2018-12-15
Filippense 4:4 NLV
Cheryl het aanhoudend gekla dat sy nie genoeg geld maak nie, nie die goed wat sy wou gehad het kon bekostig nie en daarom nooit iets van haar lewe sou maak nie. Haar berader het gesê, ‘Jy mors jou energie deur te kla, gebruik dit eerder om vooruit te beweeg.’ Cheryl het gestry, ‘Jy verstaan nie. Die werk is die probleem, nie ek nie.’ Die berader het geantwoord, ‘Jou klein salaris mag dalk ‘n probleem wees en jou baas mag dalk te veel van jou vereis, maar wanneer jy jouself aanhoudend ontstel doen jy meer skade as wat jou baas of jou werk aan jou doen.’ Cheryl het gevra, ‘Wat kan ek doen?’ Die berader het gesê, ‘Jy kan nie jou baas of jou werk beheer nie, maar jy kan die manier wat jy daaroor voel, beheer. Verander jou houding.’ Cheryl het haar raad gevolg. Sy het ophou kerm oor haar lewe en mense het dit opgemerk. Sy het ‘n bevordering gekry en binne ‘n paar maande is sy na ‘n posisie met ‘n groter salaris en ‘n baas wat meer ondersteunend was, geskuif. Goeie dinge gebeur met mense wat ‘n goeie houding het. Jou houding is iets wat jy ongeag van jou omstandighede kan kies. Paulus het geskryf, “Wees altyd bly omdat julle Christene is. Ek sê dit weer: ‘Wees bly!'” Waar was Paulus? In die tronk! Aan wie het Paulus geskryf? Aan mense buite die tronk! Hoekom het hy homself herhaal? Omdat ons so vinnig vergeet en weer in negatiwiteit verval. Ware vreugde is ‘n innerlike gevoel wat nie aan mense of uiterlike situasies onderworpe is nie. Jesus het gesê, ‘Dit het Ek vir julle gesê sodat julle blydskap mag ervaar en julle blydskap volkome kan wees’ (Johannes 15:11 NLV).
Sielskos: Est 5-10; Joh 21:1-25; Ps 18:1-29; Spr 26:24-27
2018-12-14
Spreuke 17:17 NLV
Beraders gebruik die frase ‘terminaal uniek’ omdat mense met verslawings dink dat hulle probleem uniek is: ‘Ander mense sal my verwerp as hulle van my probleem weet. Ek sukkel al so lank daarmee dat ek nie glo dat ek dit ooit sal oorwin nie.’ Dus isoleer hulle hulself en lewe in wanhoop en depressie. Een skrywer merk op: ‘So dikwels is ons geneig om ons lewens weg te steek. Skande en skuldgevoelens weerhou ons daarvan om ander mense te laat weet waarmee ons sukkel. Ons dink, ‘As my familie en vriende van die donker begeertes van my hart en my vreemde gedagtes geweet het, sal hulle my wegdruk en uit hulle geselskap weglaat.’ Die teenoorgestelde is egter waar. Wanneer ons durf om ons beker op te lig en ons vriende toe te laat om te sien wat daarin is, sal hulle aangemoedig word om hulle bekers op te lig en al hulle angstige geheime met ons te deel. Die grootste genesing vind dikwels plaas wanneer ons nie meer deur ons skande en skuldgevoelens geïsoleer voel nie en ontdek dat ander mense dikwels voel wat ons voel, dink wat ons dink en dieselfde vrese, sorge en behepthede het wat ons het.’ Moenie laat trots jou daarvan weerhou om jou probleem te oorwin nie. Wanneer jy die moed bymekaar kan skraap om eerlik met jouself en ander te wees, sal jy genesing vind. Lees hierdie twee Skrifgedeeltes: ‘Op ‘n vriend se lojaliteit kan jy altyd reken. Jou broer is gebore om jou te help…’ ‘In al ons swaarkry bemoedig Hy ons… sodat ons ook in staat sal wees om mense in al hulle swaarkry by te staan met dieselfde bemoediging waarmee God ons versterk het’ (2 Korintiërs 1:4 NLV). Die woord vir jou vandag is: Reik uit na hulp.
Sielskos: Est 1-4; Joh 20:19-31; Ps 105:8-22; Pred 7:1-4
2018-12-13
Job 5:26 NLV
Die skrywer Norman Cousins het gesê, ‘Geen siekte is meer dodelik as die verveeldheid wat met aftrede gepaard gaan nie.’ Hier is ‘n ware verhaal van ‘n dame in haar tagtigs wat na haar dokter vir ‘n algemene ondersoek gegaan het. Hy het vir haar gevra of sy aktief bly. Sy het hom ‘n groot glimlag gegee en gesê, ‘Ek draf omtrent vyf tot sewe kilometer elke dag.’ Verras het die dokter haar gemaan om versigtig te wees en dit nie te oordoen nie. Sy het sy woorde ter harte geneem en besluit om dinge stadiger te vat. Sy het haar drafsessies na stadige wandelinge verminder en dit na een of twee keer ‘n week gesny. Binne ‘n jaar was sy dood. Nadat hy van haar afsterwe te hore gekom het, het die dokter wat haar die raad gegee het, vir ‘n vriend gesê, ‘Nooit weer sal ek vir ‘n pasiënt wat so goed doen sê om dit rustig te vat nie.’ Die Bybel is vol van verhale van mense wat aanhou leef het omdat hulle iets gehad het om voor te leef! Onthou vir Kaleb? Op vyf-en-tagtig het hy die reuse in die heuwelgebied aangeval, hulle verdryf en ‘n landontwikkelaar geword (sien Josua 14). Wat van Noag? Hy het die ark begin bou toe hy vyfhonderd jaar oud was. ‘n Honderd jaar later het hy gehelp om die wêreld weer te begin. Ouderdom beteken niks, tensy jy kaas is! Plooie, grys hare en vlekke op jou hande beteken minder as niks. So lank as wat God kies om jou op die aarde te hou, moenie net bestaan nie – lewe! Hou aan droom. Gryp nuwe uitdagings aan. Moenie eers daaraan dink om dit rustig te vat nie!
Sielskos: Gen 50; Hag 1-2; Joh 20:1-18; Ps 105:1-7; Pred 5:13-16
2018-12-12
Habakuk 2:3 NLV
Het God jou iets belowe wat jy menslik gesproke nie kan sien hoe dit kan gebeur nie? Sukkel jy om daarvoor te wag? Lees hierdie Skrifgedeelte: ‘Wag geduldig, al voel dit of dit stadig gaan. Wees seker dit gaan gebeur, dit sal nie onnodig talm nie.’ God doen dinge volgens sy skedule en jou afspraak is nog steeds op sy kalender. Weet verseker dat niks wat die Vyand doen God se plan vir jou lewe kan vooruit loop nie. Wanneer Hy jou ‘n belofte gee, is dit soos ‘n saadjie. Dit moet eerstens in die vrugbare grond van geloof val en tyd gegee word om te groei. Dan moet dit gereeld deur gebed en die Woord van God natgegooi word. Dit sal nie gebeur omdat jy dit druk en probeer manipuleer nie: ‘…Nie met mag of krag nie, maar deur my Gees, sê die Here die Almagtige’ (Sagaria 4:6 NLV). Die verhaal van Josef se lewe kan met hierdie Skrifgedeelte opgesom word: ‘Sy swaarkry het aangehou totdat God se plan waar geword het…’ (Psalm 105:19 DB). Hoekom word iets getoets? Om die krag daarvan te openbaar; om te sien of dit onder druk ineenstort. Wat het God aan jou belowe? Glo jy Hom? Hoe sterk is jou geloof? As dit swak is, sal God jou terug in die skool van geloof plaas sodat jy die lesse kan leer en die toetse kan slaag. ‘As jy nie glo nie, is dit onmoontlik om God tevrede te stel. Wie tot God wil nader, moet glo dat Hy werklik dáár is en dat Hy dié wat na Hom soek, daadwerklik beloon’ (Hebreërs 11:6 NLV). Die woord vir jou vandag is: Hou aan om God te glo en dit sal gebeur.
Sielskos: Gen 47-49; Joh 19:25-42; Ps 150; Pred 5:10-12
2018-12-11
Psalm 19:2 NLV
Of jy nou na die heelal deur ‘n teleskoop of ‘n mikroskoop kyk, jy sal uitvind dat God ‘n wonderbaarlike skepper is. Kom ons kyk na drie dinge wat Hy ontwerp het: 1) Temperatuur. Die son se oppervlak is 5500 grade Celcius en ons is 149 668 992 kilometer daarvandaan – net die regte afstand. As die aarde se temperatuur 10 grade warmer of kouer was, sou alle lewe uitsterf. Dink daaroor: Hoekom was die aarde nie twee keer so ver of twee keer nader aan die son geplaas nie? 2) Rotasie. Ons roteer 365 keer ‘n jaar soos ons om die son wentel. Veronderstel ons het net 36 keer geroteer? Wel, ons dae en nagte sou dan 10 keer so lank gewees het. Ons sou verskriklik warm aan die een kant en onuithoudbaar koud aan die ander kant gekry het; en die lewe soos ons dit ken sou uitsterf. 3) Lug. Suurstof maak 21 persent van ons atmosfeer uit: die presiese balans van lug wat ons nodig het om asem te haal. Hoekom nie 50 persent nie? Omdat die eerste keer wat iemand ‘n vuurhoutjie sou trek, ons aan die brand sou slaan! Vra jouself dus af, is die 21 persent deur God ontwerp of was dit per ongeluk? Die Skepper het dit so besluit. Wil jy hom leer ken? Jy kan. Tydens die skepping het Hy sy groot mag geopenbaar, maar by die kruis het Hy sy groot liefde geopenbaar (Johannes 3:16). Deur Jesus, sy Seun, kan jy die groot Skepper persoonlik ken en die gawe van ewige lewe ontvang. As jy dit nie doen nie, sal jy ‘n verlore ewigheid binnegaan. Enige kans dat jy die uitsondering sal wees? Nee! Die mense in die hemel sal die mense wees wat deur keuse, nie deur kans nie, daar gekom het.
Sielskos: Gen 44-46; Joh 19:1-24; Ps 148:7-14; Pred 5:4-6
2018-12-10
Hebreërs 12:3 NLV
Jy gaan gereeld teenstand in jou lewe kry. Voor jy egter moedeloos word en tou opgooi, kyk weer na Jesus se lewe. Alhoewel Hy op alle maniere perfek was, is Hy deurlopend gekritiseer. Sy vyande het Hom ‘n ‘…vraat en ‘n dronklap…’ (Matteus 11:19 NLV) genoem. Hulle het Hom selfs daarvan beskuldig dat Hy van ‘n demoon besete was (sien Johannes 8:48). Tog het Hy nooit toegelaat dat bitterheid of ontmoediging Hom onderkry nie. Vir Hom was elke struikelblok ‘n geleentheid om genade en durf te bewys. Sy hart is deur diegene wat Hy liefgehad het gebreek, tog het Hy ander mense verstaan en hulle getroos. Hy het siekte as ‘n geleentheid om mense gesond te maak; haat as ‘n geleentheid om sy vyande lief te hê; versoeking as ‘n geleentheid om die vleeslike begeertes waarmee ons almal sukkel te oorkom; en oortreding as ‘n geleentheid vir vergifnis gesien. Hy het deur die lewe gegaan en toetse in seges verander – en Hy is ons voorbeeld. Die Bybel sê, ‘Dink aan Hom wat soveel vyandigheid van sondaarmense deurstaan het. Laat dit julle inspireer om nie uit te sak en tou op te gooi nie.’ Tel jou Bybel op en lees weer sy lesse. In sy beroemde Bergrede, het Jesus gesê: ‘Julle ken ook die ou opvatting: ‘Wees lief vir jou naaste. Haat jou vyand.’ Wel, dit is nie waar nie. Ek sê vandag vir julle dat julle ook julle vyande moet liefhê. Bid vir almal wat julle swaar laat kry en julle vervolg… As julle ook vol liefde en respek optree teenoor almal met wie julle te doen kry, doen julle presies wat die wet van julle vra…’ (Matteus 5:43-48 DB). Dis hoe Jesus gelewe het – en dis hoe Hy wil hê dat jy ook moet lewe.
Sielskos: Gen 42-43; Joh 18:19-40; Ps 148:1-6; Pred 5:1-3
