2019-05-04
Matteus 24:44 NLV
Jesus het gewaarsku: ‘Daar sal ook talle vals profete verskyn en hulle sal baie mense op ‘n dwaalspoor bring’ (vers 11 NLV). In ons generasie was daar al baie hoë profiel predikers wat datums vir Christus se tweede koms voorspel het en waaroor die pers berig het. Jesus kóm egter weer! In die Skrif word daar meer as 300 keer daarna verwys. Charles Swindoll sê: ‘Kritici het dit ontken. Sinici het dit bespot. Geleerdes het dit geïgnoreer. Fanatici het dit verdraai. Ander het sarkasties gevra: ‘…Nou maar wat het van daardie belofte geword?..’ (2 Petrus 3:4 NLV). Jesus se terugkoms is nog altyd aangeval, misbruik en ontken. Dit staan egter steeds, stewig soos ‘n rots en bied ware hoop te midde van ongeloof en wanhoop. Jy vra: ‘Wat moet ek doen terwyl ek wag?’ Verstaan eerstens wat jy níe moet doen nie. Moenie sit en wag vir ‘n trompetgeskal en ‘n wegrapingswolk nie. Moenie jou werk bedank en moenie ‘n datum vasstel nie. Neem eerder die tyd om jou sake agtermekaar te kry. Lewe elke dag asof dit jou laaste is, maar werk asof Jesus eers oor tien jaar sal terugkeer. Skud jou sout en skyn jou lig waar jy ookal gaan (sien Matteus 5:13-16). Bly gebalanseerd, vrolik, innemend, toegewyd en stabiel, terwyl jy vir die dag van sy terugkoms wag. As jy nie seker is of jy gereed is nie, kry dadelik jou kaartjie. Solank as wat die kaartjies beskikbaar is, is hulle verniet. As jy egter wys is, sal jy nie wag nie! ‘n Kaartjie is niks werd wanneer die gebeurtenis verby is nie!’ Aanvaar Jesus vandag as jou Redder en wees gereed wanneer Hy terugkeer.
Sielskos: Num 27-29; Mark 4:26-41; Ps 44:1-8; Spr 11:9
2019-05-03
Lukas 12:15 NLV
In Jules Verne se boek, The Mysterious Island, ontsnap vyf mans uit die tronk deur ‘n warmlugballon te kaap. Hulle kom vinnig agter dat die wind besig is om hulle oor die see uit te dra. Hulle sien hoe die horison kleiner word en besef dat hulle hoogte begin verloor. Omdat hulle geen manier het om die lug in die ballon warm te maak nie, begin hulle van hulle ekstra gewig oorboord gooi. Skoene, jasse en wapens word onwillig oorboord gegooi en hulle juig wanneer die lugballon weer begin styg. Binnekort is hulle weer gevaarlik naby aan die golwe en begin hulle om hulle kos oorboord te gooi. ‘n Derde keer begin die lugballon daal en hierdie keer stel een van die mans voor dat hulle die toue wat die mandjie aan die ballon vasmaak aanmekaar vasknoop en dan die mandjie moet lossny, sodat hulle op die toue sit. Die mandjie val weg en hulle begin weer styg. Skielik sien hulle land. Met nie ‘n sekonde om te spaar nie, spring hulle in die water en begin na die eiland toe te swem. Hulle lewens is gered omdat hulle geleer het waarsonder hulle kon lewe. Hoekom het Jesus gesê: ‘…Ware lewe word nie gemeet aan hoeveel ons besit nie’? Omdat dit wat jy dink ‘n seëning is, op die ou einde in ‘n las kan verander. Dit waarna jy vandag strewe, kan môre ‘n bekommernis word. Jesus het gesê: ‘…Julle hemelse Vader weet tog dat julle dit alles nodig het. Nee, maak die koningsheerskappy van God en dit wat voor Hom reg is, julle heel eerste prioriteit; dan sal God vir julle al hierdie ander dinge as ‘n bonus byvoeg’ (Matteus 6:32-33 NLV).
Sielskos: Num 25-26; Mark 4:13-25; Ps 37:32-40; Spr 11:7-8
2019-05-02
1 Konings 19:11 NLV
Toe Elia sy laagste punt bereik het, het God vir hom twee dinge gesê: 1) ‘Kom buitekant toe en gaan staan voor My op die berg.’ Hy het Elia gehelp om op te hou om oor homself en sy probleme te dink en te begin dink aan God. Wanneer God jou oor het, kan Hy daarin praat. Wanneer Hy jou hart het, kan Hy dit bedien. Dis hoekom Skriflesing so belangrik is. As die lewe jou aftrek en jy gereed is om weer op te staan, staan op God se Woord, eis sy beloftes op, vra vir sy hulp en praat met Hom. 2) ‘Jy moet ook Elisa… salf om jou as my profeet op te volg’ (vers 16 NLV). Neem die fokus van jouself af en soek iemand om te bedien. Jy is nie die enigste een in die wêreld wat probleme het nie; daar is mense wat dit erger as jy het. Hulle het iemand soos jy nodig om saam met hulle te stap en hulle te laat weet dat jy begrip het vir hoe hulle voel. Hulle het iemand soos jy nodig om hulle te bemoedig. As jy wil hê dat die mis van depressie moet lig, moet jy ophou in die spieël kyk en by die venster begin uitkyk. Daar is vir die beroemde psigiater, Karl Menninger gevra: ‘Watse raad sal jy vir iemand gee wat depressie en ongelukkigheid ervaar?’ Hy het geantwoord: ‘Sluit die deur agter jou. Stap na die oorkant van die straat toe. Kry iemand wat ‘n behoefte het en doen iets om hulle te help.’ Dis so eenvoudig en tog hou ons aan om dit mis te loop! Die waarheid is dat jy jouself help wanneer jy ander mense help.
Sielskos: Num 22-24; Mark 4:1-12; Ps 37:25-31; Spr 11:5-6
2019-05-01
Miga 7:8 NLV
Ons almal word van tyd tot tyd neerslagtig. Dit kan op die hakke van ‘n groot sukses of oorwinning gebeur. Beraders sê dat daar vir elke hoogtepunt ‘n ooreenkomstige laagtepunt is. Soms word dit veroorsaak wanneer mense ons teleurstel; iemand wat ons vertrou het het ons in die steek gelaat en ons ervaar woede en verwyt. Wanneer ons ons werk verloor, verloor ons nie net ons finansiële sekuriteit nie; soms verloor ons ook ons identiteit en sin van waarde. Die oorsaak van ons neerslagtigheid is dikwels fisies. Wanneer ons nie genoeg rus, ordentlike kos en oefening kry nie, raak ons afgemat. Soms is die oorsaak chemies van aard. Wanneer die brein se chemiese boodskappers, genaamd neurotransmitters, gesond is, is ons ook gesond. Wanneer sommige van daardie transmitters, soos serotonien en dopamien egter afwesig, laag of ongebalanseerd is, sukkel ons en voel uitgeput. In hierdie geval mag medikasie nodig wees om die chemiese wanbalans te korrigeer. Die oorsaak kan ook geestelik wees. Jesus het gesê dat Satan kom om ‘…te steel, dood te maak en te vernietig…’ (Johannes 10:10 NLV). Dis hoekom die Bybel sê: ‘…Vind julle krag in julle verhouding met die Here… Om staande te bly teen die listigheid van die duiwel moet julle God se gevegstoerusting aantrek. Want ons stryd is nie teen mense nie, maar teen… die bose geeste in die hemelruimtes’ (Efesiërs 6:10-12 NLV). Dikwels is geestelike oorlogvoering die wortel van ons probleme, of dit vererger ons probleme. Maak dus elke môre wanneer jy opstaan seker dat jy jou geestelike gevegstoerustig aantrek en dat jy jou krag in jou verhouding met die Here deurgaans deur die dag kry. Dis hoe jy weer opstaan.
Sielskos: Num 19-21; Mark 3:20-35; Ps 37:16-24; Spr 11:4
2019-04-30
Filippense 2:4 NLV
Paulus skryf: ‘Moenie net aan julleself dink of heeltyd aandag soek nie. Wees liewer maar die minste sodat ander die meeste kan wees. Niemand moet net aan homself dink nie. Elkeen moet ook aan die ander om hom dink. Julle moet Christus Jesus se voorbeeld volg. Soos Hy oor dinge gedink en gevoel het, so moet julle ook daaroor dink en voel’ (verse 3-5 DB). Om minder selfsugtig te wees begin met die besluit om op te hou om so baie aan jouself te dink en te begin oplet na maniere om ander mense te help. As jy onselfsugtig en meer soos Christus wil word, moet jy hierdie twee dinge begin doen: 1) Plaas jouself in situasies waar mense behoeftes het. Is dit riskant? Natuurlik. Jy loop die gevaar om verwerp te word, misverstaan te word en foute te maak. Om egter onselfsugtig te word beteken dat jy jouself in ‘n posisie moet plaas waar jy ‘n ander persoon se behoefte kan sien en iets daaraan doen. Met ander woorde, raak betrokke! 2) Gee stilweg of anoniem. Jesus het gesê: ‘…Moenie julle praktiese godsdiens in die openbaar beoefen sodat almal julle bewonder nie. Anders gaan julle julle beloning by julle hemelse Vader misloop… Maar as jy mense in nood help, doen dit sonder groot vertoon. So sal jou hulpbetoon geheim bly, en jou Vader wat alle geheime ken, sal jou beloon’ (Matteus 6:1-4 NLV). Dis makliker om te gee wanneer jy erkenning ontvang as wanneer niemand daarvan weet nie. Diegene wat egter gee om erkenning en applous te kry, het reeds hulle beloning ontvang (sien Matteus 6:2). Daar is geestelike, verstandelike en emosionele voordele verbonde aan diegene wat anoniem gee. Probeer dit. Die vervulling wat jy sal ontvang, sal jou aanmoedig om dit ‘n leefstyl te maak.
Sielskos: Num 16-18; Mark 3:7-19; Ps 37:8-15; Spr 11:3
2019-04-29
Lukas 22:27 NLV
Die wêreld vereer rykdom, mag, talent en roem. Soms sien dit diensbaarheid as minderwaardig. Jesus het egter ‘n ander maatstok gebruik toe Hy vir sy dissipels gevra het: ‘Wie is die belangrikste: die een wat aan tafel is of die een wat bedien?..’ Hy het die vraag as volg beantwoord: ‘…Ek is egter in julle midde soos een wat dien.’ Paulus het gesê dat Jesus alles prysgegee het: ‘Hy het Homself verneder en Hy het geword soos ‘n slaaf, Hy het ‘n mens geword soos ons….’ (Filippense 2:7 NLV). Ons as Christene hou daarvan om onsself diensknegte te noem, maar hoe reageer jy as jy soos een behandel word? In die bovertrek het al die dissipels ‘n prominente sitplek gesoek, maar Jesus ‘n plek om te dien! Soos hulle gewag het om bedien te word, het Jesus ‘n waskom geneem en hulle vuil, eelterige voete gewas. Kan jy jou indink hoe hulle gevoel het? Die wêreld baseer belangrikheid op die aantal mense wat jou dien, maar God is meer geïnteresseerd in die aantal mense wie jy dien. Hy eer diegene wat onbaatsugtig, sonder om te kla of erkenning te soek, dien. Die waarheid is dat dit meer karakter verg om ander mense te dien as om rond te sit en te wag om bedien te word. Hier is dus die vraag: Sit jy deesdae meer as wat jy dien? As dit die geval is, is dit tyd om God vir ‘n onbaatsugtige gees en ‘n dienaar se hart te vra; en op soek te wees vir geleenthede om te dien waar Hy jou ook al plaas. Hoekom? Omdat Jesus gelewe het om te dien en sy Woord aan jou is: ‘…’n Slaaf is nie belangriker as sy eienaar nie…’ (Johannes 15:20 NLV).
Sielskos: Num 14-15; Mark 3:1-6; Ps 37:1-7; Spr 11:1-2
