Vergewe omdat jy vergewe is

2021-02-05
Matteus 18:33 NLV

Jesus het gesê: ‘Om hierdie rede kan God se koningsheerskappy vergelyk word met ‘n koning wat besluit het om na te gaan wat sy amptenare hom skuld. Skaars het die ondersoek begin of een word na hom toe gebring wat hom miljoene rande skuld. Toe hy dit nie kon bybring nie, gee die koning opdrag dat hy, sy vrou en sy kinders en al sy besittings verkoop moet word om sy skuld te betaal. Hy val toe voor die koning neer en smeek hom: ‘Gee my kans, ek sal alles aan u terugbetaal.’ Daarop het die koning hom innig jammer gekry. Hy het hom laat gaan en sy skuld afgeskryf. Toe die amptenaar daarvandaan weggaan, loop hy egter een van sy medeamptenare raak wat hom net ‘n paar rand geskuld het. Hy… sê: ‘Betaal jou skuld!’ Sy medeamptenaar val toe voor hom neer en smeek hom: ‘Gee my kans, ek sal alles aan jou terugbetaal.’ Maar daarvan wou sy skuldeiser nie hoor nie. Hy is daar weg en het hom in die tronk laat gooi… Toe sy medeamptenare sien wat gebeur het, was hulle uitermate ontsteld. Hulle het alles wat gebeur het toe aan die koning gaan vertel. Daarop het die koning daardie man laat roep en vir hom gesê: ‘Jou ellendige vent! Toe jy my gesoebat het, het ek vir jou al jou skuld afgeskryf. Moes jy nie ook jou medeamptenaar jammer gekry het soos ek vir jou jammer gekry het nie?’ Woedend het die koning hom toe oorgegee aan die folteraars om elke sent uit hom te pers totdat hy al sy skuld betaal het. So sal my hemelse Vader ook met julle maak as julle weier om julle medegelowiges met julle hele hart te vergewe’ (verse 23-35 NLV).

As jy vandag wraak in jou hart koester en weier om iemand te vergewe, lees weer hierdie verhaal. Dis die woord vir jou vandag!

Sielskos: Jes 63-66; Matt 12:38-50; Ps 120; Spr 3:33-35

Vergewe hulle

2020-11-09
Lukas 6:35 NLV

In sy boek, Beneath the Cross of Jesus, vertel A. Leonard Griffith die verhaal van ‘n jong Koreaanse uitruilstudent wat ‘n leier in die Christelike kringe by die Universiteit van Pennsylvania was. Hy het sy woonstel die aand van 25 April, 1958 verlaat om ‘n brief aan sy ouers te pos. Toe hy by die posbus omdraai, het elf tienerseuns met leerbaadjies hom ingewag. Sonder om ‘n woord te sê het hulle hom met ‘n domkrag, pyp en hulle stewels en vuiste begin aanrand en hom vir dood op die sypaadjie agtergelaat. Die gemeenskap in Philadelphia het wraak geëis en die distriksaanklaer het op televisie aangekondig dat hy die doodstraf in die saak sou vra.

Toe het die volgende brief, wat deur die seun se ouers en twintig ander familielede in Korea onderteken is, gearriveer: ‘Ons familie het bymekaar gekom en besluit om hierdie petisie op te stel sodat diegene wat hierdie misdaad gepleeg het, die vrygewigste behandeling moontlik binne die wette van julle regering kry. Om bewys van ons opregte hoop wat in hierdie petisie vervat is te lewer, het ons begin geld spaar om ‘n fonds te skep vir die geestelike, opvoedkundige, professionele en sosiale leiding vir hierdie seuns wanneer hulle vrygelaat word. Ons hoop dit met die gees wat ons van die evangelie van ons Redder, Jesus Christus, wat vir ons sondes gesterf het, ontvang het.’

Hierdie verhaal neem vergifnis na die volgende vlak toe! Dit leer ons ook dat wanneer jy vergewe, jy die sitplek van die slagoffer prysgee en die sitplek van die oorwinnaar inneem. Dis wat Jesus ook vir jou vandag in gedagte het!

Sielskos: 1 Kro 6:1-7:19; Joh 9:13-23; Ps 115; Spr 25:23-25

Vergewe en beweeg aan (2)

2020-08-12
Lukas 9:62 NLV

As jy wys is, sal jy vier dinge doen: 1) Fokus op die pad vorentoe. Deur in die truspieëltjie in plaas van die pad vorentoe te kyk, sal jy die volgende afdraai mis en in ‘n sloot beland. Fokus op die feit dat jy oorleef het; en dit wat jy uit die ervaring geleer het. God het jou vir ‘n rede gespaar, vind dus uit wat dit is en wy jouself daaraan toe. 2) Hou op om maklike antwoorde te soek. Jy sal by enige boekwinkel rakke vol boeke vind met titels wat vyf sleutels tot sukses of twaalf eenvoudige strategieë vir gesondheid, rykdom en lewensvervulling belowe. Jammer, maar dit werk nie so nie. Die lewe is moeilik en diep binne-in ons weet ons dat daardie vereenvoudige benaderings nie werk nie. Die feit dat jou lewe moeilik is beteken egter nie dat jy op die verkeerde pad is nie. Soos die ou plattelandse prediker gesê het: ‘As jy nie soms van aangesig tot aangesig met die Duiwel kom nie, beweeg jy sekerlik in dieselfde rigting as hy.’ 3) Bly op jou pad – nie almal sal saam met jou stap nie. Sommige van jou naaste vriende is mense wat nooit sal verander nie en hulle hou nie van diegene wat dit wel doen nie. Jy moet nietemin daaraan toegewyd wees om te groei, jou kennis en ervarings te verbreed en na die volgende vlak te beweeg. 4) Glo in jouself – God doen! Wanneer iemand vir jou sê dat jy nooit iets sal bereik nie, glimlag en hou aan. God alleenlik ken jou potensiaal en as jy gewillig is om Hom te vertrou en hard te werk, sal Hy jou help om dit te vervul. Sukses is ‘n argument wat jou vyande en kritici nie kan weerlê nie.

Sielskos: Deut 30:1-32:28; Luk 12:49-59; Ps 119:49-56; Spr 17:18-21

Vergewe en beweeg aan (1)

2020-08-11
Filippense 3:13-14 NLV

Hoe groter die oortreding, hoe moeiliker is dit om te vergewe – maar jy moet. Dit wat jy weier om te vergewe en te laat gaan, dra jy met jou saam. Dit sal soos ‘n albatros om jou nek wees. Het iemand jou misbruik, jou verkul, oor jou gelieg, jou afgedank of op ‘n ander wyse sleg behandel? Het jy jouself gefaal? Wat jou spesifieke seer ook al mag wees, die oplossing is nie om dit te voed of dit te ontken nie. Jy moet dit vergewe en laat gaan, andersins sal jy aanhou om jouself seer te maak. Iemand het gesê deur te kies om nie ‘n ander persoon te vergewe nie, is soos om gif te eet en te verwag dat die ander persoon sal doodgaan. Om vorentoe te beweeg, moet jy ‘laat gaan’ en vrede met die verlede maak. Paulus kon maklik toegelaat het dat die herinnering aan die Christene wat hy vervolg het voor hy Christus begin volg het, hom vernietig en sy lewensdoel by hom steel. In plaas daarvan het hy geskryf: ‘Broers en susters, moenie my verkeerd verstaan nie. Ek wil nie maak asof ek die een is wat volmaak is nie. Alles behalwe dit; maar ek gee alles om so te probeer wees. Daarom steur ek my nie meer aan my verlede en al die dinge wat toe skeefgeloop het nie. Soos ‘n atleet wat sy oë net op die wenpaal hou, so span ek alles in my in: ek wíl die prys aan die einde kry. God self sal die prys uitdeel en my dan na Hom toe roep omdat ek aan Jesus behoort’ (verse 13-14 DB). Hier is nog ‘n Skrifgedeelte: ‘…vergewe eers enigeen teenoor wie julle ‘n grief het. Dan sal julle hemelse Vader ook julle oortredings vergewe’ (Markus 11:25 NLV). Vergewe dus en beweeg aan.

Sielskos: Deut 28-29; Luk 12:35-48; Ps 119:41-48; Spr 17:17

God sal jou vergewe en jou herstel

2020-05-28
Jesaja 42:3 NLV

Het jy al ooit van die groot melasse vloed wat in Boston plaasgevind het, gehoor? Op 15 Januarie, 1919, het ‘n staalvat wat amper nege miljoen liter melasse bevat het, gebreek. ‘n Nege meter hoë muur van warm stroop het mense en perde verdrink, geboue vernietig en karre, vragmotors en waens saamgesleur. Die enorme tenk, wat 15 meter hoog was en ‘n omtrek van 73 meter gehad het, was swak ontwerp. Besigheidsamptenare het die krake op die tenk wat aanhoudend te voorskyn gekom het, net met dieselfde kleur as die melasse geverf – hulle filosofie was uit die oog, uit die hart. Hierdie amptenare het geweet dat die vat gevaarlik was, maar niks daaraan gedoen nie. Daar het 21 mense gesterf en 150 mense is in die tragedie beseer, wat deur een skrywer as die ‘Swart Golf’ beskryf is. Daar is twee belangrike lesse uit hierdie verhaal te leer. Eerstens, gee aandag aan die krake in jou karakter; dit wat jy vandag ignoreer, kan jou dalk môre laat verdrink. Tweedens, dit maak nie saak hoe gebroke jy mag wees nie, as jy na God toe draai, sal Hy jou herstel. Jesaja sê: ‘Hy sal ‘n geknakte riet nie verder afbreek nie…’ Miskien dink jy dat jou sonde te groot is en dat daar nie vir jou omdraai kans is nie. Nee. God het gesê: ‘…Ek is ‘n God wat barmhartig en genadig is. Ek het geduld met mense. Ek is lojaal. Ek bly getrou’ (Eksodus 34:6 NLV). ‘…Dan sal Ek hulle genees van hulle ontrouheid; my liefde sal geen perke ken nie, want my woede is weg vir altyd!’ (Hosea 14:5 NLV). ‘…U bly nie vir altyd kwaad nie, maar is liefdevol en getrou. U sal weer medelye hê met ons. U sal ons sonde… weggooi in die diepte van die see!’ (Miga 7:18-19 NLV). God sal jou vandag vergewe en jou herstel.

Sielskos: Lev 23:15-22; Hand 2:1-18