2018-09-17
2 Korintiërs 4:8 ABA
Voor jy tou opgooi en wegloop, lees eers die verhaal van Nehemia wat Jerusalem se mure in twee-en-vyftig dae herbou het: Eerstens het hy God se hulp gesoek. ‘Maar ons het tot ons God gebid…’ (Nehemia 4:9 NLV). Tweedens het hy sy visie beskerm. ‘…Ons het die stad dag en nag bewaak om onsself teen hulle te beskerm’ (vers 9 NLV). Derdens het hy geweier om tou op te gooi. ‘…Behoort iemand soos ek vir gevaar weg te vlug?.. Nee, ek sal nie…’ (Nehemia 6:11 NLV). Gandhi het gesê, ‘Jy mag dalk nooit weet wat die resultate van jou aksies is nie, maar as jy niks doen nie, sal daar geen resultate wees nie.’ Ten spyte van die struikelblokke, die vyand en die druk, het Nehemia geweier om tou op te gooi. Paulus het gesê, ‘Mense hou aan om ons te laat swaarkry, maar ons hou aan om te lewe. Ons weet nie altyd wat om te doen nie, maar ons is nie moedeloos nie. Mense wil ons doodmaak, maar God los ons nie…’ (2 Korintiërs 4:8-9 ABA). Thomas Edison het vir die wêreld elektriese lig, mikrofone, batterye, klankfilms, fonograwe en ‘n duisend ander uitvindings gegee. Hier is die beginsels waarvolgens hy gelewe het: 1) Werk om al die kennis wat jy kan oor dit wat jy wil bereik, te kry. 2) Vestig jou gedagtes op jou doelwit. Hou aan! Soek! Die probleem met die meeste mense is dat hulle tou opgooi nog voor hulle begin. 3) Hou aan soek, maak nie saak hoeveel keer jy teleurstelling aanvaar nie. 4) Weier om deur die feit dat iemand anders dieselfde ding probeer en misluk het, beïnvloed te word. 5) Hou aan glo dat daar êrens ‘n oplossing op jou probleem bestaan, en dan sal jy dit vind.
Sielskos: Neh 8-10; Luk 22:1-13; Ps 78:40-55; Spr 24:1-5
2018-09-16
1 Korintiërs 4:5 NLV
Vooroordeling veroorsaak dat jy mense wat nie dit wat jy glo onderskryf nie, as vyande sien. Jy ken prysenswaardige kwaliteite aan die sirkel waarin jy beweeg en negatiewe kwaliteite aan diegene buite hierdie sirkel toe. Dis nie wat Jesus gedoen het nie. Hy het vriende met sondaars en uitgeworpenes gemaak – sonder om wie Hy was in gedrang te bring, of om hulle leefstyl goed te keur. Die Bybel waarsku ons daarteen om vooroordelend te wees en herinner ons dat ‘Hý… die motiewe van ons harte aan die lig [sal] bring’ (vers 5 NLV). Hy is die enigste een wat bevoeg is om ‘…ons diepste motiewe en oorwegings oop [te vlek]’ (Hebreërs 4:12 NLV). As jy dus geneig is om ‘…vinnig [te] wees om te sê die een ding is sleg of die ander ding is goed…’ (1 Korintiërs 4:5 DB), is hier iets om te oordink: 1) Erken jou vooroordelings. Maak ‘n lys van al die mense wat jy nie as vriende tel nie, mense wat jy uit jou pad gaan om nie ‘n verhouding mee te hê nie en begin om hulle lief te hê deur jou ‘…optrede, en met opregte bedoelings’ (1 Johannes 3:18 NLV). 2) Verloor die masker. Kyk in jou hart en vra jouself af wat dit van die ander persoon is wat jou pla. 3) Leer die ander persoon ken. Paulus het gesê, ‘…Ek het my met almal vereenselwig om sodoende tog sommige tot redding te bring’ (1 Korintiërs 9:22 NLV). Jy sal ontdek dat die krag van jou gedagtes dinge kan belemmer, mislei en dit verander in iets wat dit nie is nie. Jy sal dan ook ‘n beter kans hê om ander mense vir Christus te wen, omdat ‘Liefde nie iets is wat mens kan opgebruik… nie…’ (1 Korintiërs 13:8 NLV).
Sielskos: Heb 11:23-28; Eks 3:1-22; Eks 33:7-23; Eks 34:29-35
2018-09-15
Efesiërs 3:16 NLV
Totdat jy besef dat God se krag binne-in jou is, sal jy dit nie gebruik nie. Een van die grootste genesende kragte in die wêreld is God se Woord, wat aan jou beskikbaar is! Wanneer jy of ‘n geliefde byvoorbeeld siek word, sê die Bybel, ‘Hierdie is die wondertekens wat dié sal beleef wat glo… Hulle sal siekes die hande oplê, en hulle sal gesond word’ (Markus 16:17-18 NLV). Dit is ‘n kragtige belofte. Toe Jesus na Kapernaum teruggekeer het, sê die Bybel, ‘…dit [het] rugbaar geword dat Hy weer by die huis is’ (Markus 2:1 NLV). Voor Hy weer weggegaan het daarvandaan af, het ‘n verlamde man opgestaan en geloop. So: As Christus in jou lewe is, is mense nie veronderstel om sy teenwoordigheid te voel wanneer hulle in jou teenwoordigheid is nie? As jy op die kerkraad dien, moet die kerk nie dan geseënd wees nie? Moet jy nie ‘n agent vir verandering wees wat probleme oplos en die kerk help groei nie? Die kerk is nie perfek nie. Niemand sê dat dit is nie. Dis ‘n hospitaal, nie ‘n sosiale klub nie. Wat ook al egter met die kerk verkeerd is, is die mens se handewerk, nie God s’n nie. Wanneer God agter selfs die kleinste ding staan, word dit magtig; dit moet sukses behaal omdat sy mag onbeperk, onveranderd en beskikbaar is! Dis tyd om ‘…die kragtige gevegstoerusting van God wat vestings kan vernietig…’ (2 Korintiërs 10:4 NLV), te gebruik. Dis tyd om die saak te forseer deur vir die Duiwel te sê om sy hande van alles wat op jou betrekking het, af te hou! Jesus het gesê, ‘…God het die volle mag oor hemel en aarde aan My toevertrou. Gaan dan…’ (Matteus 28:18-19 NLV). Hy het aan jou die krag gegee – gebruik dit!
Sielskos: Neh 5-7; Luk 21:25-38; Ps 78:32-39; Spr 23:29-35
2018-09-14
Romeine 12:18 NLV
Jesus het gesê, ‘Gelukkig is die vredemakers, want God sal vir julle sê: ‘Julle is mý kinders.” (Matteus 5:9 NLV). Let op, God het beloof om die vredemakers, nie die mense wat vrede liefhet nie, te seën. Daar is ‘n verskil. Vredemakers betaal die prys; vredeliefhebbers geniet die voordele. Soms moet jy mense konfronteer voor jy hulle kan troos. Jesus het die handelaars uit die tempel uit gegooi omdat hulle die mense wat lammers en duiwe as offergawes vir God gekoop het, onregverdige pryse gevra het. In die meeste gevalle was hierdie mense wat dit nie kon bekostig nie, dus het Jesus besluit om betrokke te raak. Een van die name wat aan God gegee is, is Jehova Salom, ‘Die Here is ons vrede’ (sien Rigters 6:24). ‘Salom’ verwys nie na die afwesigheid van moeilikheid nie, maar na die vrede van God te midde daarvan. Wanneer jy ‘n probleem met iemand het, het Jesus gesê dat ons sekere stappe moet neem. Eerstens, gaan en probeer die probleem in privaatheid oplos. As dit nie werk nie, neem iemand saam wat jou kan help. As dit misluk, neem dit na die kerk se leierskap toe. As die persoon dan steeds weier om versoen te raak, wees dan lief vir hulle en los hulle in God se hande (sien Matteus 18:15-17). Paulus het gesê, ‘Sover dit vir julle moontlik is, moet julle goeie verhoudings handhaaf met alle mense.’ Paulus was byvoorbeeld gewillig om sekere kos wat afstootlik vir ander mense was, nie te eet nie (sien 1 Korintiërs 8:13), maar hy was nie gewillig om moeilikheidmakers in die kerk te verdra nie (sien Romeine 16:17). Jy moet dus weet wanneer om golwe te maak en wanneer om vrede te maak.
Sielskos: Neh 1-4; Luk 21:12-24; Ps 78:17-31; Spr 23:26-28
2018-09-13
2 Korintiërs 10:12 DB
As jy jou vreugde in die dien van die Here verloor het, is dit dalk omdat jy jouself met ander vergelyk en soos hulle probeer wees. Paulus het gesê, ‘Daarom moet julle almal eerder julle eie gedrag toets… sonder om julle met iemand anders te vergelyk’ (Galasiërs 6:4 NLV). Paulus het aanhoudend kritiek gekry. Sy reaksie was altyd dieselfde: Vermy vergelykings, weerstaan versoekings en soek slegs God se lof. Hy het geweier om deur kritiek ontmoedig te word, of om sy bediening te vergelyk, of om by vrugtelose debatte betrokke te raak. Die skrywer John Bunyan het gesê dat as sy lewe vrugteloos was, sou dit nie saak maak wie hom prys nie en as dit betekenisvol was, sou dit nie saak maak wie hom kritiseer nie. Die spreker en skrywer Anne Peterson voeg by: ‘Maak die drake van vergelyking dood. Wanneer ek iets sien wat my ontstel, bid ek vir daardie persoon. Dis makliker wanneer ek eerlik is met God – Hy weet in elk geval hoe ek voel. Dan begin ek Hom loof en prys. Ek sing ou gesange wat vol waarhede oor die Here is. In plaas daarvan om te wonder of ek dit waarna ek toe werk, sal bereik, dink ek eerder aan die wonderlike dinge wat God alreeds gedoen het. Tevredenheid is beskikbaar, solank as wat ons ons oë op die Koning van konings hou.’ ‘n Onbekende digter het geskryf: ‘The stick I made for measuring, I used most every day. It helped me to compare myself with others on my way. I watched all those behind me, or further down the road, and I would readjust my pace or lighten up my load. The most important drawback with how I ran my race, was watching everything around-except my Savior’s face!’
Sielskos: Kol 3-4; Filemon; Luk 21:1-11; Ps 78:9-16; Spr 23:22-25
2018-09-12
Galasiërs 6:4 NLV
Niks sal jou sin van vrede so vinnig soos vergelyking vernietig nie. Dit wys ‘n gebrek aan begrip en laat jou onverstandig optree (sien 2 Korintiërs 10:12). Toe die dissipels notas vergelyk het om te sien wie van hulle sou ly en wie van hulle sou gespaar bly, het Jesus vir hulle gesê, ‘…wat gaan dit jou aan?’ (Johannes 21:23 NLV). Let op: 1) Vergelykings kan jou meerderwaardig laat voel, wat tot trots lei. Onthou die Fariseër wat ‘n groot gedoente daarvan gemaak het om God te bedank dat hy beter as almal anders is? (sien Lukas 18:11). Trots was Satan se ondergang, daarom hou hy daarvan wanneer jy in dieselfde strik trap. 2) Vergelykings kan jou minderwaardig laat voel, wat tot lae self-waarde lei en jou op jouself gefokus hou. Jy vergeet dat ‘…God nie sekere mense bo ander voortrek nie’ (Handelinge 10:34 NLV), en begin glo dat Hy dinge weerhou waarop jy geregtig is. Die samelewing skep ‘n sin van geregtigheid; dan herinner Satan jou aan al die mense wat dit wat jy wil hê, al gekry het, wat jou verder op die pad van onvergenoegdheid afstuur. 3) Ons probeer om God af te bring na ons vlak toe deur te vergelyk hoe Hy in die verlede te werk gegaan het, met hoe Hy nou werk. Hou op om God te probeer uitpluis en vertrou Hom net! ‘Soos die wolke ver bo die aarde is, is die manier waarop Ek dinge doen ook ver bo die manier waarop julle dit doen. Hoe Ek dink, is ook baie ver van die manier waarop julle dink’ (Jesaja 55:9 DB). In plaas daarvan om vergelykings te tref, begin om dit waarmee God jou geseën het, te gebruik en te waardeer.
Sielskos: Kol 1-2; Luk 20:41-47; Ps 78:1-8; Spr 23:19-21
