2026-03-29
Hebreërs 13:5 NLV
Mense wat gelukkig was toe hulle hul klere by tweedehandse winkels gekoop het, bly gewoonlik gelukkig sodra hulle ontwerpersklere kan bekostig. Diegene wat nie gelukkig was nie, is steeds dieselfde ongelukkige mense as toe hulle arm was; hulle trek net beter aan. Om te leer hoe om tevrede te wees met wat jy het en om daarvoor dankbaar te voel, moet jy ‘n begrip van dit wat geld kan en nie kan doen nie, hê.
Daar is dinge in die lewe waarop jy nie ‘n prys kan plaas nie: goeie gesondheid, ‘n familie wat jou liefhet, die ondersteuning van ‘n jarelange vriendskap, die gevoel van prestasie wanneer jy sien dat jou harde werk vrugte afwerp. Jy kan nie hierdie ‘besittings’ in terme van kontant waardeer nie. As jy dink jy het niks om voor dankbaar te wees nie, dink aan die geluid van jou kind se lag, die gebreek van die see wanneer golwe die strand tref, die onvoorwaardelike groet wat jy elke dag van jou troeteldier ontvang en die drukkie van ‘n vriend wat jy lank nie gesien het nie. Hierdie items is van onskatbare waarde en het niks met aandele of winste te doen nie.
Wanneer jy alles in die lewe begin tel, kom jy agter dat die beste dinge gratis is. As jy nie met jou finansiële situasie gelukkig is nie, moet jy stappe neem om dit te verander. Dis wysheid en goeie rentmeesterskap. Voordat jy dit egter kan doen, moet jy ‘n oudit van jou persoonlike bates doen. Ja, dit kan opwindend wees om die voorspoed van sukses te geniet. Jy moet egter onthou om ook die skoonheid van die lewe te waardeer – dis gratis. Dit sal vir jou vervulling op ‘n manier wat geld en dinge nooit kan doen nie, bring.
Sielskos: Matt 21:1-16; Ps 118:19-29
2026-03-28
Matteus 5:10 NLV
Jesus het gesê: ‘Gelukkig is dié wat vervolg word ter wille van wat voor God reg is, want hulle het deel aan sy koninkryk. Gelukkig is julle wanneer julle bespot en vervolg word en allerhande leuens oor julle versprei word omdat julle my dissipels is. Wees bly, ja, jubel daaroor, want God sal julle ryklik daarvoor beloon…’ (verse 10-12 NLV).
Om ter wille van geregtigheid vervolg te word, is om te leef soos Jesus geleef het – met sy karakter, sy motiewe, sy gehoorsaamheid, sy vertroue in die Vader en sy reinheid van hart. Dit is om ‘n vredemaker te wees, om te honger en te dors na wat reg is, om jou rug op sonde te draai en ‘n fontein van barmhartigheid te wees. As jy so leef, sal jy vervolg word, net soos Jesus vervolg is.
Jesus het die waarheid gepraat, die waarheid geleef en was bereid om vir die waarheid te sterf. Hy het nooit probeer om ‘n bakleiery te begin nie, maar Hy het elke keer wanneer die waarheid uitgedaag is, daarvoor opgestaan. Hy het ook belowe dat wanneer jy om dieselfde redes as Hy beledig en mishandel word, jy die koninkryk van die hemel sal ontvang, mits jy getrou bly. Jy sal dus ‘n beloning in die hemel hê en jy sal geestelike gesag in die koninkryk van die hemel ontvang.
Die lyding wat jy hier op aarde mag ondervind, is slegs tydelike verwerping, belediging of mishandeling. Wat jy egter in die hemel verkry, sal ewig en glorieryk wees. Die Bybel sê: ‘Ek weet vir seker dat ons huidige lyding hoegenaamd nie vergelyk kan word met die heerlikheid waarmee God ons gaan verras nie’ (Romeine 8:18 NLV).
Sielskos: Jer 14-17; Luk 21:25-33; Ps 69:19-36; Spr 8:30-31
2026-03-27
Matteus 5:9 NLV
Die Hebreeuse woord vir ‘vrede’ is shalom; dit verwys na ‘n gevoel van welstand wat kalmte en vertroue, selfs in ‘n krisis, voortbring. Dis versekering te midde van onsekerheid en verwarring. Diegene wat ‘n onwrikbare, onwankelbare, rotsvaste vertroue in God het, is diegene wat ware vrede in hulle harte ervaar. Hoe verkry mens sulke vrede?
Eerstens moet jy weet wat God in sy Woord sê en dit glo. Jy moet God se Woord die fondament van alles wat jy glo, alles wat jy sê en alles wat jy doen, maak. Jy moet geloof in God se Woord hê en jou wil aan sy gebooie en sy plan oorgee. Jy moet jou verwagtinge en hoop in sy beloftes en sy begeertes wortel. Ware vrede van hart word altyd op die waarheid gebou – die waarheid van wie God is, wie jy in Hom is en hoe God wil hê jy teenoor Hom en ander mense moet optree.
Om God se waarheid te ken, is om God se vrede te ervaar. Wanneer jy daarna streef om hierdie soort vrede na die harte van ander te bring, tree jy soos jou hemelse Vader op. Dit is God se begeerte dat jy met Hom versoen moet word en verlossing en ware hartsvrede moet ervaar. ‘Onderwerp jou aan God, dan sal jy vrede hê en sal alles met jou goed gaan’ (Job 22:21 NLV).
Paulus het gesê: ‘As mense wat deur God vrygespreek is omdat ons glo, is daar nou vrede tussen God en ons op grond van wat Jesus Christus ons Here gedoen het’ (Romeine 5:1 NLV). Ons uiteindelike rol as vredemakers is nie net om ander mense aan te spoor om in vrede met mekaar te leef nie, maar ook in vrede met God.
Sielskos: Jer 10-13; Luk 21:20-24; Ps 69:1-18; Spr 8:27-29
2026-03-26
Matteus 5:8 AFR83
Die Griekse woord vir ‘rein’ is katharos, waarvandaan ons ons Engelse woord ‘catharsis’ kry. Psigiaters praat van ‘n katarsis as die reiniging van ‘n persoon se vernietigende denkwyses. Die Bybelse woord verwys na ‘n reiniging wat alle onsuiwerhede uit jou innerlike gees verwyder – onsuiwerhede wat bose gedagtes, bose begeertes, wellus van die vlees en valse roem op besittings, insluit (sien 1 Johannes 2:16). Om rein te wees, is om al hierdie onsuiwerhede te verwyder sodat jy Christus Jesus se karakter kan weerspieël.
Een van die grootste probleme in ons samelewing en selfs in baie kerke, is dubbelsinnigheid. Ons het gemengde motiewe, ‘n verdeelde verstand en hart. Ons moet ophou om ons lewens apart te hou, sodat ons op een manier rondom mede-Christene praat en optree en op ‘n ander manier rondom diegene wat Christus nie ken nie.
Om rein van hart te wees, beteken om integriteit te hê – om jou hart, jou kop en jou hande met die gebooie van God in lyn te bring en te integreer. Wanneer jy integriteit het, sê jy wat jy doen en doen wat jy sê. Jesus het baie duidelik gesê: ‘Niemand kan tegelyk twee base dien nie…’ (Matteus 6:24 NLV).
‘Geseënd is dié wat rein van hart is, want hulle sal God sien.’ Diegene wat rein van hart is, sien God se liefdevolle hart en barmhartigheid in elke Skrifgedeelte. Hulle sien dat God omstandighede vorm, gebruik en ontwerp om sy doeleindes te dien. Hulle sien God te midde van hul eie probleme, pyn en lyding. Wanneer jou hartsbegeerte is om God beter te sien en te ken, sal Hy daardie begeerte vervul.
Sielskos: Jer 7-9; Luk 21:1-19; Ps 38:13-22; Spr 8:24-26
2026-03-25
Matteus 5:7 AFR83
Barmhartigheid is meer as vergifnis, minder as liefde, anders as genade en een met geregtigheid. Vergifnis spring eers aan die werk wanneer ‘n oortreding gepleeg word, maar barmhartigheid is te alle tye operasioneel. Barmhartigheid lei tot en bring vergifnis voort, maar barmhartigheid is meer as vergifnis. Barmhartigheid reik na die swakkes, die behoeftiges en diegene wat beskerming en leiding nodig het, uit.
Net soos vergifnis uit barmhartigheid vloei, vloei barmhartigheid uit liefde. Liefde is die bron van barmhartigheid, maar liefde is groter as barmhartigheid – dit bestaan los van enige behoefte of sonde. Barmhartigheid bied verligting van straf, maar genade bied volkome vergifnis. Barmhartigheid verlig ons pyn, maar genade genees die siekte. Barmhartigheid sien foute oor, maar genade vergeet die foute.
God is terselfdertyd beide barmhartig en regverdig. Barmhartigheid wat sonde ignoreer of weier om dit te hanteer, is valse barmhartigheid. Geregtigheid vereis dat ons sonde in die gesig staar en dit hanteer. Barmhartigheid gee ons die voorreg om sonde in die gesig te staar en dit te hanteer, sodat ons vergewe kan word.
Jesus het gesê: ‘Geseënd is dié wat barmhartig is, want aan hulle sal barmhartigheid bewys word.’ Hoe meer barmhartigheid ons betoon, hoe meer barmhartigheid ontvang ons van God. Ons moet kanale vir God se barmhartigheid wees, met ‘n steeds toenemende kapasiteit om dit aan ander te bewys. Die persoon wat barmhartigheid betoon, word van emosionele kettings losgemaak, van geestelike slawerny bevry en van die bitterheid wat geestelike groei belemmer, bevry.
Barmhartigheid wat van God na ons vloei, verwyder die dinge wat ons verhinder om heel te word. Die goeie nuus is dat ons nooit gevra sal word om meer barmhartigheid aan ander te bewys as wat God aan ons bewys nie.
Sielskos: Jer 4-6; Luk 20:27-47; Ps 38:1-12; Spr 8:22-23
2026-03-24
Matteus 5:6 NLV
Geregtigheid is nie ‘n opsionele geestelike bysaak nie; dit is ‘n noodsaaklikheid vir ‘n Christelike lewe. Dit is iets wat jy net soveel moet begeer as wat ‘n honger man kos en ‘n dorstige man water begeer. Honger jy na meer van Jesus? Het jy ‘n aptyt vir sy Woord? Verlang jy daarna om die koninkryk van God te ervaar? Indien wel, sê Jesus dat jy ‘bevredig’ sal word. Hy sal jou meer van Homself gee.
Wanneer jy na geregtigheid honger, sal Hy jou die krag van ‘n regverdige lewe gee – om God se gebooie te onderhou en die leiding van die Heilige Gees dag vir dag te volg. Die Here sal jou die krag gee om ‘nee’ vir geleenthede wat nie reg in sy oë is nie, te sê. Hy sal jou ook die krag gee om vir daardie dinge wat van ewige voordeel is ‘ja’ te sê en om sy krag vir die regte besluite, regte dade en regte woorde op die regte tye, in die regte situasies, vir die regte resultate te gebruik. Die Here sal jou met die vermoë vul om sy agent by die huis, by die skool, in jou werkplek, in die politieke arena en in die kerk te wees.
Wanneer jy na geregtigheid honger en dors, sal God jou met sy teenwoordigheid, sy krag en sy vrede bevredig. Wanneer jy waarlik meer van die Here begeer, sal jy meer van die Here ontvang, tot by die punt waar jy tot oorlopens toe gevul sal wees. God kom sy beloftes na en Hy sal ook hierdie een nakom: ‘Gelukkig is dié wat honger en dors na wat voor God reg is, want Hy sal julle hartsverlange bevredig.’
Sielskos: Jer 1-3; Luk 20:20-26; Ps 55:12-23; Spr 8:19-21
