2019-05-29
Handelinge 13:43 NLV
In die dae wat gelei het tot die aanvang van die Tweede Wêreldoorlog, het die Britse regering opdrag gegee dat ‘n reeks plakkate gedruk moet word. Die idee was om bemoedigende slagspreuke daarop vas te vang en dit deur die land te versprei. Die woorde is in hoofletters gedruk, in ‘n eenvoudige formaat van net twee kleure. Die enigste grafiese element op die plakkaat was koning George VI se kroon. Die eerste plakaat is in September 1939 versprei: YOUR COURAGE. YOUR CHEERFULNESS. YOUR RESOLUTION WILL BRING US VICTORY. Gou daarna is ‘n tweede plakkaat gedruk: FREEDOM IS IN PERIL. DEFEND IT WITH ALL YOUR MIGHT. Hierdie twee plakkate is in treinstasies, kroeë, winkels en restaurante opgeplak. ‘n Derde plakkaat is geskep, maar nooit versprei nie. Meer as 2.5 miljoen kopieë van hierdie derde plakkaat is gedruk maar nooit gesien nie, tot sestig jaar later toe ‘n boekwinkeleienaar een in ‘n boks boeke wat hy op veiling gekoop het, ontdek het. Dit het gelees: KEEP CALM AND CARRY ON. Dit het dieselfde kroon en styl van die eerste twee plakkate uitgebeeld. Dit was nooit aan die publiek bekend gestel nie, maar is vir gevalle van uiterste krisis, soos die inval van Duitsland, gereed gehou. Die boekwinkeleienaar het dit geraam en op die muur gehang. Dit het so populêr geword dat die boekwinkel identiese prente van die oorspronklike ontwerp op koffiekoppies, poskaarte en plakkate begin druk het. Dis dieselfde boodskap wat Paulus en Barnabas vir die eerste Christene in Antiogië gebrink het: ‘…[Hulle het] hulle aangemoedig om op die genade van God te bly vertrou.’ Met ander woorde, ‘keep calm and carry on!’
Sielskos: Op 5-9; Mark 10:23-34; Ps 121; Spr 12:23-24
2019-05-28
Filippense 4:11 ABA
Dis prysenswaardig wanneer jou doel is om persoonlik te groei en dinge in die lewe te bereik. Wanneer jy egter iets begeer wat iemand anders het of net soos hulle wil wees, gaan jy ‘n area wat deur die Skrif verbied word, binne. Tevredenheid beteken nie dat jy selfvoldaan moet word, met middelmatigheid tevrede moet wees of nie jou Godgegewe potensiaal in die lewe moet bereik nie. Glad nie! Jy is veronderstel om te werk om jouself te verbeter, terwyl jy gelyktydig heeltemal afhanklik aan God bly (sien 2 Korintiërs 3:5). Selfgenoegsaamheid beteken dat jy op jouself vertrou, eerder as om jou geloof in God se bystand te plaas. Tevredenheid, aan die ander kant, is om met sekerheid en ‘n vaste oortuiging te weet dat God in staat is om aan elkeen van jou behoeftes te voldoen (sien Filippense 4:19). Wanneer jy hierdie waarheid verstaan, het jy nie nodig om enigiemand anders se posisie, eiendom, besittings of persoonlikheid te begeer nie. Hoekom nie? Omdat jy vir seker weet dat alles wat jy tans het en alles wat jy vandag is, meer as genoeg in die hande van God is. Wat jy ook al moet doen om sy wil te vervul, kan jy doen, nie uit jou eie krag nie, maar deur die krag en mag van Christus wat in jou binneste woon. Hebsug kom natuurlik vir almal van ons, maar tevredenheid moet aangeleer word. Paulus skryf: ‘…Ek het geleer om tevrede te wees met dit wat ek het… Partymaal het ek te min gehad en partymaal het ek baie gehad, en so het ek geleer om tevrede te wees. Partymaal het ek genoeg gehad om te eet en partymaal was ek honger… Christus gee vir my die krag om enige iets te doen’ (Filippense 4:11-13 ABA).
Sielskos: Op 1-4; Mark 10:13-22; Ps 117; Spr 12:20-22
2019-05-27
Romeine 14:1 NLV
Gedurende die eerste eeu het stede soos Rome mense van baie verskillende kulture, tale, gelowe en gebruike aangetrek. As gevolg daarvan het dit soms gebeur dat die kerk se missie om dissipels van alle nasies te maak, tot konflik gelei het. Sommige gelowiges het byvoorbeeld aangehou om ‘n sewende dag Sabbat te onderhou, terwyl ander wat nie vleis geëet het nie, wou aanhou vegetariërs wees. Dis die rede hoekom Paulus geskryf het: ‘Julle moet medegelowiges met ‘n sensitiewe geloofsbelewing aanvaar sonder om hare te kloof oor hulle oortuigings.’ Let op, hy het nie vir ons gesê om hulle net te verdra nie, maar om hulle te aanvaar – om hulle te verwelkom, te ontvang, te erken en voorsiening te maak vir diegene wat nie presies soos ons is nie. Selfs al is die kwessies waar ons vandag voor te staan kom anders as die kwessies van die vroeë kerk, is dit steeds maklik om verdelend en veroordelend te word. Wanneer regmatige verskille oor fundamentele kwessies egter te voorskyn kom en daar geen ruimte vir onderhandeling is nie, tree op ‘n Christelike manier op sonder om te baklei, te kritiseer of op ander mense neer te kyk. ‘As broers en susters in God se huisgesin moet julle mekaar in liefde koester en voor in die ry staan om mekaar met respek te hanteer’ (Romeine 12:10 NLV). Leer om jou medegelowiges te respekteer nie as gevolg van wie hulle is nie, maar as gevolg van wie s’n hulle is! Paulus skryf: ‘Mag God, wat die bron is van standvastigheid en bemoediging, julle help om in volkome harmonie met mekaar te lewe… Dan sal julle almal in ‘n wonderlike eenheid van gees en uit een mond die lof toebring aan God…’ (Romeine 15:5-6 NLV).
Sielskos: 1 Kon 21-22; Mark 10:1-12; Ps 82; Spr 12:18-19
2019-05-26
Johannes 8:36 NLV
Soms sê ons vir nuwe gelowiges dat hulle hulle lewens moet regkry, maar ons sê nie vir hulle hoe om dit te doen nie! Jesus het gesê: ‘As die Seun julle dus bevry, sal julle regtig vry wees.’ Paulus skryf: ‘…Laat julle leefstyl eerder deur die Gees bepaal word. Dan sal julle glad nie aan die begeertes van julle sondige geaardheid toegee nie’ (Galasiërs 5:16 NLV). Blywende verandering kom van binne. Jou grootste stryd sal altyd in die area van jou denke en impulse wees. As Satan jou aandag van God se Woord na die vleeslike ryk kan aftrek, kan hy jou elke keer na sonde en nederlae toe lei. God se Woord is die taal van God se Gees. Dit beteken dat wanneer jy dit lees en op die beginsels daarvan mediteer, laat jy die Heilige Gees toe om met jou te praat en kan jy gevolglik jou vlees onder beheer hou. Wanneer jy egter by jou sondige gedagtes stilstaan, tree jy in die Vyand se taal op en laat jy hom toe om jou te beheer. Gaan dus vandag terug na God se Woord toe. Dis die swaard van die Gees en die enigste wapen wat skerp genoeg is om jou van sonde los te sny. Petrus sê: ‘Deurdat ons Hom regtig ken, het sy Goddelike krag ons alles laat kry wat ons nodig het om naby aan Hom te lewe… Deur hierdie selfde krag het Hy sy kosbaarste en allergrootste beloftes vir ons laat waar word. Die gevolg hiervan is dat julle deel gekry het aan sy Goddelike natuur. Só het julle vrygekom van die proses van agteruitgang wat, as gevolg van die geneigdheid van ons menslike natuur, oral alles en almal laat sleg word’ (2 Petrus 1:3-4 NLV). Alles wat jy nodig het is in God se Woord.
Sielskos: Eks 20:15; Eks 22:1-4; Spr 6:30-31; Luk 19:1-10
2019-05-25
Filippense 1:6 NLV
Toe Mark Matousek vir mense vertel het dat ‘n potensiële dodelike siekte sy lewe gered het, kon hulle dit nie verstaan nie. Hy was nie bly dat hy siek geword het nie. Hy sou egter daarsonder nooit die krag ontdek en gebruik het om sommige van sy kernvrese te oorkom nie. Hy skryf: ‘Swaarkry kan die bloed in die spiere wees wat ons voortdryf. Krisis kan ons na die randjie toe neem en ons dwing om aan te hou beweeg. Wanneer mense dit ‘n seëning noem, beskryf hulle ‘n paradoks. Dis hoekom mans dikwels in oorlogstye floreer en vrouens deur kindergeboorte verander word – hulle word lewendig soos nog nooit tevore nie.’ Die waarheid is dat God tot jou geestelike groei verbind is: ‘Ek is oortuig dat God die goeie werk wat Hy in julle begin het, sal voortsit totdat Hy dit voltooi op die dag wanneer Jesus Christus terugkom.’ Langs die pad sal jy getoets word, soms tot breekpunt toe. ‘n Skrywer sê: ‘Geestelike toetse toets ons geloof en toewyding. Onthou jy vir Abraham en Isak? Niks maak ons trotser as wanneer ons ons kinders sien sukses behaal nie, en God het groot planne vir Isak gehad. Wat kon moontlik verkeerd gaan? Baie! Ons het al in Abraham se sandale gestaan en aan God se beloftes vasgeklou, maar steeds het siekte gebly, finansiële probleme het binnegesluip, vriende het ons verraai en die dood het gewink. Abraham het met vertroue en toewyding gereageer. Dit was nie maklik vir hom nie – ons weet hoe dit sou eindig, maar hy het nie! Tog was hy bereid om sy seun se lewe te neem. God wou nooit Isak se dood gehad het nie. Hy wil egter ons hele hart en toewyding hê.’
Sielskos: 1 Kon 18:16-20:43; Mark 9:38-50; Ps 113; Spr 12:15-17
2019-05-24
Lukas 10:40 NLV
Een van die grootste gonswoorde van hierdie generasie is ‘multitasking.’ As dit reg gebruik word, kan dit jou meer produktief maak. As jy dit verkeerd gebruik, soos om op jou foon te praat terwyl jy bestuur, kan dit jou doodmaak. Jy sal nie vandag al jou gawes kan geniet as jy nie ‘n gebalanseerde houding teenoor werk het nie. Een dag het Jesus die huis van twee susters, Maria en Marta, besoek. Wat ‘n kontras! Marta was besig en bekommerd, terwyl Maria aan die voete van Jesus gesit het en na Hom geluister het. Sy was vasbeslote om nie ‘n sekonde van hierdie kosbare oomblik mis te loop nie. Jesus het gesê dat Maria ‘n beter keuse as Marta gemaak het. Let wel, Hy het nie vir Marta gesê om nie te werk nie; Hy het vir haar gesê om op te hou om gefrustreerd te wees en ‘n slegte houding te hê terwyl sy werk. Jesus wil hê dat jy hard moet werk, maar Hy wil ook hê dat jy wys genoeg sal wees om te besef wanneer jy alle aktiwiteit moet staak om nie die wonder van sy teenwoordigheid in die oomblik mis te loop nie. Die Bybel sê: ‘Baie aktiwiteite gee jou rustelose drome. Net so kom dwaasheid van te veel woorde’ (Prediker 5:2 NLV). Jy moet met ander woorde jouself oplei om jou volle aandag aan dit te gee waarmee jy op enige gegewe tyd besig is. Maak dit dan klaar voor jy met iets anders begin. Hierdie tipe konsentrasie verg dissipline, maar dis die moeite werd omdat dit jou help om die oomblik te geniet. Wees vasbeslote om nuwe, gebalanseerde gewoontes in hierdie area te vorm. Wanneer jy dit doen, sal jou lewenskwaliteit verbeter.
Sielskos: 1 Kon 16:1-18:15; Mark 9:30-37; Ps 108; Spr 12:14
