God wil hê dat jy sukses moet behaal (1)

Sommige mense dink dat God se hoofdoel is om hulle siele te red, om hulle te help om so moreel opreg en geestelik volwasse as moontlik te word en om hulle eendag hemel toe te neem om saam met Hom daar te woon. In ‘n sin is dit waar. Hierdie siening dink egter dat God nie in jou werk, jou gesondheid, jou verhoudings, jou finansies of jou drome en doelwitte geïnteresseerd is nie, omdat hierdie dinge wêrelds, vleeslik en tydelik is. Kom ons kyk na die Skrif en sien wat God regtig hieroor sê. Die waarheid is inteendeel die teenoorgestelde (sien Josua 1:8; Jesaja 48:17; 3 Johannes 2). Deur te glo dat God geen deel daaraan het om sukses in jou beroep of finansiële sekuriteit te behaal nie, is in direkte teenstelling met wat sy Woord sê. Wanneer jy dit glo, beweeg jy op gevaarlike terrein, omdat jy jouself die enigste bron van jou sukses maak – en die Bybel noem dit trots! Wat Jesus ons geleer het is as volg: ‘Moet julle dus nie bekommer en vra: ‘Wat sal ons tog eet?’ of: ‘Wat sal ons drink?’ of: ‘Wat sal ons aantrek?’ nie. Dit is die ongelowiges wat oor hierdie soort dinge begaan is. Julle hemelse Vader weet tog dat julle dit alles nodig het. Nee, maak die koningsheerskappy van God en dit wat voor Hom reg is, julle prioriteit; dan sal God vir julle al hierdie ander dinge byvoeg’ (Matteus 6:31-33 NLV). Kom ons wees dus duidelik: God wil hê dat jy om die regte redes sukses in die lewe moet behaal; en Hy wil hê dat jy al die dinge sal hê wat jy nodig het om dit te doen.

Sielskos: Matt 17:1-9; Joh 19:25-27; Op 1:1-11