2018-05-26
Galasiërs 6:2 DB
Wanneer ‘n vriend of familielid ‘n krisis ervaar, moet jou doel wees om hulle te help om dit te hanteer en daardeur te groei. Soms is dit makliker gesê as gedaan! Soos wat hulle seer harte by die nuwe omstandighede aanpas, sal hulle dalk skepties wees oor wie hulle kan vertrou. Om daar te wees vir hulle is egter waaroor die koninkryk van God gaan! ‘Help ander gelowiges wat swaarkry…’ (vers 2 NLV). Jou toewyding kan ‘n betekenisvolle rol in iemand se reis om weer emosioneel gesond te word, speel. Hier is drie praktiese voorstelle: 1) Moenie van hulle verwag om kontak te maak nie. Dis algemeen van mense wat ‘n krisis ervaar om te onttrek eerder as om vir hulp te vra. Dikwels is hulle te ontsteld om te weet wat hulle nodig het, so jy sal heel waarskynlik die eerste tree moet neem. Moet ook asseblief nie voel asof jy ‘n kundige moet wees nie. Twee eenvoudige stappe kan die persoon wat seer het gewaardeerd laat voel en laat voel asof jy hulle seerkry verstaan: a) Luister versigtig na hulle bekommernisse en persepsies. b) Behou oogkontak en stel waarlik belang. 2) Help om hulle angs te verminder. Bied ‘n kalmerende teenwoordigheid deur hulle uit te nooi om hulle gevoelens te deel. As hulle denkwyse verwring voorkom, sê iets soos, ‘Mag ek ‘n ander manier voorstel om na dinge te kyk?’ 3) Help hulle om te fokus op dit wat belangrik is. Hulle voel oorweldig, help hulle dus om op die sake te fokus wat hulle onmiddellike aandag moet geniet. In plaas van om oor die verlede te tob en oor die toekoms bekommerd te wees, moedig hulle aan om op die huidige oomblik te konsentreer en vir die hier en nou te leef (sien Matteus 6:34).
Sielskos: Rig 16:1-19:15; Mark 11:12-26; Ps 47; Spr 13:11-12
2018-05-25
Romeine 12:8 NLV
Ons sê, ‘Dis nie my verantwoordelikheid nie. Ek wil nie betrokke raak nie!’ Het jy al ooit hierdie woorde gesê? Jy mag dalk dink dat jy ‘n goeie rede gehad het – miskien was dit ‘n ongerieflike tyd – maar die punt is dat jy nie aangebied het om iemand in nood te help nie. Jy is nie alleen nie. Navorsing wys dat die neiging om betrokkenheid te vermy wêreldwyd aan die toeneem is. Nietemin is dit ‘n Bybelse mandaat om ‘daar te wees’ vir ander mense; dis die praktiese toepassing daarvan om God en jou naaste lief te hê (sien Matteus 22:37-39). Krisisse doen hulle gewoonlik op drie maniere voor: 1) Situasie krisisse wat ernstige siektes, die dood van ‘n geliefde of die ineenstorting van familieverhoudings insluit. Die patriarg Job het almal van hulle ervaar! 2) Krisisse wat as gevolg van die verloop van tyd ontwikkel – om die huis te verlaat, om universiteit toe te gaan, huweliksaanpassings, ouerskap, aftrede of gesondheid wat afneem. Abraham en Sara het van hierdie tipe krisisse geweet. Hulle het hulle huis en familie verlaat en jare van kinderloosheid verduur. Toe het God hulle nog boonop gevra om hulle ‘wonderwerk’ seun te offer. 3) Self-bewuste krisisse is wanneer jy ontstellende waarhede oor jouself ontdek – jy word vertel dat jou siekte, menslik gesproke, nie behandelbaar is nie, of jy sien jouself as ‘n mislukking omdat jy te oud voel om jou lewensdoelwitte te bereik. Miskien staar die realiteit jou in die gesig dat jy geskei of ‘n wewenaar of weduwee is, of jy voel as gevolg van jou agtergrond verwerp. Mense soos Elia en Jona is voorbeelde van self-bewustelike krisisse. Laat enige van hierdie voorbeelde jou aan iemand dink? Wees dan daar vir hulle.
Sielskos: Rig 12-15; Mark 11:1-11; Ps 97; Spr 13:9-10
2018-05-24
Spreuke 22:29 NLV
Hier is ‘n gebed vir sukses by die werk: ‘Here, ek dank U vir die manier wat U my gemaak het, vir die baie gawes en talente wat U in my geplaas het en ek vertrou dat ek die beste persoon vir die werk is. Ek is dankbaar vir ieder en elke persoonlikheid waarmee ek werk, selfs diegene wat ek nie regtig van hou of verstaan nie. Ek vra dat my fokus gedurende my tyd in hierdie posisie, op die doelwitte wat U vir my gestel het, sal wees. Gee my die wysheid en insig om die werk te kan doen, selfs te midde van ‘n vyandige omgewing. Help my om te verstaan wat U my hier wil leer en gee my geduld soos U my vir die toekoms voorberei. Help my om my beste te lewer en altyd positief en hoopvol te bly. Stil die klagtes en teleurstellings van my hart deur U perfekte vrede en laat my toe om U met my werk te vertrou. Klee my in die kledingstukke van lof en die regverdigheid van Christus sodat ek U by die werk kan verheerlik. Laat my toe om my ware identiteit te ken, om in U guns te wandel en om U, meer as die mense waarmee ek werk, te probeer tevrede stel. Waar daar twis is, laat my ‘n vredemaker wees. Waar daar bedrog is, laat my die waarheid praat. Waar daar wanhoop is, laat my hoop bring. Waar daar vrees is, laat my geloof bring. Waar daar donkerte is, laat my lig bring. Waar daar hartseer is, laat my vreugde bring. Hierdie dinge vra ek in Jesus se Naam. Amen.’
Sielskos: Rig 9:34-11:40; Mark 10:35-52; Ps 129; Spr 20:25; Pred 5:4-6
2018-05-23
1 Konings 3:9 DB
Dr John Maxwell skryf: ‘Verskeie jare gelede het ek met ‘n groep bestuurders gepraat, toe iemand my vra watter beginsels ek volg wanneer ek mense in diens neem. ‘Ek het net een reël,’ het ek verduidelik. ‘Ek laat dit aan iemand anders oor.’ Dit het hulle aandag getrek. ‘Ek is baie sleg daarmee. Omdat ek so optimisties is en ‘n hoë dunk van mense het, is ek onrealisties. Dit maak nie saak watter rooi vlae in ‘n onderhoud opduik nie, ek dink altyd: Ek kan hierdie persoon help om te verbeter en sukses te behaal. Dis nie die regte houding vir iemand wat onderhoude voer nie. Om suksesvol in hierdie area te wees, het jy mense nodig wat skepties is – die tipe individue wat nie eens hulle eie moeder sal aanstel nie. Toe ek ophou om mense aan te stel, het dit my organisasie na ‘n heel nuwe vlak toe geneem.’ Toe ek vir die bestuurders sê dat ek nie meer in beheer van aanstellings is nie, kon ek sien dat hulle eerste reaksie negatief is. Soos ek egter verduidelik het, kon ek sien dat hulle die feit dat ek my eie swakpunte ken, waardeer en hulle het my eerlikheid gerespekteer. Daar is min dinge erger as iemand wat nie weet waarvan hy praat nie, dinge opmaak soos hy aangaan en voorgee dat hy kundigheid het terwyl hy nie ‘n idee het wat aangaan nie.’ As jy in die verlede die verkeerde mense aangestel het, delegeer die werk aan iemand wat goed is daarmee. As jy dit egter self moet doen, bid Salomo se gebed: ‘…Gee vir my die insig om regverdig te wees en tussen goed en kwaad te kan onderskei… Hoe kan ek sonder u hulp hierdie groot volk van U regeer?’
Sielskos: Rig 7:1-9:33; Mark 10:23-34; Ps 93; Spr 13:7-8
2018-05-22
Psalm 107:13-14 NLV
God is in die besigheid om mense te bevry – moreel en geestelik. Toe die Israeliete in slawerny vasgevang was, ‘…het hulle geroep, en Hy het hulle uit die nood bevry’ (vers 13 NLV). Jesus doen dit steeds vandag, en ‘As die Seun van God dus sê julle is vry, is julle regtig in God se gesin vry’ (Johannes 8:36 DB). Volg dus hierdie stappe na vryheid: 1) Roep God aan. Hy het gesê, ‘As julle heelhartig na My soek, sal julle My vind’ (Jeremia 29:13 NLV). Israel se roep het herhaaldelik uit die hart gekom en God reageer steeds op hartsroepe. Verlossing begin by die erkenning van jou totale afhanklikheid van Hom. In plaas daarvan om dit alles op jou eie te hanteer, sê die Bybel, ‘Gee al julle bekommernisse aan God oor, want Hy gee vir julle om’ (1 Petrus 5:7 NLV). 2) Voed jou siel geestelik. Jesus het gesê, ‘Ek is die brood wat lewe gee… As iemand van hierdie brood eet, sal hy vir altyd lewe…’ (Johannes 6:51 NLV). As jy van God se Woord eet en jou gevoelens in gebed deel, sal Hy jou las ligter maak en jou siel voed. Hy het gekom om ‘…aan te kondig dat gevangenes vrygelaat sal word… dat onderdruktes bevry sal word…’ (Lukas 4:18 NLV). Neem tyd om oor God se Woord te mediteer. Reflekteer daarop totdat jy verstaan hoe dit op jou lewe van toepassing is. Kennis sonder die toepassing daarvan is nutteloos. Vryheid benodig die daaglikse inname van die Skrif en die toepassing daarvan op jou huidige omstandighede. ‘Gelukkig is die mense wat… vreugde vind in die gebooie van die Here en sy voorskrifte dag en nag oordink’ (Psalm 1:1-2 NLV). Doen dit elke liewe dag – en wees vry!
Sielskos: Rig 4-6; Mark 10:13-22; Ps 88:9b-18; Spr 13:4-6
2018-05-21
Eksodus 3:8 NLV
Vir vierhonderd jaar was die Israeliete slawe vir Egiptenaars wat hulle onderdruk en ‘…die lewe bitter swaar gemaak het vir [hulle]…’ (Eksodus 1:14 NLV). Baie van ons kan hulle gevoel van hulpeloosheid verstaan wanneer ons aan die areas in ons eie lewens waar ons met verslawing sukkel, dink. Of dit nou kos, alkohol, dwelms, seks, geld of afbrekende verhoudings is, ons het al almal die sin van magteloosheid ervaar in ons herhaalde pogings om daarvan vry te breek. Gebroke en platgeslaan, het Israel tot God geroep en Hy het geantwoord, ‘…Jy kan seker wees dat Ek gesien het hoe swaar my volk in Egipte kry. Ek het gehoor hoe hulle teen hulle slawedrywers om hulp roep. Ek is baie bewus van hoe swaar hulle kry’ (Eksodus 3:7 NLV) Let op hoe God deernis aan hulle bewys het: ‘Daarom het Ek gekom om hulle van die Egiptenaars te bevry en hulle weg te lei uit Egipte na hulle eie mooi, groot land. Dit is ‘n land met oorgenoeg kos…’ (vers 8 NLV). God het gekom om hulle op te help – en Hy kan vandag dieselfde vir jou doen. Israel se verlossing is deur die slag van ‘n vlekkelose paaslam bewerkstellig. Hulle het sy bloed aan hulle deurkosyne gesmeer en die engel van die dood het hulle oorgesien. Die Bybel sê, ‘…Ook vir ons is daar immers ‘n Paaslam geslag – Christus’ (1 Korintiërs 5:7 NLV). Jesus Christus, ons Offerlam, het sy bloed gegiet om ons vry te stel van wat ook al dit is wat van ons slawe maak. Waarmee worstel jy vandag? Jy kan uit slawerny bevry word – nie deur jou eie vergeefse pogings nie – maar deur God te vertrou wat die roep van sy mense beantwoord.
Sielskos: Rig 1-3; Mark 10:1-12; Ps 88:1-9a; Spr 13:1-3
