2019-10-25
Psalm 103:13 DB
As jy steeds die letsels van ‘n slegte kindertyd saam met jou dra, kan dit moeilik wees om God as jou liefdevolle Vader te sien. So baie behoeftes waaraan nie in jou kindertyd voldoen is nie – liefde, sekuriteit, vertroue, vertroosting, koestering en materiële benodighede – kan dit moeilik maak om te glo dat God nou in jou behoeftes sal voorsien. Wat staan jou dus te doen? Erken dat jou interne beeld van ‘n vader verwronge is en op geen manier van toepassing op jou hemelse Vader is nie. Selfs die beste pa is net ‘n vae afbeelding van jou hemelse Vader. God wil hê dat jy Hom as ‘n sorgsame, sensitiewe, vrygewige en standvastige Vader moet sien. Dis hoekom Jesus ons geleer het om Hom ‘Ons Vader’ in plaas van ‘Almagtige God en Here’ te noem. Dit is ook hoekom Hy God ‘jou Vader’ en nie net ‘My Vader’ genoem het nie. Soos ‘n goeie vader, het God jou elke behoefte voorsien en daaraan voldoen (sien Matteus 6:25-34). Net soos ‘n goeie ouer die individuele eienskappe van sy kinders verstaan, so ken jou hemelse Vader jou unieke behoeftes, gedagtes en gevoelens. ‘Net soos ouers hulle kinders met groot liefde versorg, so versorg die Here elkeen wat Hom dien met arms vol liefde. Die Here weet hoe swak en vol foute ons is. Hy weet dat ons maar net klein en swak mensies is’ (Psalm 103:13-14 DB). Sy versorging is nommerpas gemaak vir jou spesifieke behoeftes en beperkinge. Net soos ‘n goeie aardse vader die verantwoordelikheid aanvaar om vir sy kinders te sorg, hou jou hemelse Vader Homself verantwoordelik om aan jou behoeftes te voldoen; en Hy wil hê dat jy daarvolgens moet optree deur Hom te vertrou. Met ander woorde, jou rol is om soos die kind van ‘n betroubare, vrygewige, liefdevolle Vader op te tree.
Sielskos: Esra 9-10; Joh 7:1-13; Ps 104:1-18; Spr 24:26-27
2019-10-24
Johannes 8:27 NLV
Godsdienstige mense in Jesus se tyd het dit moeilik gevind om die konsep van God se vaderskap te verstaan. Here, koning en regter het hulle verstaan – maar nie Vader nie. Hulle Ou Testamentiese geskrifte het skaars ‘n halfdosyn keer van God as Vader gepraat, terwyl die Nuwe Testament dit honderde kere noem. Jesus het self gesê: ‘En niemand ken die Vader nie, behalwe die Seun en elkeen aan wie die Seun die Vader wil bekendmaak’ (Matteus 11:27 NLV). Die waarheid is dat God ‘n raaisel vir hulle was, totdat Jesus die Vader aan hulle bekendgemaak het. Baie van ons verstaan nog steeds nie sy Vaderskap en die ryke seën wat ons in Hom het nie. Vader, God se allesomvattende naam, inkorporeer alles wat jy ooit sal nodig hê en openbaar presies hoe Hy oor jou voel. Hy verteenwoordig elke eienskap van die beste pa wat jy jou kan indink. Wat ookal ‘n liefdevolle pa vir sy behoeftige kind sal doen, sal jou hemelse Vader vir jou doen – en nog soveel meer. Sodra ons God as ons Vader erken, verdwyn ons vrese soos ons begin besef dat Hy aan al ons behoeftes sal voldoen. Jesus het gesê: ‘…dit maak julle Vader baie gelukkig om die koninkryk aan julle te gee’ (Lukas 12:32 NLV). Dit maak God gelukkig om jou die hulpbronne van sy koninkryk te gee. Hoekom? Omdat Hy jou net so liefhet soos wat Hy vir Jesus liefhet! In Johannes 17:23, bid Jesus met vertroue dat jou hemelse Vader jou liefhet, ‘…net soos U My liefhet’ (NLV). Sien God dus as jou Vader, begin soos sy kind optree en geniet die voordele wat lidmaatskap aan sy familie meebring (sien Efesiërs 2:19).
Sielskos: Esra 6-8; Joh 6:52-71; Ps 114; Spr 24:23-25
2019-10-23
2 Kronieke 20:21 NLV
Lofprysing is ‘n kragtige wapen, een wat die geveg in jou guns kan laat draai. Toe koning Josafat voor die gekombineerde mag van drie verskillende weermagte te staan gekom het, het hy geweet dat hy geen kans teen hulle staan nie. Dus het hy na God toe gedraai en gesê: ‘…Ons is magteloos teen hierdie groot leër wat op die punt is om ons aan te val. Ons weet nie wat om te doen nie, maar ons kyk op na U vir hulp’ (vers 12 NLV). Hier is hoe God hom geantwoord het: ‘…Moenie bang wees nie! Moenie moedeloos wees oor hierdie magtige leër nie, want die oorlog is nie julle s’n nie, maar God s’n’ (vers 15 NLV). Toe het God vir hom ‘n wonderbaarlike strategie vir oorwinning gegee. Hy het vir hom gesê om ‘n koor voor sy weermag te laat staan en die geveg binne te gaan terwyl hulle God lofprys. Josafat het dit gedoen: ‘…die koning [het] sangers aangestel om voor die leër uit te stap. Hulle het tot eer van die Here gesing en Hom geprys vir sy heerlike heiligheid… Die leërs van Moab en Amnon het teen hulle bondgenote uit die Seïrberge gedraai en elkeen van hulle doodgemaak. Nadat hulle die leër van Seïr vernietig het, het hulle mekaar vernietig’ (vers 21-23 NLV). In plaas daarvan om Juda aan te val, het drie weermagte mekaar begin aanval. Israel het nooit ‘n swaard uitgetrek, ‘n pyl afgevuur, geen lewensverlies gely nie en dit het hulle drie dae geneem om al die buit bymekaar te maak. Wanneer jy dus voor ‘n geveg te staan kom wat jy nie kan wen nie, begin om God te prys en die magte van die hemel sal jou te hulp snel.
Sielskos: Esra 3-5; Joh 6:35-51; Ps 127; Spr 24:19-22
2019-10-22
Matteus 6:31-32 NLV
As God binne-in jou woon, moet dit dan nie voor die hand liggend wees nie? Hoe kan jy sê dat jy op Hom vertrou en jouself dan obsessief oor jou gesondheid, jou kinders, jou werk en jou finansies bekommer? Besorgdheid is een ding, maar bekommernis is ‘n belediging vir die God wat jou nog nooit in die steek gelaat het nie. Paulus skryf: ‘Moet oor niks bekommerd wees nie, maar bid oor alles. Vra alles wat julle nodig het van God, terwyl julle Hom ook dank vir alles wat Hy doen. As julle so bid, sal julle God se vrede beleef…’ (Filippense 4:6-7 NLV). Bid of bekommer – dit is jou opsies. Jesus het gesê: ‘Moet julle daarom nie oor môre bekommer nie…’ (Matteus 6:34 NLV). Wanneer jy jou oor môre begin bekommer, vlieg jou vrede by die venster uit! Al wat nodig is om ‘n stilstaande trein daarvan te weerhou om vorentoe te beweeg is twee klein blokkies hout, maar sodra dit stoom opbou kan dit deur ‘n ses voet muur breek. Keer dus die bekommernistrein voor dit die stasie verlaat! God sê: ‘…My genade is genoeg vir jou…’ (2 Korintiërs 12:9 NLV). God sal slegs dit wat jy vandag nodig het vir jou gee; op hierdie manier hou jy aan om Hom vir môre te vertrou. Die Bybel sê vir ons dat Jesus die Goeie Herder is. ‘Hy roep sy eie skape op hulle name… Wanneer hy al sy eie skape na buite gelei het, loop hy voor hulle uit…’ (Johannes 10:3-4 NLV). Hoe wonderlik is dit nie. Hy het klaar vooruit geloop om alles vir jou reg te kry. Hierdie wete sal jou help om môre in die gesig te staar, vol vertroue dat God vir jou sal sorg.
Sielskos: Esra 1-2; Joh 6:25-34; Ps 98; Spr 24:15-18
2019-10-21
Genesis 15:14 NLV
Toe die kinders van Israel Egipte verlaat het, het God die rykdom van een nasie na die ander oorgedra. Hy het dit gedoen omdat sy mense geroepe was om sy doelwitte op die aarde te vervul. Na 400 jaar (tien generasies) wat bakstene gemaak het, brons gepoleer het en vloere gevee het, het God in wese gesê: ‘Dis betaaldag! Al die dinge wat julle geskrop en gepoleer het gaan julle s’n wees.’ Hoe groter die beproewing, hoe groter die oorvloed! Kom ons maak dit duidelik; die Bybel leer ons dat geld self nie vir God afstootlik is nie, maar die misbruik daarvan wel! ‘n Pastoor sê: “Geld praat. Dit sê vir die grond: ‘Ek kan jou besit.’ Dit sê vir die geboue: ‘Ek kan jou bou.’ Dit sê vir die visie: ‘Ek kan jou vervul.’ Dit sê vir die sendeling: ‘Ek kan jou ondersteun.’ Dit sê vir armoede: ‘Ek kan jou voed.’ En dit sê vir geleentheid: ‘Ek kan jou aanvaar.'” Hoekom het Farao die Israeliete agternagesit? Om Egipte se rykdom terug te kry. Stop en dink daaroor! Die duiwel gee nie om wie die geld kry nie, solank dit nie na God se mense gaan of gebruik word om God se doelwitte te vervul nie. Satan vrees die gedagte van ‘n generasie voorspoedige gelowiges wat toegewyd daaraan is om die wêreld met die evangelie te bereik. Hy sal ons slawe van onkunde hou as hy kan. ‘Ek is nie ‘n slaaf nie,’ sê jy egter. Wat van ‘n slaaf van skuld, of hopeloosheid, of vrees, of ou gewoontes? God wil jou vry maak van enigiets wat jou daarvan weerhou om sy wil te vervul. Sodra jy dit besef, sal jy in alle erns begin bid en glo dat God die hulpbronne het om dit te doen!
Sielskos: Sef 1-3; Joh 6:1-24; Ps 85; Spr 24:11-14
2019-10-20
Spreuke 18:24 NLV
Om God se plan vir jou lewe te vervul, moet jy verhoudings met die regte mense hê, mense wat jou deur dik en dun sal bystaan. Onthou jy vir Jonatan, wat Dawid selfs ten koste van sy eie lewe liefgehad het? En Rut, wat vir haar skoonma Naomi lief was en haar ‘n rede gegee het om te lewe? God kan jou aan sulke mense voorstel en jou help om ‘n verhouding met hulle te bou. Dink daaroor: Hy sal nie sê: ‘Dis nie goed dat die mens alleen is nie…’ (Genesis 2:18 NLV), en dan van jou verwag om in isolasie te lewe nie. Soms is jy in die slegste geselskap moontlik wanneer jy alleen is! Jy sal dalk egter eers innerlik genees moet word voordat jy gesonde verhoudings kan bou en gesonde besluite kan maak. Laat God toe om aan jou te werk en wanneer jy gereed is, sal Hy die nodige mense aan jou voorstel. Tot dan, moet jy Hom beter leer ken omdat Hy die bron van ware selfvertroue is. As jou laaste verhouding jou van jou selfwaarde gestroop het en jou geestelik gedreineer het, gebruik hierdie tyd om weer op jou voete te kom. Jy mag dalk nooit weer hierdie geleentheid kry nie! Begin om lief te hê soos God liefhet. Hy sien ons imperfeksies, hanteer ons verwerping en het ons nietemin steeds lief. Wanneer jy dit weet, sal dit jou help om nie ‘n goeie persoon af te skryf omdat hy of sy ‘n slegte ding gedoen het nie. Sal jy jou kar weggooi omdat hy ‘n foutiewe part het? Vra Hom vandag om jou te wys hoe om gesonde, vervullende verhoudings te bou. Hy sal dit doen!
Sielskos: Eks 20:1-17; Matt 5:1-12
