2018-08-24
Efesiërs 5:18 NLV
Sommige mense raak dronk in ‘n poging om die leegheid binne in hulle te vul. Dit werk egter nie. Toe Jesus besef dat sy dissipels nie sonder Hom sou oorleef wanneer Hy weggaan nie, het Hy gesê, ‘En ek sal die Vader vra en Hy sal vir julle ‘n ander Raadgewer stuur om vir altyd by julle te wees’ (Johannes 14:16 NLV). Wanneer jy verstaan wat die Heilige Gees kan doen, sal jy nie ‘n enkele dag sonder sy hulp wil leef nie. 1) Hy sal jou voete op die pad van waarheid plant (sien Johannes 16:13). 2) Wanneer jy aan jou redding twyfel, sal Hy bevestig dat jy waarlik God se verloste kind is (sien Romeine 8:16). 3) In moeilike situasies, wanneer jy nie weet wat om te sê nie, sal Hy jou die regte woorde op die regte tyd gee (sien Handelinge 1:8). 4) Hy sal sy aard in jou herproduseer (sien Galasiërs 5:22). Dit staan bekend as ‘die vrugte van die Gees,’ nie die inspanning van jou vlees nie. Paulus skryf, ‘…moenie soveel wyn drink dat julle dronk word nie, dit lei tot onbeheerde gedrag. Nee, laat die Heilige Gees julle lewe vol maak’. Jy kan oor die algemeen sien as iemand dronk is deur die manier wat hulle tong sleep en hoe hulle wankel as hulle stap. Wanneer dit gebeur, sê ons dat hulle ‘onder die invloed is.’ Paulus se punt is duidelik: As ‘n gelowige, moet jou treë en jou tong ‘onder die invloed’ van die Heilige Gees wees. Vra dus vandag vir God om jou met sy Gees te vul – en vul dit aan deur daagliks sy Woord te lees en te bid.
Sielskos: 2 Kro 19-21; Luk 16:19-31; Ps 119:113-120; Spr 22:1-3
2018-08-23
Genesis 37:5 NLV
Eerstens, is dromers gewillig om opofferings te maak. Wanneer God ‘n droom in jou hart plaas sal jy sekere opofferings moet maak, soos om korttermyn plesier vir langtermyn vervulling te ruil. Paulus het hierdie beginsel verstaan: ‘Wat ek wel weet, is dat die Heilige Gees my in elke stad verseker dat gevangenskap en vervolging voorlê. Al is my lewe kosbaar, ag ek dit van geen waarde as ek nie my lewenstaak en my bediening wat ek van die Here Jesus gekry het, kan klaarmaak nie…’ (Handelinge 20:23-24 NLV). Tweedens, word dromers nie altyd waardeer nie. ‘Een nag het Josef ‘n droom gehad. Hy het dit vir sy broers vertel, waarna hulle hom nog meer gehaat het.’ Sommige mense sal nie jou droom waardeer nie, omdat dit hulle aan die droom wat hulle nooit gehad het nie of wat hulle eenkant toe gestoot het, herinner. Hulle sal jou met elke logiese verskoning daarvan probeer laat afsien. Hoe moet jy reageer? Wees lief vir hulle, help hulle as jy kan, maar moenie deur diegene wat hulle droom opgegee het, beïnvloed word nie. Die skrywer John Mason sê, ‘As jy saam met God beweeg, sal jy gekritiseer word. Die enigste manier om kritiek te vermy is om niks te doen en niks te wees nie.’ Derdens, dromers is oorwinnaars. Josef se droom het hom in staat gestel om Potifar se vrou te weerstaan, sy familie se verraad, gevangenskap en ‘n klomp ander dinge wat hom kon laat opgee het, te oorkom. Om jou droom te ontdek, leer jouself ken: jou sterk- en swakpunte. Observeer waar God jou geplaas het, vra Hom raad en kyk uit vir geleenthede en ‘koninkrykskonneksies.’ Wanneer jy dit doen, sal Hy jou ‘n droom vir jou lewe gee en jou help om dit te vervul.
Sielskos: 2 Kro 16-18; Luk 16:1-18; Ps 119:105-112; Spr 21:28-31
2018-08-22
Spreuke 23:22 NLV
Jy leer nie hoe om ‘n ouer te wees by ‘n skool of kollege nie, jy leer dit soos jy aangaan. Jy maak baie foute, sommige wat jou laat ineenkrimp wanneer jy daarop terugkyk. Deur dit alles is jy egter lief vir jou kinders en wil jy net die beste vir hulle hê. Wat is die punt wat ons probeer maak? As jou ouers jou gefaal het, het jy heel waarskynlik wonde wat gesond gemaak moet word. God sê gelukkig vir ons, ‘…Ek is die Here wat julle gesond sal hou’ (Eksodus 15:26 NLV). Moenie in die gat van selfbejammering verval omdat jy die idee het dat jy uit ‘n ‘disfunksionele familie’ kom nie. Sommige families is beter as ander, maar almal van hulle het areas van disfunksie. Kyk terug en oorweeg jou ouers se omstandighede en die uitdagings wat hulle gehad het toe hulle jou grootgemaak het en miskien sal jy hulle foute met ‘n bietjie meer deernis kan sien. Hulle is mense, net soos jy; hulle maak foute, net soos jy. Niemand is perfek nie. Deur deernis aan hulle te bewys, sal dit vir jou makliker maak om deernis met jouself te hê wanneer jy foute met jou eie kinders maak. En – hierdie is belangrik – wanneer jou kinders sien dat jy genadig teenoor jou ouers optree, sal hulle ook makliker genade teenoor jou bewys. As jy dus nodig het om jou ouers te vergewe, doen dit vandag en beweeg aan. Moenie dit aanhou ophaal nie. Sal jy daarvan hou dat God jou aanhoudend aan al die sondes waarvoor Hy jou vergewe het herinner? Nie? Probeer dan om dieselfde genade en deernis te bewys. Bid ook vir hulle, want wanneer jy vir iemand bid is dit moeilik om oor hulle te kla!
Sielskos: 2 Kro 12-15; Luk 15:11-32; Ps 119:97-104; Spr 21:24-27
2018-08-21
Jesaja 54:2 NLV
Die Golden Gate brug in San Francisco kan tot 6 meter in enige rigting van sy middelpunt af beweeg. Al die parte, insluitende die sement ryvlak, staalrelings en dwarsbalke is aan mekaar gekonnekteer deur ‘n enorme kabelsisteem wat aan twee groot torings vasgemaak is, wat op hulle beurt weer aan ‘n rotsfondasie onder die Stille Oseaan vasgemaak is. Daar is twee Bybelse waarhede wat ons hieruit kan leer: 1) Jy moet sterk wees. Paulus skryf: ‘…As Christene moet julle in hierdie lewe sterk staan, maar julle kan dit alleen doen as julle naby aan die Here bly… Trek die klere aan wat God vir julle gegee het om mee te veg sodat die duiwel julle nie sommer om die eerste hoek en draai met al sy slim planne oorrompel nie… Daar is ‘n oorlog aan die gang en ons veg ook daarin… Sorg dat julle al die wapens reg hou wat God vir julle gegee het sodat wanneer die bose magte op julle toesak, julle nie ‘n duim vir hulle hoef terug te tree nie. Met al sy aanvalle en dinge sal die duiwel net mooi niks aan julle kan doen nie… Jy moet altyd gereed wees om vir ander te vertel van die vrede wat Jesus vir ons bring. Dit moet soos die skoene aan jou voete wees’ (Efesiërs 6:10-15 DB). 2) Jy moet veerkragtig wees! Die Golden Gate brug het al dekades van aardbewings oorleef omdat dit ontwerp is om te kan wieg. Dit is buigbaar en veerkragtig – soos jy ook moet wees. Paulus het geskryf: ‘Op elke manier word ons onder druk geplaas, maar ons is nie verpletter nie; ons is verward, maar nie wanhopig nie; ons word vervolg, maar nie in die steek gelaat nie; platgeslaan, maar nie vernietig nie’ (2 Korintiërs 4:8-9 NLV).
Sielskos: 2 Kro 8-11; Luk 15:1-10; Ps 119:89-96; Spr 21:20-23
2018-08-20
Filippense 1:20 NLV
Meer as die helfte van alle Christene lewe nou in die Derde Wêreld, dikwels in anti-Christen omgewings. Meer Chinese neem deel aan Sondag lofprysing as al die Christene in Wes-Europa. Lebanon is 39 persent Christelik, Soedan, 5 persent; Egipte, omtrent 10 persent. Baie van hierdie mense lofprys die Here op eie risiko. Jy mag dalk een van hulle wees. Jy is dalk die enigste Christen by jou universiteit in Irak, of jy is ‘n Arabiese vrou wat gebede in stilte offer, of ‘n Messiaanse Jood wat in Jerusalem woon. Miskien lewe jy in ‘n samelewing met vryheid van geloof, maar binne ‘n gemeenskap van geestelike verdrukking. Familielede spot dalk jou geloof. Universiteitsprofessors verkleineer jou beginsels. Klasmaats lag vir jou besluite. Kollegas oefen druk op jou uit om jou integriteit te kompromiseer. As dit is waar jy jouself bevind, staan vir Jesus op! Paulus het hierdie woorde uit sy tronksel geskryf: ‘…ek weet dat deur julle voorbidding en die hulp van die Gees van Jesus Christus alles op my vrylating sal uitloop. Dit is my strewe en hoop dat ek nooit iets sal doen waaroor ek my sal hoef te skaam nie. Ek wil eerder, soos nog altyd, ook nou in my hele bestaan – of ek bly leef en of ek moet sterf – Christus met volle vrymoedigheid verheerlik. Want vir my is om te lewe, ‘n lewe vír Christus, en om te sterf selfs nog beter!’ (verse19-21 NLV). Soos die gesang lui: ‘Stand up, stand up for Jesus, ye soldiers of the cross. Lift high His royal banner, it must not suffer loss. From victory unto victory, His armies shall He lead. Till every foe is vanquished, and Christ is Lord indeed.’ Staan vandag vir Jesus op!
Sielskos: 2 Kro 5-7; Luk 14:25-35; Ps 119:81-88; Spr 21:17-19
2018-08-19
Lukas 18:21 NLV
Die jong, ryk leier mag dalk as een van die mees godsdienstigste mense in die Skrif gesien word. Hy het al die gebooie nagekom. Jy kan egter niks verkeerd doen nie en steeds niks reg doen nie. Om geregtig te wees beteken, by definisie, om iets reg te doen. Ons het die betekenis daarvan egter verander as om niks verkeerd te doen nie. Ons fikseer op sondige dade: Moenie dit doen nie, moenie dat doen nie – dan doen jy goed. Dis egter jou sonde van dit wat jy nie doen nie – wat jy moes, kon of sou gedoen het – wat jou hemelse Vader se hart breek. As jy ‘n ouer is, sal jy dit verstaan. Jy is lief daarvoor wanneer jou kinders nie iets verkeerds doen nie, maar jy is liewer daarvoor wanneer hulle iets reg doen. Jy is gered om te dien! Paulus sê God het, ‘…ons só gemaak dat ons die goeie werke wat Hy vir ons bestem het, kan uitlewe’ (Efesiërs 2:10 NLV). God het ‘n persoonlike plan vir jou lewe, genaamd ‘Sy Wil.’ Jy kan egter nie net niks verkeerd doen nie, jy moet ook iets reg doen. Jy kan nie net die reëls volg nie, jy is geroep om Jesus te volg. As jy jammer voel vir die jong, ryk leier, moet dit nie wees oor dit wat Jesus vir hom gevra het om op te offer nie, maar omdat hy die geleentheid om Jesus te volg, laat verbygaan het. Verbeel jouself jy sê nee vir ‘n drie-jaar internskap met jou Skepper! Wat Jesus hom gevra het om op te offer, was niks in vergelyking met wat Jesus hom aangebied het nie. Ongelukkig het hy nee gesê. Jy kan egter ja sê en begin om die wonderlikste lewe moontlik te lei.
Sielskos: Joh 4:4-26; Joh 7:37-41; Eks 17:1-7; Jes 35:1-7
