Harde werk – die prys van sukses

2020-10-31
Spreuke 14:23 NLV

Een dag het ‘n oupa vir sy kleinkinders die verhaal van hoe hy na Amerika gekom het, vertel. Hy het hulle van die treine en die skip wat hom van sy huis in Oos-Europa gebring het, vertel. Hy het vertel hoe hy saam met ander immigrante by Ellis Eiland geprosseseer moes word en hoe hy na ‘n kafeteria gegaan het om iets te kry om te eet. Hy het by ‘n leë tafel gaan sit en lank gewag vir iemand om sy bestelling te kom neem, maar niemand het nie.

Uiteindelik het ‘n vrou met ‘n skinkbord kos oorkant hom gaan sit en verduidelik hoe ‘n kafeteria werk. ‘Jy begin by hierdie punt,’ het sy gesê en na ‘n stapel skinkborde gewys. ‘Dan gaan jy by die lyn kos af en kies wat jy wil hê. By die ander punt sal hulle vir jou sê hoeveel dit sal kos.’

Die oupa het vir ‘n ruk daaroor gepeins en toe vir sy kleinkinders gesê: ‘Ek het gou geleer hoe alles in hierdie land werk. Die lewe hier is ‘n kafeteria. Jy kan enigiets kry wat jy wil hê – selfs groot sukses – as jy bereid is om die prys te betaal. Jy sal egter nooit kry wat jy wil hê as jy vir iemand wag om dit vir jou te bring nie. Jy moet opstaan en dit self gaan kry.’

Die verskil tussen waar jy op die oomblik is en waar jy wil wees, kan met twee woorde opgesom word – harde werk! ‘Wil God hê dat ek sukses moet behaal?’ vra jy. Ja, maar Hy sal nie sukses in jou skoot laat val nie. Hy het beloof om ‘…al die werk wat jy doen, te seën…’ (Deuteronomium 28:12 NLV). Ontelbare ure, aanhoudende inspanning en konstante verbetering kan die verskil tussen ambisie en sukses maak.

Sielskos: Deut 18:9-18; Jes 47:5-15; Hand 16:16-34; Dan 2

Leer by Moses (1)

2020-10-24
Hebreërs 11:24 NLV

Moses se lewe openbaar vier kwessies wat jy moet hanteer sodat jy sukses in die lewe kan behaal.

Eerstens: Jy moet weet wie jy is. ‘Omdat Moses geglo het, het hy as volwasse man geweier om as die seun van Farao se dogter bekend te staan.’ Moses is as ‘n Hebreër gebore, maar is as ‘n Egiptenaar deur die farao se dogter grootgemaak. Selfs al was hy besig om opgelei te word om tweede in bevel in Farao se koninkryk te wees, het Moses geweet dat God hom geroep het om sy mense te bevry en hulle uit Egipte te lei. Dus moes hy ‘n keuse maak. Moses het elke gemak waarvoor hy kon wens in die paleis gehad en hy kon daar gebly het. Wat sou jy gedoen het? Moses het die regte besluit gemaak, maar dit het beteken dat hy die volgende tagtig jaar van sy lewe in die woestyn sou moes deurbring.

Almal van ons moet vrede met ons identiteit maak. Ons het almal ‘n diepe behoefte en begeerte om te aanvaar wie ons is. Om iemand te probeer wees wat ons nie is nie, is ‘n vinnige manier om ‘n maagseer te kry, omdat dit ons onder so baie druk plaas.

Moses het hierdie spanning herken en besluit om op te hou om voor te gee. Dis bevrydend wanneer ons ophou om iemand te probeer wees wat ons nie is nie en God se plan vir ons lewe begin aanvaar. Hoe sou ons Moses vandag onthou het as hy besluit het om in die paleis te bly? Dalk as ‘n Egiptiese mummie in een of ander museum – of dalk glad nie. Hy het egter die moeilike besluit geneem, wat in die lig van die ewigheid die regte besluit was. Leer by hom!

Sielskos: Hab 1-3; Joh 6:25-34; Ps 98; Spr 24:15-18

Moenie gou kwaad word nie

2020-10-09
Spreuke 15:18 NLV

Salomo maan ons herhaaldelik om nie gou kwaad te word nie (Spreuke 14:29, 15:18, 16:32). Neem jou Bybel en lees hierdie verse stadig en met gebed deur. Gee noue aandag aan die kere in die Skrif waar Jesus kwaad geword het (daar is min van hulle), en een ding sal dadelik vir jou uitstaan. Hy het nooit kwaad geword oor iets wat iemand aan Hom gedoen het nie. Hy het nooit teruggeslaan en gegrief geword oor mense wat Hom verkeerd behandel het nie. Selfs toe die laksmanne Hom teen die kruis vasgespyker het, het Hy gebid: ‘…Vader, vergewe hulle, want hulle besef nie wat hulle doen nie!..’ (Lukas 23:34 NLV).

As jy ernstig daaroor is om Jesus te volg, moet jy dieselfde doen! Die Bybel sê: “‘n Vriendelike antwoord kalmeer die gemoedere, ‘n dwars antwoord laat woede opspring” (Spreuke 15:1 NLV).

Het jy al ooit agtergekom hoe brandweermanne nooit vuur met vuur beveg nie? Gewoonlik is water ‘n baie beter keuse. Op dieselfde manier, is ‘n sagte antwoord op ‘n kwaai opmerking, soos om die koue water van kalmte op die vlamme van ‘n vurige humeur te giet.

‘n Universiteitstudie het bevind dat wanneer daar op mense geskree word, hulle amper altyd terugskree. Die navorsing het ook bewys dat jy ‘n ander persoon se stemtoon deur die stemtoon wat jy gebruik, kan beheer. As jy jou stem sag hou, sal jy dit nie net vermy om kwaad te word nie, maar jy sal heel waarskynlik die ander persoon ook daarvan weerhou om kwaad te word.

Wil jy meer soos Christus word en meer sukses in jou omgang met ander mense behaal? Dan is die woord vir jou vandag: Moenie gou kwaad word nie.

Sielskos: 1 Sam 27-31; Joh 1:43-51; Ps 23; Spr 23:4-5

God wil hê dat jy sukses moet behaal (4)

2020-09-23
Josua 1:8 NLV

In die Skrif beteken die woord, ‘sukses,’ eenvoudig dat jy God se wil vir jou lewe ken en doen. Dis so eenvoudig! Vir Josua, het sukses beteken om die Beloofde Land binne te gaan, dit te oorwin, daar te woon en elke dag die seëninge daarvan te geniet. Luister na wat God vir hom gesê het: ‘Wees sterk en baie dapper! Voer al die opdragte uit wat Ek vir my dienaar Moses gegee het. Moenie links of regs daarvan afwyk nie. Jy sal dan suksesvol wees in alles wat jy doen. Hou hierdie wetboek altyd by jou. Dink dag en nag daaroor na sodat jy alles kan doen wat daarin geskryf is. Jy sal dan sukses behaal op jou pad. Jy sal voorspoedig wees’ (verse 7-8 NLV). Ware sukses vereis hierdie drie dinge: 1) Om te word wat God wil hê jy moet wees. 2) Om te doen wat God wil hê jy moet doen. 3) Om te hê wat God wil hê jy moet hê. Soos jy die doelwitte bereik wat Hy vir jou lewe gestel het, word jy suksesvol. Soos die bekende skrywer en lektor, Dale Carnegie, een keer opgemerk het: ‘Sukses is om te kry wat jy wil hê. Geluk is om dit wat jy kry, te wil hê.’ In hulle eindelose soeke na prestasie, word sommige mense so gierig en gulsig dat hulle nooit tevrede is nie. Omdat hulle altyd meer wil hê, geniet hulle nie dit wat God reeds vir hulle gegee het nie. Ware sukses is nie ‘n bestemming nie, dis ‘n reis. Dis vreugde wat deur vooruitgang geskep word. Dit is die wete dat jy ‘op skedule’ is wanneer dit by God se taak vir jou lewe kom.

Sielskos: 2 Kor 9:1-11:15; Luk 23:13-25; Ps 52; Spr 21:17

God wil hê dat jy sukses moet behaal (3)

2020-09-22
Psalm 8:7 NLV

Hoe weet jy dat God wil hê dat jy sukses in jou lewe moet behaal? Om drie redes: 1) Omdat Hy jou geskep het. Hy het in Genesis gesê: ‘…Laat Ons die mens maak volgens ons beeld, ‘n afbeelding van Ons…’ (Genesis 1:26 NLV). Omdat ons God se opperste skepping is, het Hy sy gedagtes, sy mag, sy wysheid en alles anders wat jy nodig het om suksesvol te wees, in jou gegiet. Sodra jy hierdie waarheid besef en daarvolgens begin optree, sal jou lewensuitkyk getransformeer word. Jy sal begin dink soos iemand wat geen beperkinge het nie. 2) Omdat jy waarde het. Die aktrise Ethel Waters, wat by Billy Graham se kruistogte gesing het, het gesê: ‘Ek is iemand, want my God maak nie gemors nie!’ Jy is die kroon van God se skepping, die voorwerp van sy aandag en liefde. Die Psalmdigter het geskryf: ‘Kosbaar is u gedagtes vir my, o God! Hoe onmeetlik is die totaal! As ek dit moes tel, sou hulle meer wees as sandkorrels!..’ (Psalm 139:17-18 NLV). 3) Omdat God alles vir jou gemaak het. ‘U het ons in beheer gestel van alles wat u hande gemaak het. U het vir ons mag gegee oor alle dinge.’ Beteken dit dat God sukses in jou skoot sal laat val? Nee: ‘God het hulle geseën deur te sê: ‘Wees vrugbaar en vermeerder en vul die aarde. Onderwerp die aarde en heers oor die visse van die see, die voëls in die lug en oor al die diere op die aarde’ (Genesis 1:28 NLV). God het vir jou sy outoriteit en kreatiewe vermoë gegee om sukses te behaal in dit waarvoor Hy jou roep. In plaas daarvan om soos ‘n slagoffer te dink, begin dus soos ‘n oorwinnaar dink!

Sielskos: 2 Kor 5-8; Luk 23:1-12; Ps 34; Spr 21:14-16