2026-06-19
Job 33:14-15 NLV
God is die gewer van drome. ‘Maar God praat op verskillende maniere… Hy praat deur drome en visioene, in die nag wanneer mense diep slaap’ (verse 14-15 NLV). Tensy jy die res van jou lewe onvervuld en ongeïnspireerd wil leef, moet jy jou droom uit die kas haal en die stof afblaas. Dis maklik om in die ‘moets’ van die lewe vasgevang te raak – werk; om na kinders, eggenote en bejaarde ouers om te sien; die huishouding te bestuur, ens.
Jy moet egter glo dat jy jou drome kan laat herleef en glo dat jy die vermoë het om die entoesiasme wat jy eens vir die lewe gevoel het, te ontsluit. Jy moet die moed hê om die teleurstellings van die verlede in die gesig te staar en uit te pluis hoekom jy laas van die pad afgewyk het. Dan moet jy die stem in jou kop stilmaak wat sê: ‘Wie is jy om meer uit die lewe te wil hê? Jy kan dit nie doen nie; dis te laat vir jou.’
Ons gee moed op met ons drome omdat ons dink dis wat grootmense veronderstel is om te doen. Soos ons egter volwasse word, besef ons dat dit die strewe na ons drome is wat ons lewendig laat voel. Die waarheid is dat jou droom, soos Lasarus, met liefde, gebed en groot aandag, opgewek kan word (sien Johannes 11:43).
Die geheim om drome te laat herleef is om die proses daarvan te geniet, eerder as om op die uitkoms daarvan te fokus. Prestasie gaan in hierdie geval nie oor posisie, roem of finansiële vergoeding nie, maar om dit te doen wat jy liefhet. Dit is wat Jesus belowe het: ‘…Ek het gekom sodat hulle lewe kan hê, ja, om dit oorvloedig te hê’ (Johannes 10:10 NLV).
Sielskos: Eseg 46-48; Matt 20:29-34; Ps 139:13-24; Spr 15:31-33
2026-06-18
Filippense 4:8 NLV
Marcial Losada is ‘n bedryfsielkundige wat die krag van positiwiteit bestudeer. Hy argumenteer dat ons negatiewe terugvoer nodig het om te oorleef. Sonder regstellings in die middel van die proses, maak ons gedagteloos aanhoudend dieselfde foute. As jy egter wil floreer, het mens ook positiewe terugvoer nodig. Sy studies het die sogenaamde Losada-verhouding opgelewer: dit is die verhouding van positiewe terugvoer tot negatiewe terugvoer in ‘n stelsel. Dit maak nie saak of daardie stelsel ‘n kerk, ‘n gesin of jou werkplek is nie, daar moet ten minste 2.9 positiewe terugvoer vir elke negatiewe terugvoer wees.
Wat is dus jou verhouding as eggenoot, ouer, werknemer, of vriend? Negatiewe terugvoer is geneig om meer gewig te dra en langer te hou, dus moet dit uitgebalanseer word. ‘n Goeie reël is om drie komplimente vir elke klagte te gee. In plaas daarvan om na foute te soek, moet jy oefen om mense te betrap waar hulle dinge reg doen. Hier is nog ‘n paar dinge wat jy kan doen om positief te bly:
1) Memoriseer en mediteer oor die beloftes van God se Woord en anker jouself daaraan.
2) Skryf in ‘n dankbaarheidsjoernaal. Dit sal jou laat besef hoe geseënd en welgesteld jy is.
3) Kweek die gewoonte aan om ‘n hartlike briefie aan mense wat jy waardeer, te stuur. Dit sal jou net twee minute neem, maar jy kan iemand se dag, of selfs iemand se jaar, maak!
4) Vind ‘n manier om ‘oorwinnings’ met jou familie en in jou werkplek te deel. Dit het die krag om die fokus te verskuif en die kultuur te verander. Dit sal jou ook op ‘n kragtige nuwe manier aan jou kinders en jou kollegas anker.
Sielskos: Eseg 43-45; Matt 20:17-28; Ps 139:7-12; Spr 15:28-30
2026-06-17
Jeremia 29:13 NLV
Fanny Crosby, die bekende gesangeskrywer, het gesê dat sy nooit ‘n gesang probeer skryf het sonder om eers in gebed te kniel nie. Aangesien sy ongeveer 8 000 liedere geskryf het, was sy duidelik ‘n vrou van gebed! Geliefde gesange soos ‘Blessed Assurance,’ ‘To God be The Glory’ en ‘I am Thine, O Lord’ is uit tye van gebed gebore. Soos baie kreatiewe mense, was sy dikwels onder druk om sperdatums te haal. Eenkeer het sy probeer om lirieke vir ‘n deuntjie wat deur W.H. Doane gekomponeer is, te skryf. Sy kon blykbaar net nie die woorde vind nie, maar toe onthou dat sy vergeet het om eers te bid. Toe sy van haar knieë af opstaan, het sy – so vinnig as wat haar assistent kon skryf – die woorde vir die beroemde gesang, ‘Jesus, Keep Me Near the Cross,’ gedikteer.
‘n Ander keer het sy vyf dollar vir iets spesifieks nodig gehad, maar sy was platsak. Daar was geen tyd om haar bankier te raadpleeg nie, dus het sy eenvoudig vir die geld gebid. Toe haar gebed klaar was, het sy heen en weer in haar kamer begin loop en probeer om in die regte stemming te kom om te skryf. Net op daardie tydstip klop ‘n bewonderaar aan haar deur. Die twee het kortliks gesels en met hul afskeid het die vrou iets in Fanny se hand gedruk. Dit was ‘n vyfdollar-noot! Fanny het op haar knieë geval om God te bedank en direk daarna een van haar bekendste gesange geskryf: ‘All the Way My Saviour Leads Me.’
Die geheim tot Fanny Crosby se sukses is nie ‘n ‘geheim’ nie. Voordat sy enigiets vir God probeer doen het, het sy eers God vir hulp genader. Die woord vir jou vandag is dus – bid daaroor!
Sielskos: Eseg 40:10-42:20; Matt 20:1-16; Ps 139:1-6; Spr 15:25-27
2026-06-16
Handelinge 20:24 AFR83
Voordat hy die leiers van die kerk in Efese vir die laaste keer verlaat het, het Paulus vir hulle gesê: ‘Ek weet dat die Heilige Gees my in elke stad verseker dat gevangenskap en vervolging op my wag. Maar al is my lewe vir my kosbaar, reken ek dit van geen belang nie as ek maar net my lewenstaak kan voltooi en die dienswerk wat ek van die Here Jesus gekry het, kan klaar maak: dit is om die evangelie van God se genade te verkondig’ (verse 23-24 AFR83).
Daar is twee maniere om ‘n probleem te hanteer: 1) Bid en glo dat God dit sal verwyder, soos Hy met die mure van Jerigo gedoen het. 2) Ontgroei die probleem.
In die 1920’s het ‘n Engelse avonturier genaamd Mallory ‘n ekspedisie om Mount Everest te probeer verower, gelei. Sy eerste twee pogings het misluk. Met sy derde poging is hy en die meeste van sy span in ‘n sneeustorting uitgewis. Met hul terugkeer na Engeland het die paar wat oorleef het, ‘n banket gehou om Mallory en diegene wat omgekom het, te vereer.
Die leier van die oorlewendes het tydens sy bedankingstoespraak sy rug op die skare gedraai en na ‘n groot prentjie van Mount Everest teen die muur, wat soos ‘n stil, onoortreflike reus bo hom uitgetroon het, gekyk. Met trane wat oor sy gesig stroom, het hy namens sy oorlede vriende met die berg gepraat: ‘Ek spreek tot jou, Mount Everest, in die naam van alle dapper mans en vroue wat leef en dié wat nog gebore moet word. Mount Everest, jy het ons een keer verslaan; jy het ons twee keer verslaan; jy het ons drie keer verslaan. Ons sal jou egter eendag verslaan, want jy kan nie groter word nie – maar ons kan.’
Sielskos: Eseg 37:1-40:9; Matt 19:15-30; Ps 73:17-28; Spr 15:22-24
2026-06-15
Hosea 6:3 NLV
Die Here het die kerk in Efese daarvan beskuldig dat hulle hulle eerste liefde versaak het (sien Openbaring 2:4) en die kerk van Laodisea dat hulle nie warm of koud is nie, maar louwarm (sien Openbaring 3:15-16).
Lees die volgende Skrifgedeeltes noukeurig en biddend: ‘Moenie sê: ‘Waarom was die ou dae beter as die huidige?’ nie. Dit is nie uit wysheid dat jy daaroor vra nie’ (Prediker 7:10 NLV). ‘Die pad van die regverdiges is soos die lig met dagbreek. Dit word al helderder totdat die volle dag aanbreek’ (Spreuke 4:18 NLV). ‘Kom laat ons die Here ken! Laat ons ons inspan om ons aan Hom toe te wy! Dan sal Hy ons antwoord. Dis so seker as die aanbreek van die nuwe dag of die koms van die reën, die lentereëns wat die grond deurweek’ (Hosea 6:3 NLV). ‘Wanneer Hy ook al kom, die Gees van die waarheid, sal Hy julle begelei in die volle waarheid. Hy sal nie uit Homself praat nie, maar net sê wat Hy hoor. Hy sal die dinge wat gaan kom, aan julle meedeel. Hy sal My verheerlik omdat Hy dit wat Hy van My ontvang het, aan julle meedeel’ (Johannes 16:13-14 NLV).
‘Vra My, en Ek sal jou ‘n antwoord gee. Ek sal jou van ongelooflike dinge vertel. Dit is nou nog vir jou ‘n geheim, en jy weet niks daarvan nie’ (Jeremia 33:3 NLV). ‘Mag julle in staat wees om saam met al God se mense te begryp hoe breed en lank en hoe hoog en diep sy liefde is. Dan sal julle Christus se liefde, wat alle verstand te bowe gaan, beleef. Mag julle heeltemal met die volheid van God vervul word’ (Efesiërs 3:18-19 NLV).
Die woord vir jou vandag is – God het meer vir jou in gedagte.
Sielskos: Eseg 34-36; Matt 19:1-14; Ps 73:1-16; Spr 15:18-21
2026-06-14
Romeine 8:35 NLV
Paulus het gevra: ‘Kan enigiets ons ooit van Christus se liefde skei?’ Die antwoord is nee – niks nie! Nie eers ‘…dinge soos lyding of benoudheid of vervolging, honger of koue, of gevaar of doodsdreiging…’ (vers 35 NLV), sal dit regkry nie. ‘Ontbering’ het Paulus laat terugdink toe hy op ‘n skip in die Middellandse See tydens ‘n verskriklike tifoon was. ‘Vervolging’ het hom aan die feit dat hy by Listra gestenig en vir dood agtergelaat is, herinner. ‘Beproewinge’ het Paulus laat onthou dat hy voor Nero self tereggestaan het.
Hy het ook honger gely, is deur ‘n giftige slang gebyt, en die klere is van sy rug afgeskeur sodat hy gegésel kon word. Dit het ook nie net een of twee keer gebeur nie. Vyf keer het hy die maksimum vonnis ontvang – veertig houe minus een. Paulus se rug is met ‘n sweep geslaan en met 195 letsels deurkruis.
Ontbering het een van twee gevolge: dit verhard of versag ons harte. Dis daardie verharding of versagting wat ons maak of breek. Volgens een meningspeiling onder Londenaars het 60 persent van diegene wat Duitsland se blitzkrieg tydens die Tweede Wêreldoorlog oorleef het, dit as die gelukkigste tyd van hul lewens onthou. Dis die moeilike tye wat ons liefde toets. Dis egter ook hoe dit bewys word.
Die liefde van Christus is nie deur sy wonderwerke bewys nie – dit is aan ‘n Romeinse kruis bewys. Dit het bewys dat Christus se liefde onfeilbaar is. Dus, maak nie saak watter probleme, ontbering of vervolging jy in die gesig staar nie, dit sal ook verbygaan. Jesus is by jou en Jesus is vir jou. Niks, absoluut niks, kan jou van sy liefde skei nie!
Sielskos: Matt 5:5; Ps 37:1-11; Sef 2:3
