2018-05-08
Romeine 8:33 NLV
Paulus skryf: ‘Wie sal dit waag om ons aan te kla as God ons spesiaal uitgekies het? God is immers die Een wat ons vryspreek. Wie sal ons veroordeel? Christus Jesus is tog die Een wat vir ons gesterf het, wat boonop opgestaan het, wat op die ereplek langs God sit en wat daar vir ons pleit’ (verse 33-34 NLV). Satan se aanklagte sputter en val soos ‘n ballon wat afblaas. Hoekom hoor ons hulle dan nog? Hoekom voel ons as Christene steeds skuldig? Nie alle skuldgevoelens is sleg nie. God gebruik toepaslike dosisse skuld om sonde vir ons uit te wys. Ons weet dat skuldgevoelens van God af kom wanneer dit ‘…die verantwoording, dringendheid om reg te maak, ontsag… en erns om die oortreder te straf…’ (2 Korintiërs 7:11 NLV) meebring. God se skuldgevoelens bring net genoeg spyt mee om ons te verander. Satan se skuldgevoelens bring genoeg spyt mee om ons tot slaaf te maak. Moenie dat hy sy boeie om jou sluit nie! Onthou: ‘…julle lewe is saam met [Christus] veilig by God weggesteek’ (Kolossense 3:3 NLV). Wanneer God na jou kyk, sien Hy eerste vir Jesus. In Chinees is die woord vir geregverdig ‘n kombinasie van twee karakters: die figuur van ‘n lam en ‘n persoon. Die lam is bo-op en bedek die persoon. Wanneer God na jou kyk, is dit wat Hy sien: die perfekte Lam van God wat jou bedek. Net een keer in die Skrif word melding gemaak dat Jesus iets skryf. Hy skryf in die sand om vir die aangeklaagde sondaar wat Hy pas vergewe het, te sê, ‘…Ook Ek veroordeel jou nie. Gaan maar, en moet van nou af nie meer sonde doen nie’ (sien Johannes 8:10-11). Die woord vir jou vandag is dus: Vertrou jou voorstaander, nie jou aanklaer nie!
Sielskos: Deut 14-17; Mark 7:1-13; Ps 37:25-31; Spr 12:1-3
2018-05-07
Openbaring 12:10 NLV
Die apostel Johannes het geskryf: “Toe het ek ‘n kragtige stem in die hemel hoor sê: ‘…Die aanklaer van ons medegelowiges is neergewerp, hy wat hulle dag en nag voor ons God aangekla het'” (vers 10 NLV). Satan het net een doel: ‘Die dief kom vir niks anders nie as om te steel, dood te maak en te vernietig…’ (Johannes 10:10 NLV). Hy sal jou vrede steel, jou drome vernietig en jou toekoms verwoes. Hy neem mense in diens om sy gif te smokkel. Vriende onthou jou verlede. Predikers verkonding alle skuld en geen genade nie. Sommige ouers versprei dit vier-en-twintig uur ‘n dag. Lank reeds in volwassenheid hoor jy nog hulle stemme: ‘Hoekom kan jy nie groot word nie?’ ‘Wanneer gaan jy my begin trots maak?’ Wat is die antwoord? Jesus! Hy ‘… het nou die heel belangrikste posisie in die hemel. Daarom kan Hy nou ons saak by God suksesvol verdedig’ (Romeine 8:34 DB). In die teenwoordigheid van God, in uitdaging van Satan, staan Jesus Christus in verdediging van jou op. Hy neem die rol van ‘n priester aan. ‘Wat meer is, ons het ‘n groot priester wat toesig hou oor die huis van God. Kom ons gaan dan die heiligheid binne, ja, tot voor God, met ‘n opregte hart en absolute vertroue, terwyl ons harte gesuiwer is van ‘n skuldige gewete…’ (Hebreërs 10:21-22 NLV). ‘n Skoon gewete. ‘n Skoon hart. Vry van beskuldiging – vry van veroordeling. Nie net van ons foute in die verlede nie, maar ook van ons toekomstige foute. ‘Juis daarom kan Hy ons saak by God regmaak wanneer ons deur Hom na God toe gaan. Hy sal altyd daar wees om ons saak by God te stel, want Hy leef vir altyd’ (Hebreërs 7:25 DB). Moet dus nie na jou aanklaer luister nie – vertrou jou voorstaander!
Sielskos: Deut 11-13; Mark 6:45-56; Ps 37:16-24; Spr 11:30-31
2018-05-06
Jesaja 30:29 NLV
Hoekom sê die Bybel, ‘Prys die Here! Want dis goed om ons God te prys…’ (Psalm 147:1 NLV)? Omdat wanneer jy die beloftes van God se Woord in sang uitdruk, word jou geloof versterk. Die Groot Depressie in die 1930’s het ‘n man genaamd JC Penney hard getref en inderwaarheid sy gesondheid in gevaar gestel. Angstig en desperaat as gevolg van massiewe finansiële verliese, het Penney so laag gesink dat hy gevoel het hy het niks meer om voor te lewe nie. Selfs sy familie en vriende het hom vermy. Een nag in die hospitaal, het hy so ontmoedig gevoel dat hy verwag het dat hy voor die einde van die aand sou sterf! Toe het hy ‘n gesingery uit die hospitaal se kapel gehoor. Die woorde van die lied was: ‘Be not dismayed whate’er betide, God will take care of you. Beneath his wings of love abide, God will take care of you.’ Hy het die kapel binnegegaan en na die lied, die Skriflesing en gebed geluister. Hy het geskryf: ‘Skielik het iets gebeur. Ek kan dit nie verduidelik nie. Ek kan dit net ‘n wonderwerk noem. Dit het gevoel asof ek uit die diepste donkerte opgelig is in warm, wonderlike sonlig.’ Van daardie dag af is JC Penney nooit weer deur kommer gepla nie. Hy beskryf daardie oomblikke in die kapel as ‘die mees dramatiese en glorieryke twintig minute van my lewe.’ Toe hy op die ouderdom van vyf-en-negentig oorlede is, het hy 1,660 afdelingswinkels met sy naam daarop agtergelaat. Wanneer niks anders werk nie, kan lofprysing tot God op die maat van ‘n wysie jou uit ‘n geestelike gat lig. Dis hoekom die Bybel sê, ‘…dis goed om ons God te prys.’ Probeer dit en sien self – dit werk!
Sielskos: Gal 5:22; Luke 6:27-36; Eks 23:1-9; Rom 12:14-21
2018-05-05
Prediker 12:13 NLV
In die boek Prediker, praat Salomo van al die dinge wat hy in die lewe probeer het en teleurstellend gevind het: die intellektuele najaging van kennis, die fisiese najaging van plesier en die materiële najaging van rykdom. In die laaste hoofstuk van Prediker kom hy tot die gevolgtrekking: ‘Alles is sinloos…’ (vers 8 NLV). Met ander woorde: ‘Was daar, het dit gesien, het dit gedoen en alles is maar net ewe teleurstellend.’ Met die laaste skrywe van sy goddelik geïnspireerde gedagtes, sluit hy sy lewensboodskap met die volgende woorde af: ‘…dit [is] die finale slotsom…’ Salomo is op die punt om sy evaluasie van ‘n lewe wat goed geleef is, te gee! Wat is dit? ‘…Wees eerbiedig teenoor God en gehoorsaam sy gebooie. Dit word van alle mense gevra. Want God gaan elke daad beoordeel…’ (verse 13-14 NLV). Om eerbiedig teenoor God te wees beteken dat jy Hom sal eer, liefhê en dien, en om jou lewe volgens die voorskrifte in sy Woord te lei. John Mason skryf: ‘Word jou doelwit deur meer geld, groter invloed of ‘n hoër posisie beïnvloed? Dit is nie doelwitte nie; dit is byprodukte van ware doelwitte. Strewe nie na sukses nie, maar na die waarheid en jy sal beide vind. Werk om te word, nie om te besit nie. Meet rykdom aan die dinge wat jy het wat jy nie vir enige geld sal ruil nie.’ Wanneer jy elke oggend wakker word, bid hierdie eenvoudige gebed: ‘Here, help my om bo alles hierdie dag te spandeer deur U lief te hê en u wil uit te voer. In Jesus se naam bid ek dit. Amen.’
Sielskos: Deut 8-10; Mark 6:30-44; Ps 37:8-15; Spr 11:27-29
2018-05-04
1 Kronieke 4:10 NLV
Nie net het Jabes groot ambisie gehad nie, hy het ook ‘n groeiende geloof en ‘n diepe vertroue in God gehad. Hy het genoeg geloof gehad om te bid en ‘n antwoord te verwag. Hy was soos die sendeling William Carey wat gesê het, ‘Verwag groot dinge van God en probeer groot dinge vir God.’ Daar word nie genoem dat Jabes enige spesiale vaardighede of talente gehad het nie. Die Bybel sê nie dat hy ryk of opgevoed was nie. Hy was eenvoudig ‘n gewone man met ‘n ongewone geloof. Moenie bekommerd wees oor dit wat jy nie het nie – mits jy geloof het! God sal aan jou die nodige krag voorsien. Hy is lief daarvoor om gewone mense wat gewillig is om Hom te vertrou te gebruik en te sien hoe hulle sukses behaal. Baie mense met groot talente sit op die kantlyn terwyl gewone mense met geloof die doele skop en wen. Nog ‘n interessante feit is dat Jabes glo een of ander tipe gestremdheid of agterstand gehad het. ‘Jabes’ beteken ‘pynlik’ in Hebreeus. Jabes het sy ma soveel moeilikheid tydens geboorte gegee dat sy hom ‘Pynlik’ genoem het. Hoe sal jy daarvan hou om met so ‘n naam deur die lewe te gaan? Hy mag dalk ongewens en ongeliefd gewees het. Hy was egter sterker as sy gestremdheid en sy geloof het hom aangespoor. Sy oë was op die toekoms gerig, nie op die verlede nie. Hy het geglo dat as God hom seën, sy toekoms beter as sy verlede sal wees. Wat is jou agterstand? Is dit fisies? Is dit geestelik? Is dit ‘n ongelukkige kindertyd? Is dit ‘n frustrerende werk of ‘n gebroke huwelik? Wat dit ook al mag wees, Jesus het gesê, ‘…As ‘n mens glo, is álles moontlik!’ (Markus 9:23 NLV).
Sielskos: Deut 5-7; Mark 6:14-29; Ps 37:1-7; Spr 11:24-26
2018-05-03
1 Kronieke 4:10 NLV
Toe Jabes gebid het, ‘vergroot my grond,’ het hy gesê, ‘Here, ek wil meer hê as wat ek tans het en ek vra U daarvoor!’ Hierdie man het groot ambisie gehad en God het hom geseën. Daar is drie algemene wanopvattings wat ons het wat ons keer om groot ambisies te hê: 1) Ons verwar vrees met nederigheid. Ons sê, ‘O, ek sal dit nooit kan doen nie,’ en dink dat ons nederig is. Dis nie nederigheid nie. Dis vrees; dis gebrek aan geloof. ‘n Persoon wat waarlik nederig is sal sê, ‘Met God se hulp kan ek dit doen. Met God se seën sal ek dit doen. Ek sal dit dalk nie op my eie kan doen nie, maar met God se hulp kan ek.’ Dis ware nederigheid. 2) Ons verwar luiheid met tevredenheid. Ons haal Paulus aan: ‘…Ek het geleer om tevrede te wees met dit wat ek het’ (Filippense 4:11 ABA). Dit beteken nie dat jy nie doelwitte moet stel nie. Paulus het nie gesê, ‘Ek het geen ambisies of toekomsplanne nie.’ Inderwaarheid net die teenoorgestelde. Hy het gesê dat hy hom ‘…uit[strek] na dit wat voorlê’ (Filippense 3:13 NLV). As jy nie ‘n droom of ‘n doelwit het nie, vra God vir een. 3) Ons verwar klein gedagtes met geestelikheid. Sommige mense sê, ‘Ek dien God op my klein manier.’ Hoekom begin jy Hom nie op ‘n groter manier dien nie? Hoekom laat jy Hom nie toe om jou meer te gebruik nie? Ander mense sê, ‘Ek is tevrede net soos ek is. Dis hoe God my gemaak het.’ Dis verkeerd om God vir jou gebrek aan groei te blameer, omdat Hy jou met al die idees en hulpbronne voorsien wat jou in staat stel om te groei. Dus: droom groot!
Sielskos: Deut 3-4; Mark 6:7-13; Ps 2; Spr 11:22-23
