2019-12-17
Habakuk 2:2 NLV
Skryf jou doelwitte neer. God het vir die profeet Habakuk gesê: ‘…Skryf my antwoord, die visioen, in groot, duidelike letters op kleitablette sodat iemand wat verby hardloop dit kan lees… Stadig maar seker breek die tyd aan wanneer die visioen waar sal word… Wees seker dit gaan gebeur, dit sal nie onnodig talm nie’ (verse 2-3 NLV). ‘Stadig maar seker’ is nie ‘n begrip wat ons noodwendig van hou nie. God kan oornag vir jou ‘n visioen gee, maar dit sal normaalweg nie oornag vervul word nie. Jy sal teleurstellings, ontmoedigings en vertragings in die gesig staar. Omdat jou visioen altyd meer kos as wat jy geskat het en langer neem as wat jy beplan het, kan dit deur jou omstandighede en emosies ‘verdof’ word. Dis hoekom dit so belangrik is om dit neer te skryf en dit voor jou te hou! Hoekom het God vir Abraham gesê dat sy nageslag so baie soos die sterre aan die hemel sou wees? Omdat sterre iets is wat jy fisies na kan kyk en kan tel. ‘Wanneer ‘n volk nie duidelikheid het oor die wil van God nie, word hulle koersloos…’ (Spreuke 29:18 NLV). Jy sal ook koersloos word as jy nie jou God-gegewe visioen voor jou hou nie. As jy daarvan droom om gewig te verloor, plak ‘n prentjie wat jou inspireer op die yskas vas. As jy daarvan droom om eendag jou eie huis te besit, steek ‘n prentjie daarvan op jou aansteekbord vas. As jou doelwit is om ‘n sekere hoeveelheid geld vir God se werk te gee, skryf ‘n tjek vir daardie hoeveelheid uit en plaas dit op ‘n plek waar jy dit elke dag kan sien. Met ‘n duidelike geskrewe doelwit, sal jy altyd weet waar jy is en onthou wat God jou geroep het om te doen.
Sielskos: Sag 5-8; Joh 20:19-31; Ps 67; Spr 30:29-33
2019-12-16
Psalm 38:12 NLV
Tref onderskeid tussen diegene wat in jou lewe hoort en diegene wat dit nie doen nie. Een van die moeilikste omstandighede om jou doel te bereik, is dat sommige van die mense wat die naaste aan jou is, dit nie sal ondersteun of nie deel daarvan sal wil wees nie. Paulus skryf: ‘Soos jy weet, het al die Christene wat uit die provinsie Asië hier aangekom het, my in die steek gelaat…’ (2 Timoteus 1:15 NLV). ‘Demas het my verlaat omdat hy verlief geraak het op die dinge van hierdie lewe…’ (2 Timoteus 4:10 NLV). Kan jy die hartseer en teleurstelling in sy woorde hoor? Wanneer God jou ‘n wonderlike doelwit gee, mag jy dalk dieselfde ding ervaar. Iemand het gesê: ‘In voorspoed ken ons vriende ons; in teëspoed ken ons ons vriende.’ Hoe waar is dit nie! Toe rampspoed onverwags vir Job getref het, het hy gesê: ‘My naaste vriende het ‘n afsku van my. Dié wat ek liefhet, het teen my gedraai’ (Job 19:19 NLV). Dawid se ervaring het hom genoop om te sê: ‘My familie en vriende bly weg…’ Salomo het in al sy wysheid dit as volg opgesom: “‘n Gebreekte tand, ‘n voet wat swik, so is dit om in gevaar staat te maak op ‘n onbetroubare mens” (Spreuke 25:19 NLV). Die waarheid is dat mense wat nie jou doelwit respekteer nie, afbreuk daaraan sal doen. Jy kan vir hulle preek en hulle met woorde wat versterk en seën probeer aanmoedig, maar as jy daarop aandring om aan hulle vas te klou, sal hulle jou op die ou einde seermaak. Jesus het vir sy dissipels gesê: ‘As hulle julle nie wil ontvang of wil luister na wat julle sê nie, gaan uit daardie huis of dorp en skud die stof van julle voete af’ (Matteus 10:14 NLV). Jy moet dit soms doen om jou God-gegewe doelwit te kan bereik.
Sielskos: Sag 1-4; Joh 20:10-18; Ps 57; Spr 30:24-28
2019-12-15
Jesaja 43:4 NLV
Maak meer op God as op ander mense staat. Dit beteken nie dat jy nie ander mense nodig het nie. Jy het. Wanneer God iemand roep om ‘n werk te doen, roep Hy ander mense om daardie persoon by te staan. God se belofte is: ‘…Ek [gee] mense in jou plek en mense in ruil vir jou lewe.’ Vra dus vir Hom wie in jou lewe hoort. So lank as wat Moses sy hande opgehou het, het Israel se weermag die oorhand in die stryd gehad, maar wanneer sy hande moeg geword het, het die geveg weer in hulle teenstanders se guns geswaai (sien Eksodus hoofstuk 17). Dus het Aäron en Hur by Moses gestaan en sy hande opgehou, totdat die Amalekiete heeltemal verslaan was. Jy het mense nodig wat weet hoe om jou hande omhoog te hou en jou te versterk. Paulus het geskryf: ‘Timoteus is immers die enigste persoon wat met dieselfde opregte gesindheid as ek aandag sal gee aan julle belange. Al die ander soek net hulle eie belang… Julle weet egter hoe Timoteus homself bewys het…’ (Filippense 2:20-22 NLV). Paulus het inderwaarheid ‘n hele hoofstuk van die Bybel gebruik om diegene wat dit moontlik vir hom gemaak het om sy roeping uit te leef, te erken en te bedank. Sommige van ons is hardkoppig en selfgesentreerd. Ons ploeg deur mense en los die wrakke vir ander mense om op te ruim. Moenie dit doen nie! Wanneer God talentvolle mense oor jou pad stuur, moet jy hulle erken, respekteer, oplei, motiveer en beloon. Wanneer jy dit doen, sal jy nie net jou roeping vervul nie, maar ‘n wen-wen situasie vir almal skep.
Sielskos: Gen 11:1-9; Fil 2:1-11
2019-12-14
Spreuke 3:5 NLV
Vertrou meer op God as op jouself. Dit beteken nie dat jy deur die lewe moet gaan en jouself die hele tyd moet betwyfel nie, of bang wees om aan te beweeg vir ingeval jy ‘n fout maak nie. Wanneer jy God se plan in jou lewe herken en aanvaar, ontvang jy die krag wat jy nodig het om dit te vervul. Valse nederigheid sal jou geestelik en emosioneel strem en jou daarvan weerhou om vorentoe te beweeg. Toe God Jeremia ‘n profeet genoem het, het hy geprotesteer: ‘…ek is ‘n kind’ (Jeremia 1:6 ABA). Luister egter wat het God vir hom gesê: ‘…Jy moenie sê jy is ‘n kind nie…’ (vers 7 ABA). So seker as wat die tong mag het oor lewe en dood (sien Spreuke 18:21), so moet jy leer om God se Woord oor die visie wat Hy vir jou gegee het, te spreek. Ja, dis ‘n fout om te dink dat jy God se rol kan vervul of dat Hy joune sal vervul. Sodra jy egter jou persoonlike opdrag verstaan en krag uit Hom put, kan jy begin glo dat jy sukses sal behaal, ongeag watter struikelblokke daar in jou pad mag staan. Wanneer jy weet dat jy binne God se wil is en doen wat Hy jou aangesê het om te doen, kan jy vol vertroue op hierdie Skrifgedeeltes staan: ‘…Nie met mag of krag nie, maar deur my Gees, sê die Here die Almagtige’ (Sagaria 4:6 NLV). ‘Een van julle kan selfs duisend van hulle op loop jaag, want die Here julle God veg aan julle kant. Dit is wat Hy julle beloof het’ (Josua 23:10 NLV). ‘Wanneer ek roep, antwoord U my; U bemoedig my en gee my krag’ (Psalm 138:3 NLV). Jy is nie vandag alleen nie – God is by jou!
Sielskos: 2 Tim 1-4; Joh 20:1-9; Ps 105:37-45; Spr 30:20-23
2019-12-13
Jeremia 1:5 NLV
Vra God om vir jou te sê wie jy is. Boekwinkels het honderde boeke op die rakke wat vir ons vertel dat ons enigiets kan wees wat ons wil wees. Alhoewel daar waarheid in steek, is dit nie die volle waarheid nie! ‘n Vis mag dalk glo dat hy kan blaf, maar dit gaan nie gebeur nie. Visse mag dus dalk bid, glo, eis, bely en probeer soveel as wat hulle wil, maar hulle gaan nie sukses behaal nie. Hoekom nie? Omdat God jou net sal bemagtig om dit te doen waarvoor Hy jou geroep het en waarvoor Hy jou toegerus het om te wees. Hy het vir Jeremia gesê: “…’Ek ken jou nog voordat jy gevorm is in die skoot van jou moeder. Voor jou geboorte al het Ek jou gekies en aangestel om namens My te praat met die nasies van die wêreld.’ Ek het geantwoord: ‘Nee, oppermagtige Here, ek kan nie goed praat nie. Ek is ook te jonk!’ Maar die Here het geantwoord en gesê: ‘Moenie sê jy is te jonk nie. Gaan na die mense waarheen Ek jou stuur en gee my boodskap vir hulle. Jy moet ook nie bang wees vir hulle nie. Ek sal by jou wees en jou beskerm! Ek is die Here wat so sê.’ Toe het die Here sy hand uitgesteek en aan my mond geraak. Hy het vir my gesê: ‘Ek het my woorde in jou mond gesit'” (verse 5-9 NLV). Wanneer God jou met een talent toerus, gee Hy nie vir jou ‘n vyf-talent opdrag nie, en omgekeerd (sien Matteus 25:14-15). Die wonderlike ding is: Die een-talent persoon en die vyf-talent persoon sal altwee eendag voor Hom staan en hoor: ‘Uitstekend! Jy is regtig ‘n goeie werker op wie ‘n mens kan staatmaak…’ (Matteus 25:21 DB).
Sielskos: Miga 5-7; Joh 19:31-42; Ps 105:23-36; Spr 30:15-19
2019-12-12
Handelinge 16:7 NLV
Ons het almal individuele gawes en lewensdoelwitte van God ontvang. Dis goed en reg om talentvolle, suksesvolle mense te bewonder en van hulle te leer, solank jy hulle nie probeer dupliseer nie. Dis goed en reg om hulle karaktereienskappe na te streef en hulle insette te soek, solank jy na God, die argitek van elkeen van ons se lewens, toe gaan en Hom vra om vir jou sy bloudruk van jou lewe te wys. Selfs al was dit Dawid se begeerte om die tempel te bou, het God vir hom gesê dat sy seun, Salomo, dit uiteindelik sou bou. Dawid se werk was om geld en materiaal vir die projek in te samel. As jy die tipe persoon is wat dinge laat gebeur, mag hierdie tipe denke teen jou grein ingaan. Lees dus die volgende en dink daaroor: ‘Hulle [is]… deur die Heilige Gees verhinder om die woord op daardie stadium in die provinsie Asië te verkondig. Toe hulle naby Misië kom, het hulle Bitinië toe probeer gaan, maar die Gees van Jesus het hulle nie toegelaat nie. Hulle het toe deur Misië gereis na Troas toe. Daar het Paulus in die nag ‘n visioen ontvang. Hy het ‘n Masedoniese man gesien wat hom staan en smeek: ‘Kom oor na Masedonië toe en help ons.’ Nadat Paulus die visioen gesien het, het ons onmiddellik Masedonië toe vertrek omdat ons tot die oortuiging gekom het dat God ons geroep het om die evangelie daar te verkondig’ (Handelinge 16:6-10 NLV). Laat God dus jou doelwitte bepaal en jy sal in die regte rigting beweeg.
Sielskos: Miga 1-4; Joh 19:17-30; Ps 105:16-22; Spr 30:10-14
