2018-06-07
Spreuke 18:24 NLV
Verhoudingsbegeertes: Jonatan was die troonopvolger, maar hy het dit vrywilliglik opgegee omdat hy geweet het dat sy vriend, Dawid, God se keuse vir die koningskap was. Jonatan se begeerte om ‘n vriend te wees was groter as sy begeerte om koning te wees. Hoe dikwels gebeur so iets? Hy het ook nie Dawid se vriend geword omdat hy enige bymotiewe gehad het nie. Hy het eenvoudig net van Dawid gehou en hulle vriendskap het Israel se koers verander. Ons almal het verhoudingsbegeertes wat ons nie nastreef nie. Tensy ‘n diep, betekenisvolle verhouding in ons skote val, gee ons op. Vriendskappe soos dit gebeur nie net sommer nie; Jonatan moes ongelooflike struikelblokke oorkom om ‘n vriendskap met Dawid te bou. Soms sal jy dieselfde moet doen, en God sal jou daarmee help. John Ortberg skryf: ‘My vriend Chuck het die geestelike gawe om ‘n ontbyt te gebruik. Hy ontmoet mense in die Amerikaanse restaurant, Waffle House. Die kelnerin hou daarvan om hom te bedien omdat hy goeie fooitjies los en almal laat lag. Hy is regtig snaaks en heeltemal oop oor sy eie gebrokenheid, wat mense teenoor hom laat oopmaak soos tulpe in die son. Hy voel God se teenwoordigheid die meeste aan wanneer hy in die Waffle House sit en toegelaat word om in iemand se siel te sien. Dit is nie net die koffie wat mense na hom toe bring nie; dis die riviere van lewende water wat uit hom uit vloei.’ As jy inherent skaam is, is hier ‘n wenk vir jou: Die kans is goed dat die persoon waarna jy graag wil uitreik ook skaam is. Gaan maak kontak en kyk wat gebeur. Wie weet, jy kan dalk die antwoord op hulle eensaamheid word en hulle die antwoord op joune.
Sielskos: Eseg 10-13; Mark 14:27-42; Ps 124; Spr 14:21-24
2018-06-06
Psalm 37:4 NLV
Die begeerte om te presteer: Die eerste ding wat God vir Adam gesê het was: ‘…Wees vrugbaar en vermeerder en vul die aarde… en heers oor… die aarde’ (Genesis 1:28 NLV). Die rede hoekom jy so ‘n sterk begeerte het om iets in die lewe te bereik, is omdat God jou so geskep het. Min mense is meer as Paulus deur prestasie gemotiveer: ‘Al is my lewe kosbaar, ag ek dit van geen waarde as ek nie my lewenstaak en my bediening wat ek van die Here Jesus gekry het, kan klaarmaak nie…’ (Handelinge 20:24 NLV). God het nie Paulus se begeerte om te presteer weggeneem nie; Hy het dit ingespan sodat Paulus God se wil kon vervul. ‘n Sterk beroepsgeoriënteerde dryfkrag, tesame met die begeerte om te leer en te presteer, kan ‘n goeie ding wees, tensy dit tot werkverslawing, statusafhanklikheid of die manipulering van ander mense lei. Wanneer dit gebeur, moet jy jou motivering herevalueer. As dit egter nie die geval is nie en jy bevind jouself waar jy met ‘n vuur binne-in jou in God groei om iets te bereik – gaan voort en presteer. Oefen heerskappy uit! Gebruik jou vaardighede om goeie dinge vir ander te bereik. Op daardie punt, of jy nou tot ‘n vergadering bydra, waarde tot jou span voeg of idees formuleer, sal jy weet dat dit meer as net jou eie vaardighede is. Wanneer jy rasionele vaardighede ontwikkel wat jou in staat stel om ‘n band met kliënte en kollegas te vorm, kan jy gelyktydig vir hulle bid en hulle seën. Soos jy vreugde in jou prestasies kry, is jou lewe vir God behaaglik. ‘n Woord van advies: Elke nou en dan, onthou om te stop en Hom te bedank dat jy iets waarvoor jy lief is, kan doen!
Sielskos: Eseg 5-9; Mark 14:12-26; Ps 4; Spr 14:17-20
2018-06-05
Spreuke 13:12 NLV
Kom ons kyk vir die volgende paar dae na van ons algemeenste begeertes. Materiële begeertes: Lydia was ‘n besigheidsvrou wat in wolmateriaal gehandel het (sien Handelinge 16:14). Sy was een van Paulus se eerste bekeerlinge. Kan jy dink wat dit van ‘n vrou geverg het om in so ‘n patriargale samelewing suksesvol te wees? Sy was so suksesvol dat sy haar eie huis besit het. Hierdie huis was groot genoeg om die vergaderplek vir die eerste kerk in die geskiedenis van Europa te wees. Van al die godsdienstige geboue wat oor die eeue gebou is – Notre Dame, Westminster Abdy en die Sistyne kapel – was die eerste kerk die huis van hierdie besigheidsvrou. Nou, as jou begeerte om geld te maak jou vrygewigheid wurg, jou in skuld laat lewe of kroniese ontevredenheid skep, is dit tyd om dit waarmee jy besig is, te herevalueer. Dis God-gegewe begeertes om geld te maak, goeie produkte te skep en mense in diens te neem. ‘Onthou altyd dat dit die Here jou God is wat vir jou die krag gee om ryk te word…’ (Deuteronomium 8:18 NLV). Het jy al ooit gewonder hoekom jy dit geniet om met enjins te peuter of om met jou hande te werk? Dis omdat jy na die beeld van ‘n kreatiewe God geskape is wat hierdie ongelooflike kosmiese masjien met soveel kragte en energie geskep het, dat mense briljante wetenskaplike beroepe daaraan toewy om net ‘n klein deeltjie daarvan te verstaan. Die Bybel sê, ‘…Groot is die Here wat Hom verheug in die vrede van sy dienaar’ (Psalm 35:27 NVL). Wanneer jou begeerte na materiële sukses gebruik word om God mee te loof en ander mee te seën, sal Hy jou help om sukses te behaal.
Sielskos: Eseg 1-4; Mark 14:1-11; Ps 121; Spr 14:13-16
2018-06-04
2 Timoteus 3:16 DB
Paulus het aan Timoteus geskryf: ‘Die klomp skelms gaan net woester en slegter word… Hulle lei ander op die verkeerde pad omdat die duiwel húlle op die verkeerde pad gelei het. Maar jy, Timoteus, moet jou nie ‘n duim van koers af laat bring nie. Bly by die dinge wat vir jou geleer is en wat jy weet waar is…Toe jy nog klein was, het jy al die Skrif gelees. Jy kan baie daaruit leer, soos hoe ‘n mens se saak met God weer reggemaak kan word deur op Christus Jesus te vertrou. Die hele Skrif kom direk van God af… Dit help ons om te wys waar mense die pad byster raak en om hulle weer reg te help. Uit die Skrif kan ons ook vir mense wys hoe God wil hê hulle moet leef. Op dié manier sal iemand wat God s’n is, weet wat God van hom verwag en só reg wees om behoorlik vir God te kan werk’ (verse 13-17 DB). Hier is hoekom jy jou Bybel moet lees: 1) Sodat jy nie die pad byster raak nie. God sal nooit iets vir jou sê wat nie in lyn is met dit wat Hy duidelik in sy Woord bekend gemaak het nie. 2) Sodat jy weet dat jy waarlik gered is. Die apostel Johannes skryf: ‘Ek skryf hierdie dinge aan julle sodat julle met die wete kan leef dat julle nou reeds deel het aan die ewige lewe, julle wat aanhou glo in die persoon van die Seun van God’ (1 Johannes 5:13 NLV). 3) Om jou roeping te identifiseer. Paulus sê, ‘…Uit die Skrif… sal iemand wat God s’n is, weet wat God van hom verwag en só reg wees om behoorlik vir God te kan werk’ (2 Timoteus 3:16-17 DB). Die Bybel is jou handleiding om ‘n Christelike lewe te lei, lees dit dus elke dag!
Sielskos: Amos 5:18-9:15; Mark 13:24-37; Ps 117; Spr 14:9-12
2018-06-03
Markus 2:4 NLV
Mary Engelbreit wou altyd kinderboeke illustreer, maar ‘n voorligtingsberader by die skool het vir haar gesê, ‘Jy kan dit nie doen nie. Wees prakties. Kry ‘n graad en word ‘n onderwyser.’ Mary het by ‘n kunswinkel begin werk, oor die industrie geleer en kunstenaars wat ‘n lewe gemaak het deur te doen waarvoor hulle lief was, leer ken. Deur te weier dat struikelblokke op die konvensionele pad na sukses haar terughou, het Engelbreit ‘n erkende kunstenaar geword wat haar eie tydskrif begin het. Proust het gesê, ‘Die ware reis van ontdekking bestaan nie daaruit om nuwe landskappe te soek nie, maar om nuwe oë te hê.’ Leer om buite die boks te dink en onthou, inspirasie ontstaan uit perspirasie! Verwag dat daar probleme gaan opduik en moenie toelaat dat dit jou voornemens verswak nie. Vier mans wat nie hulle verlamde vriend as gevolg van die skare by Jesus kon uitkry nie, ‘…het ‘n gat deur die dak bokant Jesus se kop gemaak. Toe laat hulle die mat waarop die sieke gelê het, deur die dak sak.’ Jesus het geloof in aksie gesien en dit beloon deur die man gesond te maak. Jy kan enigiets bereik as jy daaroor bid en volhard. Rebecca Barlow Jordan sê, ‘Ware kreatiwiteit hou nie by inspirasie op nie. Baie mense het al probeer en gefaal, omdat hulle nie die struikelblokke kon oorkom nie. Die ware kunstenaar sien deur geloof die voltooide prentjie. Almal van ons is kunstenaars en God het vir ons werk om te doen. Hy moedig ons aan om die vrugte van ons arbeid te geniet. Die ware seëning vind egter nie net plaas wanneer ons dinge regkry nie, maar wanneer kreatiwiteit sy goddelike oorsprong bekragtig en eer aan God bring.’
Sielskos: Gal 5:23; Spr 16:32; 2 Pet 1:5-8; Heb 11:23-27
2018-06-02
Daniël 3:1 NLV
Dis veilig om te sê dat enigiemand wat ‘n dertig meter hoë standbeeld van homself bou, heel waarskynlik besig is om vir iets anders te kompenseer. Hierdie standbeeld was die toonbeeld van trots. Ons het almal ‘n bietjie Nebukadnesar in ons. Ons sal nou nie ‘n standbeeld vir onsself oprig nie, maar ons raak ontsteld wanneer mense nie voor ons wense buig nie. Ons sal niemand ooit in ‘n oond gooi nie, maar ons raak witwarm van woede wanneer ons nie ons sin kry nie. Ons soek aanbidding op meer subtiele maniere. Ons oordryf op ons CV’s en vertel witleuentjies om die grys areas in ons lewens weg te steek. As jy nie jou identiteit en sekuriteit in dit wat God vir jou aan die kruis bereik het vind nie, sal jy jou onsekerhede agter jou eie skynheiligheid wegsteek. Jy sal jou eie gevegte probeer veg, jou eie geleenthede probeer skep en jou eie reputasie probeer vestig. Twee Skrifgedeeltes definieer koning Saul se val: 1) ‘Saul het daar ‘n altaar vir die Here gebou…’ (1 Samuel 15:12 NLV). 2) ‘…Saul is Karmel toe om ‘n gedenkteken vir homself op te rig…’ (1 Samuel 15:12 NLV). Samuel het egter reg deur die rookskerm gesien: ‘…Voorheen het jy min van jouself gedink, tog het jy die leier van die stamme van Israel geword…’ (1 Samuel 15:17 NLV). Weet jy wie bou gedenktekens vir hulself? Mense wat min van hulself dink! Hoe onsekerder ‘n persoon oor homself is, hoe meer monumente moet hy bou. Daar is ‘n fyn lyn tussen ‘Laat u koninkryk kom’ en ‘Laat my koninkryk kom.’ As jy oor daardie lyn tree, word jou verhouding met God selfdienend. Jy dien Hom nie, jy gebruik Hom. Jy bou nie altare vir God nie; jy bou vir jouself gedenktekens. Dis afgodery.
Sielskos: Amos 1:1-5:17; Mark 13:12-23; Ps 82; Spr 14:5-8
