2026-07-31
Psalm 71:5-6 NLV
Hier is ‘n paar Skrifgedeeltes wat selfvertroue bou en wat jy elke dag moet lees, memoriseer, bid en op staan:
1) ‘Deurdat ons Hom regtig ken, het sy Goddelike krag ons alles laat kry wat ons nodig het om naby aan Hom te lewe. Hy het ons geroep om sy heerlikheid en goedheid te ontvang!’ (2 Petrus 1:3 NLV).
2) ‘Dit is die vrymoedigheid wat ons voor God het, dat wat ons ook al volgens sy wil vra, Hy na ons luister. As ons dan met die wete leef dat Hy na ons luister, na wat ons ook al vra, weet ons ook dat Hy die versoek wat ons gevra het, sal toestaan’ (1 Johannes 5:14-15 NLV).
3) ‘Die Here kyk oor die hele aarde om hulle te help wat met hulle hele hart op Hom vertrou…’ (2 Kronieke 16:9 NLV).
4) ‘Maar gelukkig is dié mense wat op die Here vertrou en hulle verwagting in Hom stel. Hulle is soos bome wat langs ‘n rivier staan, hulle wortels reik diep tot by die water. Hitte bedreig hulle nie, hulle blare bly groen. Lang maande van droogte pla hulle ook nie, hulle hou nie op om vrugte te dra nie’ (Jeremia 17:7-8 NLV).
5) ‘Kom ons gaan dan met volle vrymoedigheid na die troon van ons genadige God. Hy sal aan ons sy deernis en onverdiende goedheid bewys sodat ons op die regte tyd gehelp sal word’ (Hebreërs 4:16 NLV).
6) “Daarom kan ons moed skep en antwoord: ‘Die Here is my hulp. Daarom sal ek nie bang wees nie. Wat kan nietige mensies my aandoen?'” (Hebreërs 13:6 NLV).
7) ‘Ek is oortuig dat God die goeie werk wat Hy in julle begin het, sal voortsit totdat Hy dit voltooi op die dag wanneer Jesus Christus terugkom’ (Filippense 1:6 NLV).
Sielskos: 1 Kro 6:1-7:19; Mark 2:1-12; Ps 78:32-39; Spr 20:1-3
2026-07-30
Matteus 5:21-22 NLV
Aan die einde van die negentiende eeu het ‘n Russiese dokter genaamd Ivan Pavlov ‘n Nobelprys vir sy eksperimente met honde ontvang. Hierdie honde het almal een ding in gemeen gehad – hulle het speeksel rondom kos afgeskei. Pavlov wou egter uitvind of hierdie speekselafskeiding deur ‘n ander stimulus veroorsaak kon word, daarom het hy die honde gekondisioneer deur ‘n klokkie te lui wanneer hy hulle kos gegee het. Uiteindelik het die honde begin speeksel afskei sodra hulle die klokkie hoor lui het, of hulle kos gekry het of nie. Pavlov het na hierdie aangeleerde optrede as ‘n gekondisioneerde refleks verwys.
Ons word almal, bewustelik of onbewustelik, ons hele lewe lank gekondisioneer. Baie van ons gedrag word deur hierdie gekondisioneerde reflekse bepaal. Sommige gekondisioneerde reflekse is so normaal en natuurlik soos om te bloos. Ander is so vernietigend soos om te drink om jou hartseer te vergeet. Bewustelik of onbewustelik, onskadelik of skadelik, is een ding egter seker: ons is baie meer gekondisioneer as wat ons besef.
Ons geestelike groei word egter deur God se genade geherkondisioneer. Jesus het gesê: ‘Julle het gehoor dat vir ons voorouers gesê is… Maar Ek sê vir julle…’ Jesus gebruik hierdie uitdrukking herhaaldelik. Wat het Hy daarmee bedoel? Hy het daarmee Ou Testamentiese toepassings verwyder en dit met Nuwe Testamentiese waarhede vervang. Dit was nie meer: “‘n Oog vir ‘n oog,” nie. Jesus het dit met: ‘Draai die ander wang,’ vervang (sien Matteus 5:38-39 NLV).
Soms is dit baie makliker om soos ‘n Christen op te tree as om soos een te reageer. Hoe verander ons dus ons gekondisioneerde reaksies? Deur die Heilige Gees. ‘…Ons word al hoe meer verander om soos die Here te lyk, met ‘n heerlikheid wat steeds toeneem namate die Here, dit is die Gees, dit aan ons gee’ (2 Korintiërs 3:18 NLV).
Sielskos: 1 Kro 4:24-5:26; Mark 1:35-45; Ps 78:17-31; Spr 19:27-29
2026-07-29
Matteus 12:15 NLV
Wonder jy of Jesus gewillig is om jou te genees? Kom ons kyk na die bediening van Jesus Christus, wat die Bybel beskryf as ‘…steeds dieselfde [is] – gister, vandag en vir altyd!’ (Hebreërs 13:8 NLV). Dit beteken dat as Hy dit voorheen gedoen het, Hy dit weer sal doen. Soos jy oor die vele genesings en wonderwerke wat Jesus voortdurend verrig het lees, sal dit jou geloof laat groei en jou verwagting laat styg. ‘Die geloof volg uit die aanhoor van die boodskap. En die aanhoor van die boodskap volg uit die prediking van die Goeie Nuus wat handel oor Christus’ (Romeine 10:17).
Regdeur die evangelies het mense met verskeie siektes na Jesus vir genesing gegaan. Sommige was op die rand van die dood en sommige was eintlik reeds dood. Daar was mense met sterk geloof en ander wat gesukkel het om te glo. Die sleutels tot elk van hierdie wonderwerke was:
1) Diegene wat siek was, het seker gemaak dat hulle in die teenwoordigheid van Jesus kom;
2) Hulle het sy Woord gewillig ontvang en daarop gereageer.
Lees oor sommige van die wonderwerke wat Jesus verrig het:
1) Simon se skoonmoeder is van koors genees (sien Matteus 8:14-15);
2) Die opstanding van Jaïrus se dogter (sien Markus 5:21-24, 35-43);
3) Genesing van die vrou met bloedvloeiing (sien Markus 5:25-34);
4) ‘n Dowe man is genees (sien Markus 7:32-37);
5) ‘n Afgesnyde oor is herstel (sien Lukas 22:47-51);
6) ‘n Blinde man kon weer sien (sien Johannes 9:1-41).
Jesus het nooit vir ‘n hulpgeroep en genesing nee gesê nie: ‘…’n Groot skare het agter Hom aan gekom. Hy het al die siekes onder hulle gesond gemaak’ (Matteus 12:15). Wat Hy vir hulle gedoen het, kan Hy vir jou ook doen, wanneer jy bid en sy Woord glo.
Sielskos: 1 Kro 3:1-4:23; Mark 1:21-34; Ps 78:9-16; Spr 19:24-26
2026-07-28
Efesiërs 2:10 NLV
‘n Boer het eenkeer ‘n jong arend gevang, hom huis toe gebring en tussen sy hoenders en kalkoene grootgemaak. Vyf jaar later het ‘n natuurkenner hom kom besoek en die voël gesien. ‘Dis ‘n arend, nie ‘n hoender nie!’ het hy gesê. ‘Ja,’ het die boer gesê, ‘maar ek het hom grootgemaak om ‘n hoender te wees.’ Die natuurkenner het gesê: ‘Hy het ‘n vlerkspan van vyftien voet. Dis ‘n arend!’ Die boer het geantwoord: ‘Maar hy sal nooit vlieg nie.’ Die natuurkenner het nie saamgestem nie en hulle het besluit om hul argument op die proef te stel.
Eers het die natuurkenner die arend opgetel en gesê: ‘Jy is ‘n arend; jy hoort in die lug en nie op hierdie aarde nie; strek jou vlerke uit en vlieg.’ Die arend het die hoenders onder hom gesien en afgespring. Die volgende dag het die natuurkenner die arend na die bokant van die huis geneem, dieselfde ding gesê en die arend laat gaan. Weer eens het hy die hoenders onder op die werf gewaar en afgefladder om by hulle aan te sluit om te eet.
‘Nog een probeerslag,’ het die natuurkenner gesê. Hy het die arend teen ‘n berg opgeneem. Die bewerige voël het rondgekyk en toe het die natuurkenner dit in die son laat kyk. Toe die natuurkenner weer vir die voël sy ware identiteit vertel het, het die arend skielik sy vlerke uitgestrek, ‘n magtige krys gegee en weggevlieg om nooit weer terug te keer nie.
Jy moet weet wie God jou geskep en geroep het om te wees. Dit vind in die regte omgewing, tussen die regte geselskap en met die regte insette, plaas. ‘…Hy het ons in ons verhouding met Christus Jesus só gemaak dat ons die goeie werke wat Hy vir ons bestem het, kan uitlewe.’
Sielskos: 1 Kro 1-2; Mark 1:9-20; Ps 78:1-8; Spr 19:21-23
2026-07-27
Filippense 4:13 NLV
Mense het erge weerstand gebied teen uitvindings wat ons deesdae as alledaags beskou en elke dag geniet. In Duitsland het ‘kundiges’ gesê dat as treine so vinnig as vyftien tot twintig myl per uur sou ry – wat as ‘n skrikwekkende spoed beskou is – bloed uit die reisigers se neuse sou stroom en passasiers sou versmoor wanneer hulle deur tonnels gaan. In Amerika het kenners gesê die bekendstelling van die spoorlyn sou veroorsaak dat baie nuwe inrigtings vir kranksinniges gebou sou moes word, aangesien mense mal van vrees by die aanskoue van die lokomotiewe sou word.
Toe die idee van ysterskepe die eerste keer voorgestel is, het kenners daarop aangedring dat hulle nie sou kon dryf nie, dat dit moeilik sou wees om die ysterbodem teen roes te bewaar en dat yster kompaslesings sou verwar. In 1797, toe die eerste gietysterploeg uitgevind is, het boere in New Jersey dit verwerp en gesê dat die gietyster die grond sou vergiftig en die groei van onkruid sou stimuleer. Toe die YMCA in New York die uitvinding van die tikmasjien verwelkom en tiklesse vir vroue aangekondig het, het protesoptogte plaasgevind omdat daar geglo is dat die vroulike konstitusie onder die druk daarvan sou ineenstort.
Kyk nou na die volgende stellings, wat elkeen die produk van ‘n negatiewe denkwyse was: 1) ‘Vlieënde masjiene wat swaarder as lug is, is onmoontlik’ (Lord Kelvin, President, Royal Society, 1895). 2) ‘Die mens sal nooit die krag van die atoom benut nie’ (Robert Millikan, Nobelpryswenner in fisika, 1923). 3) ‘Alles wat uitgevind kan word, is al uitgevind’ (Charles H. Duell, Direkteur van die Amerikaanse Patentkantoor, 1899). As jy groot dinge wil bereik en deur God gebruik wil word, moet jy ‘n ‘ek kan’ persoon wees.
Sielskos: Esra 9-10; Mark 1:1-8; Ps 46; Spr 19:18-20
2026-07-26
Spreuke 20:24 NLV
Marian wou ‘n konsertsangeres word, ‘n uitdaging wat twee keer so moeilik as gevolg van haar velkleur was. Haar ma het egter ‘n geduldige vertroue in God gehad. Marian het later gesê: ‘Ma het geglo dat sy dit wat reg is vir haar sal ontvang, mits sy pligsgetrou in haar geloof is. As sy iets nie ontvang het nie, was dit omdat God dit nie as reg vir haar beskou het nie. Ons het in hierdie atmosfeer van geloof wat sy geskep het grootgeword. Ons het geglo soos sy, want ons wou dieselfde soort hawe in storms hê.’
Toe Marian toelating tot ‘n bekende musiekkonservatorium weens haar ras geweier is, het haar ma gesê dat iemand oor haar pad sou kom om haar te help om dit wat sy by die konservatorium wou doen, te bereik. Daardie iemand het ‘n paar weke later opgedaag. Een van Philadelphia se vooraanstaande sangonderwysers, Giuseppe Boghetti, het plek vir haar om een van sy studente te word, gemaak. Marian Anderson was op pad om een van die gewildste sangers van die twintigste eeu te word. Op Paassondag, 1939, het sy voor vyf-en-sewentigduisend mense by die Lincoln-gedenkteken gesing en ‘n optrede gelewer wat nooit deur die aanwesiges vergeet sou word nie.
Salomo het hierdie twee dinge oor God se leidende hand in ons lewens gesê: 1) ‘Die Here bepaal ‘n mens se lewe. Hoe kan ‘n mens verstaan wat met hom moet gebeur?’ 2) ‘Vertrou op die Here met alles wat jy het. Moenie staatmaak op jou eie insigte nie. Vra na die wil van God in alles wat jy doen. Hy sal die regte pad vir jou wys’ (Spreuke 3:5-6 NLV).
Sielskos: Eseg 37:1-14; Matt 27:50-53; Ef 1:18-21
