes en een kind.’ ‘Nee,’ het Moody geantwoord. ‘Ek bedoel twee kinders en een volwassene. Die kinders kan hulle hele lewe aan God gee, maar die volwassene het net ‘n halwe lewe om te gee.’ Onthou, die dinge wat ons die beste leer is die dinge wat ons die meeste hoor. Dus: ‘Julle moet die dinge onthou wat ek vandag vir julle sê en julle moet dit vir julle kinders leer…’
Sielskos: Jer 14-17; Matt 28:11-15; Ps 69:1-18; Spr 8:27-29
2018-04-01
Romeine 4:25 NLV
Die Groot Houdini het belowe dat hy uit die dood sal terugkeer en met sy vriende sal praat. Sommige van hulle het selfs mediums opgesoek om te hoor of daar enige woord vanuit die graf was. Daar was egter nie! Net een man wat belowe het om uit die dood op te staan, het sy belofte gehou – Jesus! Hy het dit gedoen ‘…sodat ons vrygespreek kan word’. Saketransaksies in die Bybelse tyd was relatief eenvoudig, sodra die verkoper die prys neergelê het en die koper dit aanvaar het, is die transaksie beklink. Op Goeie Vrydag het Jesus die prys neergelê en op Paassondag het God dit aanvaar; en sodoende is jou verlossing ten volle betaal. Die grootste bewys van die opstanding word egter in die getransformeerde lewens van mense regoor die aarde gevind. In een van sy finale verskynings in die boek Openbaring, het Jesus aangekonding: ‘…Ek is die Eerste en die Laaste, die Lewende. Ek was dood en kyk, nou leef Ek vir altyd… Elkeen wat lewe en in My glo, sal in alle ewigheid nooit sterf nie…’ (Openbaring 1:18 NLV, Johannes 11:26 NLV). Vandag staan Christus voor die deur van jou hart en klop en sê, ‘…As jy my stem herken en die deur oopmaak, sal Ek na jou toe ingaan…’ (Openbaring 3:20 NLV). Tensy jy Christus persoonlik as jou Verlosser ken, is jy sonder hoop in hierdie wêreld en die een wat nog gaan kom. Die opstanding van Christus is jou enigste hoop. Daarsonder het jy niks om na uit te sien nie, behalwe na ‘n gat in die grond. Bely dus vandag jou sondes en plaas jou vertroue in die Een wat dood was en weer vir jou opgestaan het.
Sielskos: 1 Kor 15; Matt 28:1-10; Luk 24:1-12
2018-03-31
Johannes 2:19 NLV
Kom ons ondersoek nog ‘n teorie wat deur diegene voorgestel word wat die waarheid van Christus se liggaamlike opstanding probeer weerlê: die ‘Beswymingsteorie.’ In sy boek, The Passover Plot, bespiegel Hugh J. Schonfield dat Jesus net in ‘n beswyming gegaan het en toe van die kruis afgehaal is omdat mense gedink het Hy is dood. In die koelte van die graf het Hy egter toe weer bygekom, opgestaan en sy dissipels oortuig dat Hy uit die dood opgestaan het. Daar is egter gapings in hierdie teorie. Hoekom, byvoorbeeld, het geen vriende of vyande vir agtien honderd jaar voor hierdie teorie bekend gemaak is, dit ooit genoem nie? Wat van die Romeinse soldaat wat Jesus se sy met ‘n spies gesteek het en toe het daar bloed en water uitgekom – empiriese bewys dat daar nie meer lewe was nie omdat die bloed in sy samestellende komponente geskei het? En wat van die getuienis van die soldaat wat deur Pilatus gestuur is: ‘n man wat elke dag met die dood te doen gehad het; wie se werk as laksman dit was om te weet dat Jesus dood is? Dan is daar die vraag van die grafskleed. Jode het gewoonlik dooie liggame in ‘n grafskleed toegedraai en honderde kilogramme se kruie tussen die voue daarvan geplaas, voordat die kleed om die liggaam geseël is. Die kop is ook toegedraai. Hoe kon Jesus asemgehaal het? Hoe kon ‘n man in so ‘n verswakte toestand die groot klip wat sy graf verseël het weggerol het en die Romeinse wagte oorrompel het? Dit neem meer geloof om dit te glo as om die waarheid van wat regtig gebeur het, te glo! Christus het opgestaan!
Sielskos: Eks 12:1-14; Matt 27:57-66; Ps 49:1-15; Deut 21:22-23
2018-03-30
1 Tessalonisense 4:14 NLV
Kom ons kyk na sommige van die teorieë deur diegene wat die opstanding ontken. Sommige sê dat omdat die evangelies twee of driehonderd jaar na die gebeure geskryf is, is die verhaal óf vervals óf oordryf. Argeologie weerlê dit egter. Ons weet dat die evangelies teruggelei kan word na die skrywers daarvan en dat die getuienis van die opstanding teruggelei kan word na die dekade waarin dit plaasgevind het. Daar was dus nie tyd vir ‘n legende om te ontwikkel nie! Sommige sê dat die dissipels visioene of hallusinasies ervaar het omdat Christus beloof het om uit die dood uit op te staan en hulle ten volle van Hom verwag het om dit te doen. In die geskiedenis van hallusinasies is daar egter geen insident waar vyfhonderd mense uit verskillende agtergronde dieselfde visioen op dieselfde tyd gesien het nie. Wat van die twee dissipels wat op pad na Emmaus met Jesus na sy opstanding, geloop en praat het en toe saam met Hom geëet het (sien Lukas 24:13)? Het hulle ook gehallusineer? Toe Petrus op Pinkster oor sy ‘groot hallusinasie’ gepraat het, was hy net tien minute weg van die graf af (sien Handelinge 2:24). Duisende mense het geglo; ander het dit gehoor en nie geglo nie. Het niemand daaraan gedink om net by die straat af te stap en te gaan kyk nie? Die Sadduseërs wat so saamgesweer het sou sekerlik elke geleentheid aangegryp het om te bewys dat dit ‘n hallusinasie was. Langs kuslyne is daar ligtorings wat skyn en voëls wat deur die lig aangetrek word, vlieg in hulle vas en word verwond of gaan dood. Dit laat ons aan die kritici van Christus se opstanding dink, nie waar nie?
Sielskos: Gen 22:1-18; Matt 27:33-56; Ps 22; Jes 53
2018-03-29
1 Korintiërs 15:10 NLV
Ons almal het goeie rolmodelle nodig. Wanneer jy egter jou lewe daaraan wy om soos iemand anders te wees, loop jy die risiko om iets te word wat God nie wil hê jy moet wees nie. Onthou altyd dat jou ‘helde’ ook met blinde kolle en karakterfoute sukkel. Paulus het gesê, ‘Ek is werklikwaar die geringste van al die apostels, een wat die naam van ‘n apostel nie werd is nie omdat ek God se kerk vervolg het’ (vers 9 NLV). Dieselfde met Petrus: Toe Kornelius hom laat roep het, lees ons dat ‘Toe Petrus die huis inkom, het Kornelius voor sy voete neergeval en hom begin aanbid. Maar Petrus het hom opgehelp en gesê: “Staan op! Ek is ‘n mens net soos jy!'” (Handelinge 10:25-26 NLV). As jy suksesvol in die lewe is, moet jy dieselfde houding inneem. Die gevaar van heldeverering kom wanneer jy jou individualiteit prysgee en die pad verloor wat God vir jou persoonlik beplan het. Sommige van die lesse wat God ons leer mag dalk dieselfde wees, maar ‘n ander persoon se roeping, gawes, reis en tydsraamwerk sal van joune verskil. ‘n Vriend begin byvoorbeeld ‘n besigheid en maak geld, maar wanneer jy jou werk bedank en in sy voetspore volg, speel jy bankrot. ‘n Kollega dra dalk iets wat wonderlik aan haar lyk, maar aan jou lyk dieselfde uitrusting soos ‘n meelsak. God is ‘jaloers’ wat jou betref (sien Deuteronomium 4:24). Hoekom? Omdat Hy jou van enigiets wat jou uniekheid kan steel of jou verhouding met Hom kan bedreig, wil beskerm. Die punt is: As jy op veilige grond wil beweeg, maak Jesus jou rolmodel, en jy sal elke keer wen.
Sielskos: Jer 10-13; Matt 27:27-32; Ps 38:13-22; Spr 8:24-26
